السلام عليكم ورحمة الله
كيف الحال اخواني وخواتي الاعضاء….
طبعا العنوان واضح انا ستخرجت رخصة واجرت محل وبدات فتجهيزه لكن التكاليف طلعت فوق طاقتي ومحتاجه دعم مادي من غير ماادخل فدوامة البنوك ….
اللي يعرف شركات تبيع بالأجل ويدلني عليها بيسوي خير…..مشروعي متخصص فإكسسوارات الكمبيوتر والقرطاسية والطباعة والنسخ
ادعولي بالتوفيق

18 thoughts on “منويقدر يدلني على شخص يساعدني فافتتاح مشروعي الخاص”

  3. القرطاسيه تقدرين تنزلين بضاعه لموسم كامل بالكريديت , يعني تاخذين البضاعه وتبيعينها عقب تعطينهم فلوس وتاخذين فايدتج

    بس بهالحاله ماراح تحصلين على خصم كبير في قيمه البضاعه , بس ماعلي مشي عمرج في البدايه وحاولي فلوس الدخل أول كم شهر ماتصرفين شي منهن

    بس دفعي للعمال والاجار والكهربا والمصاريف الثانيه والباجي حطي في المحل وتطويره

    ومحلات القرطاسيه ربحها حلو وشغلها تقريبا طول السنه ماعدا موسم الإجازات (الربيع والصيف)

    وحاولي تركزي على شغل التقارير لأنه يزيد الدخل ومايكلفج شي , بس يبالج عامل شاطر ويظبط التقارير , وممكن بعد تسوون لوحات وفي بعد الحين شي يديد للمدارس بروجكتات مالت أي تي , وبالغالب تكون ورد واكسس واكسل , شغلات بسيطه لو العامل عندج عنده معلومات بسيطه في الكمبيوتر ممكن يسويهن وكل مشروع جيمته ماتقل عن 100 درهم

    وعندج بعد المجسمات ربحها حلو وتقدرين تخلين واحد من برع المكتبه يسويلها لج وعقب تبيعينها بدبل السعر , طبعا على حسب طبيعه المجسم نفسه

    وعليج بعد بخدمه الفاكس والتغليف الحراري والشفافيات

    اما اكسسوارات الكمبيوتر فلا تركزي عليها كثير حطيلج كمن كيبورد وكمن ماوس وكمن سماعه وشوي احبار مختلفه , وشوفي شو اكثر يمشي في المحل وبعد فتره بتعرفين شو اكثر شي لازم تركزين علي

    وإن شاء الله بتخبرلج عن الشركات الي تعطي كريديت بعد فتره 3_6 أشهر وأسعارهم حلوه وبردلج خبر في اقرب فرصه

    ونصيحه اذا ماحصلتي لو إدخلين حد وياج شريك منها يساعدج في المبلغ ومنها يخف ضغط المتابعه وتسيير المحل وبتتوفر عندكم سيوله بسرعه وبالتالي اذا حصلتوا فرصه في منطقه معينه بتقدرون تفتحون لكم فرع هناك

    وبالتوفيج إن شاء الله

Comments are closed.