السلام عليكم ورحمة الله وبركاته…
يا جماعه مشتري بيت في الشارجه و عدلت فيه و دفعت دم قلبي المهم بغيت اغير عزكم الله الحمام تغير كامل 100% علما بان الحمام صغير وشكلة مال سنة 1970s مساحته تقريبا 3 في 2 متر تقريبا او اصغر.. عالعموم بغيت اغير شكل الحمام لان شكله غش و ابي احط شور VIP (مابي بانيو) و مغسلة VIP و السراميك VIP الخ
ممكن حد يخبرني كم بيكلف الحمام تقريبا ؟؟ علما انا خاطري اسوي شرات حمامات الفنادق صغيرة لكنها حلوات..
انا سرت السوق الصيني و حصلت بلاوي لكن خفت اركب اغراض من عندهم لان خبروني اغراضهم فقط للعرض ام للاستخدام ما تنفع….
.يعني ابي اغراض اصليه
في خاطري اسوي نفس الي في الصورة الاخيرة
فيه سيراميك مال راس الخيمة زين و أسعاره معقولة..بس يبالك اتضارب وااايد إلين ما توصل سعر محترم (المتر تقريبا بحدود 25 درهم بدون ضرابه) موجود ف الصناعية ف الشارجة و هناك نازو و غيره..بس انصحك بسيراميك راس الخيمة لأنه عملي و رخيص..
بالنسبة للحجرة مثل ما اتفضلت اختي (إماراتية) المحلات اللي طرحتها جميلة..و فيه محل مارلين بعد صوب هوم سنتر.. أثاثهم حلو و سمبل مال غرف النوم..
يدران الغرفة..؟ ليش ما تصبغه من ألوان الهادية (بيج) و تخلي أثاث غرفة النوم بني.. و الستاير متدرجة الألوان بين البني و البيج و الذهبي؟؟
ممكن هالموقع يفيدك شوية..بس كله يرجع لك ف النهاية شو الألوان اللي تفضلها..!
http://albeet.hawaaworld.com/modules.php?name=Sections&op=listarticles&secid=1
مرحبا ملاين يا سامان ومشكورة على المعلومات و الموقع الممتاز….
بخصوص السراميك اممم انا فكر احط القطع الصغيرة بألوان متدرجه ماعرف شو اسمها لكن ممكن تشوف في الصورة الاخيرة بتحصلهن صوب الشور والمغسله اما الارضيه ما قررت لحد الان لكن يمكن احط سراميك نفس فندق هليتون ابوظبي (رملي) تحس انك تمشي على رمل و جاف (شكله يمتص الماء) ما يزحلق الواحد…
بخصوص الغرفة .. غرفتي الي بوظبي صابغنها بلون البيج و الاثاث بني محروق والارضيه جرانيت ايطالي بيج… بغيت اغير فصبغت لون اخضر فاتح :dddff: اونه تغير…
مثل ما قلت بغيت اخلص الحمام في الاول والاثاث لاحق عليه…
هالبيت اعتبره بروجكت و ابي اغير فيه بين فتره و فتره ..
المرة اليايه بغير صقف المسبح الخارجي.. الصقف من بلاستك مادري شو اسمه متفتت من الشمس ابي احط صقف يقاوم الشمس…
لو عندك رقم اي محل تعرفه و متعامل معاه و تشوف سعره مناسب راسلني على الخاص…
وفقك الله ورعاك
اخوي محل مارين في صحارى عنده غرف نوم خشب روعه اذا انت تحب الكلاسيك
واسعارهم حلوه مب غاليه وعندهم بعد ديكورات حلوه واذا بغيت اكسسوارات عندك لايف ستايل فصحارى اكسسواراتهم عجيبه وتعطي جو حلو وهوم سنتر عندهم تنزيلات حاليا يمكن تحصل عندهم شي يعيبك
وعندك حول الامارات اسعارهم وايد رخيصه والمحل كبير وفيه تشكيلات حلوه
اذا تبا رقم صباغ عجيب شغله ترتيب ممكن اييب لك
بالنسبة للحمام مثل ما قلت لك الصناعيه اخوي عندهم كل المستويات اللي تباها الرديء والممتاز واسعارهم وايد حلوه بس كاسرهم في محل هناك اسمه المختار عنده سيراميك حمامات رهيب
واي خدمه معلومه حاظره اخوي
مرحبا مرة اخرى اسف على التأخير .. كنت معزوم وعقب سرت لعبت سلة :ar114:
خلاص باجر بسير الشارجه و بشوف الاثاث في الاول لكن المشكلة انا وسواسي لي ستين الف راي ولهذا السبب انا بغيت مصمم او حد عنده خبره في الديكور و الصيانه….
وعن الاكسسوارات ماعرف اختار ( احب الكلاسيك و الهاديء) :^23: …
الاهم هو الحمام الان…
وفي الاخير بغيت رقم محل المختار.. انا بغيت باجر ادفع و على طول ايون و يركبون و يشتغلون اباهم يخلصون يوم الجمعه لاني ابي اسوي مفاجأه للوالد:064: …
وعن المكاسره انا فاشل وبو محمد شاهد لوول…
شو تنصحين اسوي الارضيه ؟؟ خشب نفس الي في الصورة ام سراميك ؟؟ و اللون ؟؟ السخان مب مخفي ماعرف شو اسوي ابي اخفي السخان ؟؟ احط سيلنج او اخلي السخان برع الحمام ؟؟
الف شكر لج يا بنت بلادي على وسع صدرج و نصائحج…
وفقك الله ورعاك
بتلقى اذا سرت الصناعية
اخوي A B C ،
تحيد يوم اتصلت بس و كنت مضيع في الصناعية ؟
انت كنت عند المكان اللي تنشده ، عندهم كل شي ، و اذا بغيت شي اصلي و لكن بيكون اغلى ، شوف عند التجهيزات المتحدة (United Suplies ) شايف انا عندهم نفس الصورة الاخيرة تقريبا .
و بعدين يوم تبا تدور في الشارجة خبرني و فالك طيب
سيراميك راس الخيمة ممتاز حق الكاشي والسيراميك لأن بيكون عندك مصنع في الإمارات مستعد يبدل لك أي قطعة لو اختربت في المستقبل لكن لو شريت اسباني مثلا وباجر احتجت قطعة ثانية بيقولون لك مب متوفرة في السوق. وترى سيراميك راس الخيمة فيه كل المستويات اللي ممكن تحتاجها.. عندهم اللي ب13 ريال وعندهم اللي ب 300 ريال.
لو بغيت أشياء حلوة ومميزة.. عندك محل سارة سيراميك.. موجود في دبي شارع صلاح الدين وشارع زعبيل. وايضا في الشارجة بين محلات الأدوات الصحية ما أعرف وين بالضبط..
وأيضا في محلين حلوين في الشارجة.. ما أذكر الأسماء بس باحاول أدليك على مكانهم..
وانت جاي من دبي.. شارع الوحدة كمل سيييييييييييييييييييييييدة.. لين تحصل الجسر اللي يمر جدام المركز.. نسيت اسم المركز.. بس جسر يلف بك شوي!
لا تصعد هالجسر.. لف يمين يوديك شارع كله محلات حمامات وكراجات.. على ايدك اليسار في بداية الشارع جريب التقاطع بتحصل محل اسمه (الرابية) وعداله محل ثاني نسيت اسمه أيضا يبيع حمامات.. وعدالهم أيضا محل سيراميك صيني ومعرض سيارات..
المهم الرابية عجيب للسيراميك والرخام.. وعنده سوالف من اسبانيا وايد حلوة..
والمحل اللي عداله (مب الصيني.. الثاني) محل كبير وفيه أطقم الحمام والشاور اللي ترمس عنه (في أنواع من هالشاور فيها تليفون وراديو).
بخصوص المغاسل.. عندك كوهلر.. شارع الشيخ زايد محل اسمه الهاشمي أو الهاشمية.. في البناية اللي قبل مركز مزايا..
وأيضا للحنفيات والصنابير ممكن تاخذ من كوهلر.. وممكن تاخذ من جروهي. شغلهم ممتاز ومضمون مدى الحياة بس تأكد انه أصلي.
والله يوفقك.. بيت البركة ان شاء الله.
منقذ