السلام عليكم
بدش في الموضوع على طول لأني صدق صدق مغتاظه من أرامكس.. السالفه و ما فيها إن في أوراق شخصيه سريه طرشولي إياها الأهل بالثلاثا.. و المفروض إني أستلمها البارحه.. يوم شفت إن ما في حد اتصل لي من أرامكس كلمتهم اليوم علشان أتأكد…. قلت يمكن لأني في العين .. و هذا رد الشركه:
الموظفه: “الشحنه تم تسليمها مدام”!!!!!!!!!!
أنا: شلون ؟؟ و متى؟؟ و كيف؟؟؟ أنا ما استلمت شي…
الموظفه: مدام في موظف في الجامعه استلمها…
أنا: و انتو بأي يحق تسلمون الأوراق لهالموظف…
الموظفه: “مدام.. احنا عندنا اتفاقيه مع هذي الجامعه إن أي شي مكتوب فيه مكان التسليم الجامعه يسلم لغرفة البريد”…
أنا وجهي كان أصفر و أحمر.. بس مسكت أعصابي… و قلت: إنزين… شلون تسلمون أوراق سريه لشخص ثاني؟؟؟ اسمي كان مكتوب على الظرف و رقم الموبايل… و أنا مب موظفه في الجامعه…طالبه هني… ما أشتغل…
الموظفه: “مدام تقدرين تسيرين حق الموظف و هو بيعطيج الأوراق”
أنا: أولا الدوام انتهى.. و الموظف اللي تطرينه راح البيت… ثانيا مب وظيفتي إني أسير آخذ الأوراق منه.. الأوراق كان المفروض توصلني عن طريقكم… فدبروا عماركم و ييبولي الأوراق.. و أبي أقدم شكوى ضد المراسل اللي سلم الأوراق بالغلط”
الموظفه: إن شا الله مدام… وهذي رقم الشكوى و احنا بنتابع الموضوع
انتهت المكالمه على خير… 5 دقايق إلا و أرامكس متصله و اسمحيلنا مدام المكتب للي في العين مسكر و أنا بكلمج أول ما يفتح الساعه 4
انتظرت.. محد عطاني وجه… فاتصلت مره ثانيه استفسر… و صدق غايظوبي بردهم السخيف…
“مدام.. تقدرين تستلمين الأوراق يوم الأحد من غرفة البريد في الجامعه” خذ و عط مع الموظفه مب راضيه تفهم طلبت المدير…
المدير: “مدام… أنا أتفهم اللي صار.. بس احنا سملنا الأوراق”
يا ريال.. الأوراق مب عندي…
بس مدام إحنا عندنا اتفاقيه مع الجامعه.. و انتي كونج موجوده فيها فعلى طول إحنا نسلمها للبريد و انتي تسيرين تستلمينها منهم…
طبعا اهني طتقرت… و عصبت لأني قاعده أقول له كيف تسلمون الأوراق للشخص الغلط… و هو مصمم إن في اتفاقيه بينهم و بين الجامعه… و “مدام انتي ما طلبتي انسلمج الأوراق شخصيا”…” و اسمي المكتوب عالورقه.. و رقمي المكتوب عليها.. شو الغرض منه فهمني؟؟؟؟”
حاولت أهدا لأني مديرهم طلع غبي مثلهم… قلت له “انزين.. الأوراق اللي تسلمت بالغلط.. و وقتي اللي ضاع…يعني أوراق المفروض استلمها بالأربعا.. راح أستلمها بالأحد… بعد ما انتو طبعا اطرشون مراسلكم أييبها لي… هذي الغلطه… منو يدفع ثمنها… مب لازم المراسل يدفع ثمن هالغلطه…”
عاد رده هني صدق غيظ:::: “مدام.. أنا آسف إن انتي قاعده تستعملين كلمة غلطه و أنا أرجع و أقول لج إحنا ما غلطنا.. احنا سلمنا الأوراق تبعا للإتفاقيه اللي بينا و بين الجامعه”!!!!!!!!!!!!!!!!!!!!!!!!!!
عصبني بصراحه… فقلت له” دام بينكم اتفاقيه…. ليش يوم الأهل طرشوا الأوراق كا بلغتوهم بهالكلام؟؟؟ هذي مب غلطه الموظف اللي استلم الأوراق من الأهل؟؟؟؟”… “مدام احنا بنفتح تحقيق.. بس أأكد لج إن احنا اتبعنا كافة التعليمات و شروط الإتفاقيه اللي بينا و بين الجامعه… و سلمنا الأوراق.. كان المفروض ان أهلج يقولون إن الأوراق تسلم لج شخصيا“””
“انزين منو بيعوضني عن اللي صار… أوراق و تأخرت في تسلميها… مراسلكم بيسير يشرح ليش الأوراق تأخرت.. أنا أبي تعويض على اللي صار”…” أنا ما أقدر أتكلم في أي تعويض لآني هذا الشي مب من صلاحياتي… بس أاكد لج إحنا اتبعنا كافة الإجراءات الصحيحه”
رفعوا ضغطي…. بعد كل هذا… طلعت أنا الغلطانه… لأن أهلي ما اترجوا موظف أرامكس إن يسلمني الأوراق شخصيا… أنا الغلطانه.. لأني ما أعرف الإتفاقيه اللي بين الجامعه و بين أرامكس… و وقتي ضاع و الأوراق باستلمها متأخره….
طبعا موظف الجامعه بياخذ له بهدله محترمه بالأحد ما شاف مثلها… متحلفين له أنا و ربيعتي….
قولوا لي شو أسوي… كونهم مب راضين يعترفون بغلطتهم قاهرني… لو هالكلام صاير في دوله أجنبيه جان عطو تعويض و حبو خشمه بعد… و احنا يا العميل تتطلع غلطان….
عطوني حلولكم
و اسمحولي طولت…بس و الله من حرتي من الشركات للي في بلادنا و تستغفل العميل
ملاحظه:: لكل شخص بيقول السالفه بسيطه و تقدرين تسيرن تستلمين الأوراق من غرفة البريد… المسأله مسأله مبدأ… و بسنا اسغلال للعملاء
اختي الارامكس غلطانين من ساسهم لراسهم
لكن فالنهاية اباج تهدين اعصابج لان اكيد محد بيفتح الظرف…
وماصار الاالخير
ورب ضارة نافعه
انا نفس الشيء سوووو فييني
طلبت من قناه تلفزيونيه منتج الساعه 2:00 فليل
الصبح الساعه 7:00 اتصلت كنسلت من القناه وقالولي طرشناه الاراميكس
اتصلت بالاراميكس وقلتلهم كنسلو الطلبيه اللي كنسلتها من القناه
الطرفين ما كنسلو وتمو حاشرين الدنيا وراي اسبوع وانا اقولهم انا مكنسله وكل يوم يتصلولي وين مكانج واهزبهم
سويت حركة الموبايل المغلق وتم اييني المس كول من عندهم
المهم داشه الدوام والا اشوف ال Office boy مدخل واحد عندي المكتب
يقوللي مدام ( فلانه ) ياينج ظرف من القناه الفلانيه
قلتله اولا من وين عرفت مكان دوامي ومنو عطاك الحق تي مكان دوامي وتييب الاغراض وقلته روح وانا بتفاهم وياهم
اتصلت وطلبت اكلم السبرفايزر مالهم المناوب
وهزبته هزاب لين ما اعتذر وقلتله احرجتوني كيف توون الدوام
طلع عندهم العنوان من يوم يابو بطاقه الهويه !!!!!!!!!!!!!
الأمور طيبه عند أخونا المقاول الصغير.
لو تكلمينهم عن سالفتي بالمره بعد يكون أحسن بس مب تنسين تقوليلنا شوه صار وياج
ما فهمت ردك بصراحه… ما دري تطنز عالشركه و لا انت فعلا تقصد كل كلمه كتبتها… و ما فهمت شو تعني بسؤالك “إلى متى!!!!!!!!!!!!!!”
… أولا أنا طالبة ماجستير في الجامعه… و مب دايما أتواجد في الجامعه.. يعني حسب شغلي… صدف إني بكون في الجامعه هالفتره…. فأوني بدال ما أبهدل عمري و أدليهم المكان قلت للأهل يحطون اللوكيشن الجامعه… وأنا تعاملت معا كذا شركه قبل و كلهم أرجع أقول كلهم أول ما يوصل المراسل للجامعه يتصل بي و أروح أستلم الأغراض.. و أنا كعميله ما لي دخل في أي اتفاقيه بين شركة أرامكس و الجامعه… كون الإتفاقيه بينهم مب بيني و بين الشركه و أنا مب طرف فيها…. بعطيك مثال.. إذا إنت تداوم في اتصالات و كتبت رقم تلفونك و كتبت اسمك و كتت اللوكيشن “مب المستلم” .. اللوكيشن “اتصالات” هذا ما يعطي الحق لأي موظف في اتصالات إنه يستلم الظرف و بعدين يسلمه لك….
أنا وقتي ضاع… و تأخرت في تسليم أوراق مهمه… و بسبب هذا الشي إجراءاتي راح تتأخر… و موظف الجامعه كان المفروض يتصل لي مب يدق لي مره بالأربعا من بداله الجامعه و يطنش… و يوم أرجع أتصل البداله تقولي و الله ما أعرف منو متصل لج…. و حوصي إنتي في الجامعه تدورين منو من الدكاتره داق لج و الكل يقول إحنا ما دقينا و “ليش ندق من بدالة الجامعه… بندق من تلفون المكتب المباشر”…
أرامكس غلطانه لأنها ما بلغت العميل بالإتفاقيه اللي بينه و بين الجامعه….
موظف الجامعه غلطان لأنه استلم ظرف مب له…. و لأنه طنش صاحب الظرف و توقع إني راح أقرا أفكاره و أعرف من المجهول إن الظرف معاه…..
أنا مجربه خدمةالعملاء داخل الدوله و خارج الدوله… و للأسف الخدمه عندنا صفر… مب غلط إنا نطالب بأبسط حقوقنا كعملاء إنا نتلقى الخدمه اللي دفعنا ثمنا… الشركات تلعب فينا لأنها تعرف إنا احنا ما راح نطالب بشي لأن ما عندنا ثقافة خدمة العملاء… و ما في داعي نخاف من القذف و السب…. و بسنا سكوت على حقوقنا….
و أخوي… ما أدري شو خص الكسل في الموضوع… بصراحه وايد زعلتني هالكلمه و ما أرضاهاعلى عمري…
و موضوع سورة الكهف موجود دايما في المنتدى…. و الحسنات في أكثر من طريقة الواحد يقدر ياخذها…. أهم شي “أن لا تعرف شمالك ما أنفقت يمينك “….
أحب أشكر كل الإخوان اللي أعطوني أراؤهم… و أنا راح أكلم الفرع الرئيسي بالأحد و ما راح أسكت عن السالفه… يعني فالحين بس ياخذون حقوقهم و ينسون حقوق العملاء….