صبحكم الله بالخير صبايا و شباب
اصبحنا و اصبح الملك لله
اكيد تقولون هاي شو موعنها نص الليل
بصراحه يعني و ترا الصراحه راحه ….انا ما رقدت لان كنت افكر 
ياخي موضوع شغل البنك ها مب عايبني …مع ان ما اسوي شي و دوامي متأخر و طول النهار مجابله منتديات …بس حاسه اني مب مستسيغه الشغله اللي ناوين يدربوني عليها << يمكن انا مب ويه شغل؟
هذا و الله اعلم!!
مع ان اونه حاطيني في مكان راقي في البنك و حركات و سخافه و اصلا حتى ماشي عندنا ضغط شغل و لا شي…الا مجابلين الكمبيوترات و فاجين حلوجنا
الموهيم
كنت انبش في النت و قدمت كم مكان حكوميات …..و شفت موقع فيه اشغال للمواطنين …اغلب الوظايف في بوظبي و يا عيني على الرواتب …يعني نحن هل دبي نستلم معاشات فراريش بوظبي 
الحينه انا ابا اتفجج من شغلة البنك هاي بس كل حد يقووولي تمي في شغلج << من هلي يعني
قلت بسوي خطه…خل يقبلوني مكان ثاني و بسير اداوم عندهم و اذا عيبني الوضع بستمر
يعني مب حاله هاي …كل يوم انا يا متأخره…يا شارده من الدوام..يا ظاهره من وقت…يا راقده في البيت و مسوتلهم طاف …
يعني موضوعي صعب للغايه
و الاخس من هذا << انا انسانه اصرصر على ضروسي و انا راقده يوم انضغط…و من اسبوع يايني ويع مب طبيعي في الاسنان..سرت عند الدختر و ما ظهرت فيه عله…خبرته عن موضوع التصرصير و سوالي اشعه..قال مافي شي بس ضروسج بدن يتآكلن و لازم تهدين اعصابج و الا بتروح ضروسج << حشى اللي يسمع يتحراني اضرب شيول كل يوم مب دوام هذا << و الا انا حساسه زياده عن اللزوم و انا مادري؟
على العموم انا كتبت الموضوع اولا افضفض
و ثانيا اشوف جان حد من الاعضاء و العضوات الكرام عندهم خبر ان في شغله مني و الا مناك حق اختكم الكريمه انا 
و ثالثا اللي مر عليه موضوع صرصرة الاسنان من قبل و يعرف له حل يخبرني ..لان الدختر قالي بسويلج ربله حق ضروسج تلبسينها و انتي راقده << بس مافيه على لوعة الجبد عسب جي مأجله الموضوع و ما خليت حبة بندول في البلاد ما صرطها 
و هاي سالفتي يطولي بعماركم ..و اللي عنده رمسه حية الويه يحطها و اللي عنده رمسه تغث يدق علامة الاكس اللي على اليمين << روحه قولوني يعورني مب متفيجه حق الضرايب << ابشركم بعد اليوم يتني اعراض القولون العصبي 
يعني ما باقي الا سكر و ضغط و روماتيزم و بعلن اني عيوز رسميا 
لحول متفيجتلكم تتضاربون في موضوعي
اقولكم خذو الموضوع اشبعو به انا ظاهره منه و لا اباه و لا برد له ..لو تحذفونه يكون احسن بعد << خلاص استلبست