مقارنة بن بهوان والفطيم(تويوتا) -اسعار تجارب مواقف

79 thoughts on “مقارنة بن بهوان والفطيم(تويوتا) -اسعار تجارب مواقف”

1. من سنة ونص تقريباً اشتريت تويوتا للحرمة
   في البداية كنت ناوي أشتري السيارة من الفطيم (لأنه منا وفينا)
   سرت الوكالة ولفيت على السيارات وتميت واقف تقريباً 10 دقايق أبا حد يقولي “السلام عليكم” على الأقل لكن ماشي
   سرت أنا ورزيت بويهي عند واحد من الموظفين
   طبعاً مافي حد عنده ، لكنه مسوي نفسه مشغول بالكمبيوتر
   سألته عن سعر السيارة اللي أباها
   رد علي بدون نفس وبدون ما يلتفت صوبي حتى : 109 آلاف
   طبعاً أنا شفت الإسلوب قلت مافي داعي أسأل عن مواصفات أو أي أسئلة ثانية
   لكني تجرأت وسألته : هل السعر هذا نهائي ؟
   إلتفت لي بطرف عينه ، مع إبتسامة استهزاء مرسومة على طرف وجهه
   وقال : هو في سيارات أصلاً ؟

   قلت له : شكراً وفي خاطري أقول (مع إنك ما تستاهلها)
   طلعت من عندهم على مكتب بهوان في النادي السياحي
   استقبلني واحد اسمه (أنكت)
   ما خلا بروشورات ولا كتالوجات إلا ويابها لي
   طبعاً مع النسكافيه
   وعطاني سعر أقل من الفطيم بـ 3 آلاف درهم
   ولو خذت لون ثاني غير الأبيض كنت بحصل خصم 5 آلاف تقريباً
   وطبعاً السيارة توصلك على الريكفري لباب بيتك إذا تحب

   بعد هذا كله ، ما طلعت من عندهم إلا وأنا مخلص كل شي

   عن نفسي بشتري من بهوان حتى لو كانت أسعارهم أغلى من الفطيم

   قسم بالله انك غمضتني …!!!!

2. مع اني اخر مرة شريت من البهوان لكن يوم السيرفيس عزك الله كل ما اودي الموتر يدعمون تلاقي فيه شحفات وفي مرة وديتا كانو داعمين من وراي عالصوب مكان الحساس الخلفي وكانو مسوينلا بولش بعد بس جكينهم لقيت بقايا البولش عند الحساس حشرتهم وخليتهم يغيرون البمبر بكبره والفطيم هم عندي موتر توديه يحافظون عليه جنا موترهم وهذا الفرق

3. تجربتي بسيطه مع الوكاله .. الوالد طلب مني أطلبله لكزس فورويل .. طبعا أخوكم ما يعرف حد فالوكاله رحت و لا جدامي بو العنيين المصري .. قلتله أبا لكزس فورويل قال: مفيش و لازم حجز و أتريا .. قلت مب مشكله .. هالكلام فشهر 3 العام (2008) .. على أساس أستلم شهر 7 .. عرست و سافرت و رديت شهر 7 .. اتصلتبهم .. يا جماعه السياره وصلت و لا لأ ؟ قال الحين نسلم اللي حاجزين شهر 10 2007 .. قلت خير .. بتريا .. استوى شهر 9 .. 10 … 11 طقع جووي .. اتصلتبه دمي يفور .. كل واحد يفرني عالثاتي .. المهم كلمت بو العنيين .. قلتله و آخرتا معاكم ؟ قال مفيشش عربيات ـجيييب منيين .. المهم شديت معاه بس بأسلوب تهزيء محترم .. قال فلوسك كاش .. تعال استلم بكره .. !!!! و الله يا جماعه انصدمت .. قلت ليش انته مفكر اني أبا السياره عطيه ؟ و انزل عليه أشد عن قبل .. قلت اسمع .. أنا سياره هب شاري .. و أطرش الدريول يسحب العربون (1000 درهم) .. و كفى الله المؤمنين شر القتال .. طبعا مستحيل أشتري من عندهم حتى لو ماشي بهوان .. بروح اليابان .. بسوق سانقيونق .. دمبر .. أي شي .. و لا أردلهم ..

   أنا كل تجاربي مع أبوظبي موتورز .. بصراحه الشباب هناك توب .. يابولي أسعار حلوه فكل سياره بعتها سواء عليهم أو شباب من برا .. و يابولي تأمين بسعر خيالي (ثاني سنه) .. و من يومين اشتروا عني سياره بسعر أعلى من السوق بوايد ..

   و سامحوني طولت عليكم ..

4. ولا شو قال ما تفرق تدفع 2000 او 5000 او 10000

5. بصراحة… (أنكت) هذا ولد حلال … يا رجل من تحدر عنده تحس بالمعاملة المحترمة, professional, مب اللي يشتغلون فالفطيم.
   اللي يقهر الواحد انه هذا بزنس. لازم تحسب حساب كل شي فيه اذا تبا تكبره وتنجحه انشالله. واظني اهم شي رضى الزبون اذا ما كنت غلطان. بس السؤال لييييييييييييييش الفطيم وكل اللي عنده يخلون رضى الزبون آخر شي يفكرون فيه؟؟؟؟؟؟؟

Comments are closed.