الســـــــــــــلام عليكم ورحمة الله وبركاته
مرحبا يا جماعة الخيـــــــــــــــــر ….
بدخل في الموضوع على طول … بدون مقدمات ،،،
إذا كان عندكم يوم مفتوح في الدوام أو النادي أو المدرسة أو أي مكان ثاني
شو بتسوون في هاليوم من فعاليات وتكون مرتبة وعلى مستوى ….
يعني إحنا مفكرين نوفر لعبة درب الزلق و ركوب الخيل وبوفيه وخيمة تراثية وعرض اليولة ..( يعني أفكار مبدئية )
بس نبغي فعاليات للجنسين يعني تناسب الشباب والبنات يعني الطرفين لازم
نفعل دورهم في هاليوم … شو من أفكار واقتراحات تقدرون تساعدوني فيهــــــــــا للجنسين … ؟؟
والله يرحم من والديكم ما عندنا وقت يعني باجر لازم نبدأ
بالترتيبات الأولية ونبدأ بالحجوزات ودفع العربون …
ومشكـــــــــــــورين مقدماً ….
خلاص أخويه..
الأفكار تجمعت…بس تحتاي ترتيب وتنظيم…
وتتخللها بوربوينت..أو بانوراما..أي حركات بالكمبيوتر..
تعطي لمسات حلوه…ورائعه للحفل..
وبالتوفيق
بالنسبة للفعالية بتكون في حديقة وبستغل المساحة الموجوده في الحديقة
بيكون فيه عريش للحريم إلي يطبخن الأكلات الشعبية …
بنوفر ( stage ) للفعاليات إلي بنشوفها مناسبة إنها تنعرض على على هال ( stage )
بنوفر خيمة لتوفير البوفيه فيها ولتكريم عدد من المتميزين في الدوام .
بنسوي مسابقات وعليهن سحوبات بجوائز ..
هذي أفكار يلست أنا وكتبتها عشان أطرحها باجر إن شاء الله وعقبها بنرتب وبنوزع المهام
وبنحط جدول أكيد عشان كل شي يكون مرتب …
السلاام عليكم..
أخويه الحفل يجب أن يكون فيه..نوع من البانوراما التي تخدم المناسبة..
مسابقات..عن الشعر..وأجمل صورة..وأجمل تعليق لكارياتير..
الجانب التراثي..من قبل نادي التراث وهيئة أبوظبي للتراث(المجمع الثقافي)
الإتحاد النسائي…حريم يطبخن أكلات شعبيه..ويقومن بأعمال يدوية شرات التلي وغيره…
كورنر للطيور الصحراء الإماراتية…شرات الشاهين والصقر…
كورنر للصور اللي بتخدم المناسبة…
تعامل مع محل بالونات..يسوي لكم ديزاين للشعار..او للمناسبة اللي محتفلين بها..تخلق جو رائع..
وأي مساعدة ترانا حاضرين للطيبين..
أختك،،
بعطيك مثال اخوي ،،
كان عندنا يوم مفتوح برعاية جامعة زايد طبعا كانت الاجواء كلها بنوتية وسرنا جزيرة السمالية استعنا بنادي تراث الامارات ووفرولنا حرمتين يطبخون لنا الاكلات التراثية وكنا بعد مجهزين الكستنا والمارشميللو وهالسوالف وحلو انكم اتكونون منظمين يعني يكون عندكم برنامج لليوم المفتوح واذا كانت في منطقة واسعة واكثر من فعالية يكون في مسؤول او مسؤولين لكل فعالية المشاركين يرجعون له خلال اليوم المفتوح
انقسمنا جروبات وكل جروب كانوا محددين له هدف معين يخلصه في نهاية اليوم من اعمال يدوية تراثية او تجهيز برنامج الحفل في نهاية اليوم
طبعا موقع الفعاليات كان يساعد على وجود العاب مائية لان كنا ع الشــاطئ
مممم في فكرة انكم تسوون مسابقة اجمل صورة فوتوغرافية واتخصصون لها بورد بأسماء المشاركين والناس يتكرمون في نهاية اليوم
اذا كانت الفعاليات على الشاطئ ممكن تتعاونون مع نادي أبوظبي البحري وتسوون جولات حول جزيرة ابوظبي ( جربناها كانت روعة الصراحة )
اذا كانت في البر او في الصحراء عليكم بالدراجات واذا بتتوفر لكم خيول او جمال بيكون احلى
بالنسبة للبنات ممكن تسوون لهم فعاليات تناسبهم مثل الرسم على اليدين بالحنــا او احلى طبق تراثي
اذا بيكون مكس اتوقع المسابقات الثقافية بتكون مناسبة وايد
لا تنسون التوزيعات او الهدايا التذكارية مع التاريخ واسم الجهة اللي نسقت اليوم المفتوح كذكرى لكل المشاركين
اذا تذكرت شي برد اكتب لك وبالتوفيق ان شاء الله ،،
يعتمد على المكان والزمان وعدد الناس اللي متواجدين وكبر المكان
انت خبرنا كل شي ونحن بنساعدك
خبرنا وين المكان وشو الاعلانات اللي بتسوونها وجيه وهل المكان للعائلات هل هو كليه ولا مدرسة ولا شو بالضبط
في انتظار ردك