السلام عليكم ورحمة الله وبركاته…
يا جماعه مشتري بيت في الشارجه و عدلت فيه و دفعت دم قلبي المهم بغيت اغير عزكم الله الحمام تغير كامل 100% علما بان الحمام صغير وشكلة مال سنة 1970s مساحته تقريبا 3 في 2 متر تقريبا او اصغر.. عالعموم بغيت اغير شكل الحمام لان شكله غش و ابي احط شور VIP (مابي بانيو) و مغسلة VIP و السراميك VIP الخ
ممكن حد يخبرني كم بيكلف الحمام تقريبا ؟؟ علما انا خاطري اسوي شرات حمامات الفنادق صغيرة لكنها حلوات..
انا سرت السوق الصيني و حصلت بلاوي لكن خفت اركب اغراض من عندهم لان خبروني اغراضهم فقط للعرض ام للاستخدام ما تنفع….
.يعني ابي اغراض اصليه
في خاطري اسوي نفس الي في الصورة الاخيرة
بتلقى اذا سرت الصناعية
ان شاءالله بلقى المطلوب
انا اليوم عقب الدوام ساير الشارجه بسوي شوبنج:dddvvv:
اخوي A B C ،
تحيد يوم اتصلت بس و كنت مضيع في الصناعية ؟
انت كنت عند المكان اللي تنشده ، عندهم كل شي ، و اذا بغيت شي اصلي و لكن بيكون اغلى ، شوف عند التجهيزات المتحدة (United Suplies ) شايف انا عندهم نفس الصورة الاخيرة تقريبا .
و بعدين يوم تبا تدور في الشارجة خبرني و فالك طيب
هلا بو محمد
خلاص عرفت المكان :oooww: وكله بفضلك ومشكور على المساعدة و ان شاءالله بتصل بك اذا ضعت :064:
سيراميك راس الخيمة ممتاز حق الكاشي والسيراميك لأن بيكون عندك مصنع في الإمارات مستعد يبدل لك أي قطعة لو اختربت في المستقبل لكن لو شريت اسباني مثلا وباجر احتجت قطعة ثانية بيقولون لك مب متوفرة في السوق. وترى سيراميك راس الخيمة فيه كل المستويات اللي ممكن تحتاجها.. عندهم اللي ب13 ريال وعندهم اللي ب 300 ريال.
لو بغيت أشياء حلوة ومميزة.. عندك محل سارة سيراميك.. موجود في دبي شارع صلاح الدين وشارع زعبيل. وايضا في الشارجة بين محلات الأدوات الصحية ما أعرف وين بالضبط..
وأيضا في محلين حلوين في الشارجة.. ما أذكر الأسماء بس باحاول أدليك على مكانهم..
وانت جاي من دبي.. شارع الوحدة كمل سيييييييييييييييييييييييدة.. لين تحصل الجسر اللي يمر جدام المركز.. نسيت اسم المركز.. بس جسر يلف بك شوي!
لا تصعد هالجسر.. لف يمين يوديك شارع كله محلات حمامات وكراجات.. على ايدك اليسار في بداية الشارع جريب التقاطع بتحصل محل اسمه (الرابية) وعداله محل ثاني نسيت اسمه أيضا يبيع حمامات.. وعدالهم أيضا محل سيراميك صيني ومعرض سيارات..
المهم الرابية عجيب للسيراميك والرخام.. وعنده سوالف من اسبانيا وايد حلوة..
والمحل اللي عداله (مب الصيني.. الثاني) محل كبير وفيه أطقم الحمام والشاور اللي ترمس عنه (في أنواع من هالشاور فيها تليفون وراديو).
بخصوص المغاسل.. عندك كوهلر.. شارع الشيخ زايد محل اسمه الهاشمي أو الهاشمية.. في البناية اللي قبل مركز مزايا..
وأيضا للحنفيات والصنابير ممكن تاخذ من كوهلر.. وممكن تاخذ من جروهي. شغلهم ممتاز ومضمون مدى الحياة بس تأكد انه أصلي.
والله يوفقك.. بيت البركة ان شاء الله.
منقذ
مرحبا مقنذ:ar105:
بخصوص السراميك كلامك صحيح 100% و انا ما فكرت فيها بصراحه.. لكن خلاص ان شاءالله باخذ سراميك راس الخيمه…
بخصوص المحلات الي في الشارجه خلاص عرفتها وين و ان شاءالله باجر عقب الدوام متجه للتسويق:oooww:
اما بخصوص الشاور الي فيه تلفون و راديو الخ حصلتهن في السوق الصيني روعه اشكالهن (من 800 درهم الى 3000 درهم) لكن صناعة صينيه و انا ابي شي يعمر…
بخصوص الصابير و الحنفيات ما فكرت فيهن لين الحينه لكن زين يوم ذكرتني ..خلاص بمر ان شاءالله على المحلات واذا ضعت بتصل بك و عطني الداركشن…
وفقك الله ورعاك
مرحبا مرة اخرى اسف على التأخير .. كنت معزوم وعقب سرت لعبت سلة :ar114:
خلاص باجر بسير الشارجه و بشوف الاثاث في الاول لكن المشكلة انا وسواسي لي ستين الف راي ولهذا السبب انا بغيت مصمم او حد عنده خبره في الديكور و الصيانه….
وعن الاكسسوارات ماعرف اختار ( احب الكلاسيك و الهاديء) :^23: …
الاهم هو الحمام الان…
وفي الاخير بغيت رقم محل المختار.. انا بغيت باجر ادفع و على طول ايون و يركبون و يشتغلون اباهم يخلصون يوم الجمعه لاني ابي اسوي مفاجأه للوالد:064: …
وعن المكاسره انا فاشل وبو محمد شاهد لوول…
شو تنصحين اسوي الارضيه ؟؟ خشب نفس الي في الصورة ام سراميك ؟؟ و اللون ؟؟ السخان مب مخفي ماعرف شو اسوي ابي اخفي السخان ؟؟ احط سيلنج او اخلي السخان برع الحمام ؟؟
الف شكر لج يا بنت بلادي على وسع صدرج و نصائحج…
وفقك الله ورعاك
اخوي اذا تبا مهندس ديكور بعطيك رقم مهندسه سعرها مناسب وشغلها حلو بس تبا رايي السالفه ما ترزى الا غرفه هي وانصحك تختار الاثاث خلاف تصبغ الغرفه وانصحك “باصباغ اللولو” ذوقهم راقي واسعارهم حلوه بعطيك الرقم اذا حبيت واخر شي الستاير واذا تبا محل اسعاره حلوه حق الستاير بييب لك كذا محل وانت اختار
بس خلنا في الحمام الحين
الارضيات سيراميك احسن
الخشب مع الوقت ينتفخ من الرطوبه
بالنسبه للسقف حلوه فكرة الجبس نحن مسوينها بس ماعرف بعد فتره الجبس شو بيستوي به فاحسن شي السيلنج اللي متعودين عليه اما انك تظهر السخان برع ما انصحك !!!
بالنسبه للالوان انت يوم بتشوف التشكيله اللي عندهم تقدر تختار صعب انك تحدد لون معين
المختار مثلا عندهم سيراميك معشق زيتي وابيض صدفي فيه لمعة اللولو شكله رهيب ونفس الشكل عندهم اسود وابيض ونفس اللمعه احسه فندقي وحلو بس ها من مده شايفتنه يعني جديم ماعرف اذا بعده موجود
بالنسبه لمحل المختار رقمه 5326183 6 في الصناعيه رقم 4 مجابل مخبز المختار عالشارع الثاني
انت لو تسير الصناعيه بتحصل وايد محلات يمكن تحصل محلات احسن
اما بالنسبه للخلاطات والشور الاخوان ما قصروا يزاهم الله خير
واي خدمه حاظره
سلام عليكم
الاخ منقذ و بو محمد لي عودة مرة اخرى ما بقرى ردودكم لين ما افضي 100% لاني متأكد ردودكم موفيدة 100%
وفقكم الله ورعاكم