فتحت لقيت مندوب يقولي أنت ربحت معانا تنظيف ( كامل ) للبيت ..!!
قلت طيب وبعدين ..خلصني قولي شو عندك وانت مكانك ؟؟
قال أصبر ياباشا لازم ندخل ننظف لك البيت وبتشوف بعينك الجهاز والي يعمله ..؟؟
قلتله طيب من الأخر قولي قصته وكم سعره وأنا بوفر عليك التعب هذا كله ..!
المهم أصر هو يدخل وينظف ( كل شي ) مجاناً لا وبيعطيني هدية ببعد قيمة ألف درهم ( أغسل أيدك )
قلت بخاطري أنا فاضي وأتريا المباراة بخليه ينظف ويسوي الي يباه وبعدين بصرفه
وقعد يشرح ويبربر واااااااااايد وأنا أقوله خلصني خلصني أنا ما بسمع تاريخ الشركة وهالحركات طول اليوم ..!!
ولااااااااااا كأنه يسمعني شو أقوله مصر أنه يتكلم كأنه كمبيوتر مبرمج على كلام واسئلة ويحاول يحرجك وان بيتك فيه وفيه وأن الجهاز هذا السوبرمان الي بينقذك من الكارثه الي أنت عايش فيها ولا أنت تدري
وأنا مطننننننننش
ويطلعلي العده وهو يقولي أنت أول زبون افتحله العده ( ومن هالخريط ) وهالجهاز من شكله لف على كل البيوت
ليييين وصلني للفراش مال الكرفايه وركب قطعه وشفط من الكرفايه وطلع غبار في الفلتر عنده وقالي شوف ياباشا هذي حشرة أسمها عثة الغبار (DUSTMITE) ( ويراويك صورتها المرعبه عنده )
ويقولك هذي حشرة أنت ما تقدر تشوفها لا،ها مكبره ألف مره وفي ملايين بفراشك ترضى أبنك أو حد من أهلك ينام على هذي الحشرة ..؟؟
( وكل شوي يقولك ترضى وترضى على أهلك )
المهم قلتله المفروض تييب وياك مجهر عشان تراويني كيييييف جهازكم الجبار يقتل أو يشيل هذي الحشرة فسكت لأول مره وما عرف يجاوب ..!!!
وقلتله هالحشرة تقلتلها أشعة الشمس فقط وبلا هالأفلام ..!!
والحبيب غير الموضوع وقالي طيب تخيل جهاز بهذه المواصفات كم سعرة مقارنة بسعر شركة ( كيربي ) الي ب 11000..؟؟؟
وقالي جهازنا بـ ( 9700 ) درهم بس تخيل ..!!
قلتله جهازك غالي وما أحتايه فأنصدم الريال وفي الأخير شاف مافي فايده وأنا ( معند ) أتصل على مديرة ومديره ومديرة على طول وصل ( سبحان الله ) وكأنه واقف على الباب ..!!!
وورد مديرة يعيد لي القصة ( بأحترافية أكثر ) ويحاااااااااول يقنعني بكل الطرق وكل السبل وأنا معنننننننننننننننننند
وقلتله أنتوا بديتوا بكذبه أنكم بتنظفون البيت كامل مجانا والي شفته بس عرض بسيط وقلتوا هديه بالف درهم وأنا فتحت النت جدامه والناس تسب في جهازهم وفي ضمانهم ( الي أونه 15 سنة )
وقلتله أنتوا ناس تعتمدوا على ( إحراج الناس ) بكل الطرق لتسويق بضاعتكم وتعتمدوا مبدأ الضغط للبيع وكأنه غصب طيب الواحد بيشتري منكم وأنا على قناااااااعه أن هذا الشي ما يفيدني وايد
لأن شركة تنظيف منزليه ما تكلف 300 درهم في الشهر
أو حتى شراء جهاز أقل مواصفات وبسعر أقل بعشر مرات من جهازكم ..!!!
وعلى العموم أنا أحذر من التعامل مع هذه الشركات وأدخالها البيوت خاصة لربات البيوت الي أعرف أن الأغلبية ما بيتحمل الضغوط والأحراج وحركات النص كم لهذه الشركات ومندوبيها ( بياعين الهوا )
والمنتج موجود في النت الي مقتنع يتصل عليهم وبيوونه ركض أسرع من أبو الحروف
والله ولي التوفيق
وانا مستعد اسوّي دروس مجانية للأعضاء في المنتدى
و الدورة راح تكون بعنوان
((( كيف تقول لا )))
تدري
اول شيء اتسويه انك تكون كول و عادي و ترد بكل بساطة بكلمة من حرفين
لا
هالكلمة لو نقدر نقولها بوقتها كان عشنا أحلى حياة بعيداً عن كل المنغصات
والله يا مصمم في ناس كثير تنحرج وهم معتمدين وفاتحين شركتهم على هذا المبدأ ( الأحراج ) فليش نعطيهم الفرصه وليش ما نصير ( أوقح ) منهم ..؟؟؟
ووالله ما يتوفجون في بيعتهم هذي لأن في حديث عن الرسول ( صلى الله عليه وسلم ) : ما أخذ بسيف الحياء فهو حرااام ) تحياااتي
.
.
.
اربيعي كان منحرج منهم
و مرة اتصلوا عليه وانا عنده !!! قالي تكفى رد
الشركة : ألو سيد فلان ؟
انا : نعم تفضل ؟
الشركة : عندك موعد عرض اليـ …..
مقاطعة سريعة : نعم اخوي وياليت تكنسل الموعد
الشركة : ولا يهمك سيد فلان امتى بدك يكون الموعـ …..
مقاطعة قوية : مابي مواعيد ولا عرض ولا هم يحزنون وياليت ماتدق على هالرقم مرة ثانية
طوط طوط طوط طوط
مثل هالأشكال يبيلها ويــــــــه لـــــــــــوح
وبس
*~ سلام عليكم
–[- صباحكِ شهدٌ غٌمس بوردٍ من جوري -]–
..{ موضوع حلووووو
وتسلم على طرحك الموضووع
لك مني { أجمل باقة ورد جوري }
–[- دمت بخير -]–
فمان الله ~*
ياما مروا علينا هالشركات ونصدهم وياما إتصلوا فينا ونسكر بويهوهم