من أطرف ما صادفني في عالم المنتديات الإنترنتية .:. من تجوالي وقلمي .:.

.

كيف الحال جميعا؟ عساكم بخير؟!

المهم

موضوعي اليوم استمديته من خلال تجوالي بين المنتديات

.

لفت نظري أمس منتدى غريب

فيه قسم جديد ومبتكر وأول مرة أشوفه

نحن عادة عندنا في هالمنتدى وفي أغلب المنتديات اللي يخالف الشروط والقوانين على طول يقطعون له تذكره لسويسرا

وأشهر واحد ماخذ باند في منتدانا هو العضو “سحلول” وعائلته

طبعا سحلول مستوي أشهر من نار على علم في هالمنتدى

وصاروا يضربون فيه المثل في المواضيع المخالفة واللي فيها دعاية لمواقع أخرى

لكن في هذاك المنتدى الغريب ما يحظرونهم ولا يسفرونهم سويسرا

يا حيهم

مسويلهم ركن خاص ومسمينه “السجن”

دخلت القسم وأنا مستغربة

شفت ملاحظة بأن أي عضو مخالف يتم إيقافه ويسمح له بالمشاركة في هالقسم فقط!! والزيارة له مسموحة وتمر بواسطة الإدارة!!

وبعد ،

حصلتهم مثبتين فيه مواضيع

دخلت الموضوع الأول

صافين فيه أسماء أوائل المجرمين اللي في المنتدى وتهمهم!

ومدة محكوميتهم!

اللي يتحرطم وايد واللي يسب واللي واللي

عقب طلعت ودخلت علشان أشوف قوانين القسم

وبعدين خذت نظرة سريعة على عناوين المواضيع الموجودة فيه

فلانة تصرخ من خلف القضبان: أين أنتم؟!

طلعوني من السجن انتهت المحكومية!

أحتج!

إعدام العضو الفلاني شنقا!! —–< هذا الظاهر مستحيل يردونه لاحق أخونا سحلول الله يذكره بالخير!!

العضو الفلاني يطالب بالاستئناف!

ترحيب بالعضو فلان في السجن!! ——< الشماتة ببيزه

.

أسميني ضحكت وقهقهت على قولة الغالية “غلا بوخالد”

وتميت أتخيل نفس هالقسم في منتدانا!!

.

أتمنى تكون هالأسطر طريفة

ورسمت ابتسامة خلف الشاشة

وكل الأمنيات الطيبة للجميع

.