السلام عليكم
بدش في الموضوع على طول لأني صدق صدق مغتاظه من أرامكس.. السالفه و ما فيها إن في أوراق شخصيه سريه طرشولي إياها الأهل بالثلاثا.. و المفروض إني أستلمها البارحه.. يوم شفت إن ما في حد اتصل لي من أرامكس كلمتهم اليوم علشان أتأكد…. قلت يمكن لأني في العين .. و هذا رد الشركه:
الموظفه: “الشحنه تم تسليمها مدام”!!!!!!!!!!
أنا: شلون ؟؟ و متى؟؟ و كيف؟؟؟ أنا ما استلمت شي…
الموظفه: مدام في موظف في الجامعه استلمها…
أنا: و انتو بأي يحق تسلمون الأوراق لهالموظف…
الموظفه: “مدام.. احنا عندنا اتفاقيه مع هذي الجامعه إن أي شي مكتوب فيه مكان التسليم الجامعه يسلم لغرفة البريد”…
أنا وجهي كان أصفر و أحمر.. بس مسكت أعصابي… و قلت: إنزين… شلون تسلمون أوراق سريه لشخص ثاني؟؟؟ اسمي كان مكتوب على الظرف و رقم الموبايل… و أنا مب موظفه في الجامعه…طالبه هني… ما أشتغل…
الموظفه: “مدام تقدرين تسيرين حق الموظف و هو بيعطيج الأوراق”
أنا: أولا الدوام انتهى.. و الموظف اللي تطرينه راح البيت… ثانيا مب وظيفتي إني أسير آخذ الأوراق منه.. الأوراق كان المفروض توصلني عن طريقكم… فدبروا عماركم و ييبولي الأوراق.. و أبي أقدم شكوى ضد المراسل اللي سلم الأوراق بالغلط”
الموظفه: إن شا الله مدام… وهذي رقم الشكوى و احنا بنتابع الموضوع
انتهت المكالمه على خير… 5 دقايق إلا و أرامكس متصله و اسمحيلنا مدام المكتب للي في العين مسكر و أنا بكلمج أول ما يفتح الساعه 4
انتظرت.. محد عطاني وجه… فاتصلت مره ثانيه استفسر… و صدق غايظوبي بردهم السخيف…
“مدام.. تقدرين تستلمين الأوراق يوم الأحد من غرفة البريد في الجامعه” خذ و عط مع الموظفه مب راضيه تفهم طلبت المدير…
المدير: “مدام… أنا أتفهم اللي صار.. بس احنا سملنا الأوراق”
يا ريال.. الأوراق مب عندي…
بس مدام إحنا عندنا اتفاقيه مع الجامعه.. و انتي كونج موجوده فيها فعلى طول إحنا نسلمها للبريد و انتي تسيرين تستلمينها منهم…
طبعا اهني طتقرت… و عصبت لأني قاعده أقول له كيف تسلمون الأوراق للشخص الغلط… و هو مصمم إن في اتفاقيه بينهم و بين الجامعه… و “مدام انتي ما طلبتي انسلمج الأوراق شخصيا”…” و اسمي المكتوب عالورقه.. و رقمي المكتوب عليها.. شو الغرض منه فهمني؟؟؟؟”
حاولت أهدا لأني مديرهم طلع غبي مثلهم… قلت له “انزين.. الأوراق اللي تسلمت بالغلط.. و وقتي اللي ضاع…يعني أوراق المفروض استلمها بالأربعا.. راح أستلمها بالأحد… بعد ما انتو طبعا اطرشون مراسلكم أييبها لي… هذي الغلطه… منو يدفع ثمنها… مب لازم المراسل يدفع ثمن هالغلطه…”
عاد رده هني صدق غيظ:::: “مدام.. أنا آسف إن انتي قاعده تستعملين كلمة غلطه و أنا أرجع و أقول لج إحنا ما غلطنا.. احنا سلمنا الأوراق تبعا للإتفاقيه اللي بينا و بين الجامعه”!!!!!!!!!!!!!!!!!!!!!!!!!!
عصبني بصراحه… فقلت له” دام بينكم اتفاقيه…. ليش يوم الأهل طرشوا الأوراق كا بلغتوهم بهالكلام؟؟؟ هذي مب غلطه الموظف اللي استلم الأوراق من الأهل؟؟؟؟”… “مدام احنا بنفتح تحقيق.. بس أأكد لج إن احنا اتبعنا كافة التعليمات و شروط الإتفاقيه اللي بينا و بين الجامعه… و سلمنا الأوراق.. كان المفروض ان أهلج يقولون إن الأوراق تسلم لج شخصيا“””
“انزين منو بيعوضني عن اللي صار… أوراق و تأخرت في تسلميها… مراسلكم بيسير يشرح ليش الأوراق تأخرت.. أنا أبي تعويض على اللي صار”…” أنا ما أقدر أتكلم في أي تعويض لآني هذا الشي مب من صلاحياتي… بس أاكد لج إحنا اتبعنا كافة الإجراءات الصحيحه”
رفعوا ضغطي…. بعد كل هذا… طلعت أنا الغلطانه… لأن أهلي ما اترجوا موظف أرامكس إن يسلمني الأوراق شخصيا… أنا الغلطانه.. لأني ما أعرف الإتفاقيه اللي بين الجامعه و بين أرامكس… و وقتي ضاع و الأوراق باستلمها متأخره….
طبعا موظف الجامعه بياخذ له بهدله محترمه بالأحد ما شاف مثلها… متحلفين له أنا و ربيعتي….
قولوا لي شو أسوي… كونهم مب راضين يعترفون بغلطتهم قاهرني… لو هالكلام صاير في دوله أجنبيه جان عطو تعويض و حبو خشمه بعد… و احنا يا العميل تتطلع غلطان….
عطوني حلولكم
و اسمحولي طولت…بس و الله من حرتي من الشركات للي في بلادنا و تستغفل العميل
ملاحظه:: لكل شخص بيقول السالفه بسيطه و تقدرين تسيرن تستلمين الأوراق من غرفة البريد… المسأله مسأله مبدأ… و بسنا اسغلال للعملاء
مثل ما قال دون كيشوت ..
إذا العنوان المكتوب هو عنوان الجامعة تطبق الاتفاقية ويروح الظرف لمكتب البريد اللي في الجامعة ..
اما إذا العنوان عنوانج فالمفروض يتصلبج ويسلمج الظرف ..
بس كيف المراسل عرف انج في هاي الجامعة ؟ وعلى أي اساس وصلها لبريد الجامعة ؟
مافيها شي انتي مكبره السالفه دام الظرف مقفول ومحد فتحه
ماستوى الا كل خير اما لو لقيتي الظرف مفتوح طالبي بتعويض واشتكي على ارامكس + مكتب بريد الجامعه ولو ان ارامكس مسوي
اتفاقيه والمفروض الجامعه هي اللي تتصل وتخبرج .. واللي يقول تستلم بدون بطاقه ولا غيره يعني مابي شخص ثاني وبيقولهم اسمك
كامل ولا رقمك ولا رقم الطلبيه وغيره لو مايعرفك
أنا مره داقيلي تيليفون عسبت فيه اشياء تخصني المهم رحت ويوم بس عطيتهم رقمي يابولي الغرض لا خذوا صورة البطاقة ولا شيء اللهم قالولي وقع ههههههههه فستغربت قلت ماسألني أنا منوه ولا شيء يعني لو حد ثاني يا عادي يعطونه الأغراض حسيت هذا الآرامكس محد يتجل او يأتمن فيه يعني بالأخييييييير عادي تستوي سرقاااااااااات فيه والله كريم
وهونيهاا وبتهون
وفالاول ماكنتي تعرفي ولاكن الان تعرفي انه شي اتفاقيه
وبالاكيد المره اليايه اذا طرشتي او حد طرشلج لازم بي فبالج هسؤال ( هل بينكم وبين الجهه الفلانيه اتفاقيه ولا لأ
وان عن نفسي استفدت من تجربتج يلي ممكن كانت تصيريلي مستقبلا
وشكرا
هم غلطانين حتى لو في اتفاقية..السيناريو يقول الطرف الاول دفع مقابل خدمة توصيل ظرف لشخص موجود بالجامعة، المفروض اول ما يوصل غصبن عنه يتصل فيج ويقولج ان الظرف في المبنى وبنسلمه لبريد الجامعة وفي هذي الحالة انتي تعترضين وتطلبين منه انه يوصله لج..اما انهم يسلمونه دايركت لبريد الجامعة بدون ما يتصلون فيج مالهم حق..عيل جذي الواحد يروح البريد العادي ويطرش بريد مسجل بيوصله الظرف اسرع… الاتفاقية تخص كل ما يتعلق باسم الجامعة.
الله يعينج معاهم..
خدمة العملاء عندنا في البلاد رايحه بعينها..الكل يمشي كل شي على كيفه..ولا كانه دافعين لهم فلوس
تدرين لا تسكتين عنهم اتصلي الفرع الرئيسي واطلبي مدير مسؤول وكلميه بكل عصبية (واذا اسيوي) اشتطي عليه دبل.. لان هني ما تمشي امورج لين ما تراوينهم العين الحمره..