مطبخنا الشعبي والحديث

ها الموضوع هو عبارة عن مطبخ حقنا فيه الاكلات الشعبية والحديثه واي عضو يبغي يتعلم وصفه نحنا بنساعده بالي نقدر عليه

اتمنى ما ينحذف موضوعي ويوم بتردون لا تظهرون من الموضوع

انا ببدا بشي سويته البارحه في بيتنا وضبط ويايه كنت شايفته على ايميلي وقلت بطبيفه ويبت لكم الطريقة

الوصفه هيه

الشورما

طريقة عمل الشاورما بالبيت احلا من المطعم بامكانك تعمليها باللحم نفس الشي راح تعجبكم

المقادير

1- صدور دجاج الكميه الي تحتاجيها
2- نص كاس زيت زيتون
3-نص كاس عصير ليمون واذا يزيد افضل بعد
4- بهار اسود او ابيض وفلفل احمر وملح
5- واذا تحبي حطي علبة روب زبادي

للعجينة:
3 كاسات طحين
كاس وربع ماء
ملعقه كبيره خميره فوريه
شوي ملح وملعقه كبيره سكر
بيضه

السلطة :
خس مفروم
طماط مقطع اختياري شرائح او مكعبات
مخلل خيار
صلصة
طحينه وشطه وماء مقادير انتي تحدديها

الطريقة :-

1- نحط الدجاج في حافظه نصب الزيت والليمون
والبهارات والملح والزبادي ان حبيتي
ونتركهم بالثلاجه يوم كامل افضل واحسن

2- بعد يوم من نقع الدجاج في الخلطه
3- نضع صدور الدجاج على صاج او مقلى تيفال
ونقليه مع شريحة زبده حوالي ربع الزبده ونشويها من
الجهتين شوي تتحمر مو شرط تنضج بالكامل

4- نقطع الدجاج شرايح مستطيله بعد التحمير الخفيف
5- ونعودها في المقلى ونقليها بالزبده
6- نظيف عليها شوي ملح وبهار حسب الرغبه الي انتي تبيها والطعم

طريقه عمل الخبز:-
1- نخلط الطحين والملح والخميره والسكر والماء
2- نتركها ساعه كامله ونص لين تخمر العجينة
3- المقدار راح يكفي 15 خبز قسميها بالتساوي 15
راح يكون رقيق لا تخافي يخترب عادي لمن تخبزيها

4- بنحتاج صاج تيفال او اذا ما عندكم مو مشكله في مقلى تيفال مو مخدوش او شي حتى ما يحترق الخبز
5- نفرد العجينه الي قطعناها وكورناها وفردناها مو مهم يكون دائري تمام الي يصير خفيف
6- نخبزه وبين كل خبزوخبز لازم ننظف الصاج حتى ما يحترق الخبز ويصير اسود ومر طعمه

بألف عافية

ملتوش من الايميل وجربناه في البيت وظهرت روعه شرات الي في الصورة

وحلوه للعشاء بيحبونها اليهال

اختكم

بنت الامارات

ملاحظة:-

أتمنى من اي عضو او عضوه يحط وصفه يكون مجربنها وياريت لو كل وصفه تدرج صوره لها وما نبغي وصفات من مواقع الطبخ كوبي وبست لا نبغي شي جربتوه وتقولون شو كانت النتيجة