السلام عليكم و رحمة الله وبركاته …
بعد التحية،،،
يا إخوان ما أدري إيش أسوي ربيعي من أيام الطفولة هذه قصته:
راح أبدأ القصة من الزيرو ..
والد ربيعي .. وياه جواز حكومة الشارقة بالولادة وكان طبعا من سكان الشارقة .. وجاه عرض عمل “بقوة دفاع أبوظبي ” كل هذا الكلام قبل الإتحاد .. فإنتقل من الشارقة لأبوظبي ..
ولله الحمد صار الإتحاد .. – الله يديمه علينا- وبعد الإتحاد .. بسنة 1975 كان يوم ميلاد ربيعي في المستشفى المركزي بأبوظبي ووقتها كتبوا له على شهادة الميلاد وتحت بند الجنسية “الإمارات مؤقت”
فسألوا الموظف ليش كلمة “مؤقت” خبرهم يوم يسيرون ويبدلوا جواز حكومة الشارقة بالجواز الإتحادي بشلون هالكلمة. فقالوا بسيطة..
وساروا جوازات أبوظبي خبروهم نبي نبدل جواز السفر ونظهر خلاصة القيد…
وبدأت المعاناة..
خبروهم في جوازات أبوظبي إن جواز السفر صادر من حكومة الشارقة فلازم يبدلونه بجوازات الشارقة ..
فساروا جوازات الشارقة .. وهناك كان المفاجأة الثانية .. خبروهم لا إنتم وقت قيام الإتحاد كنتم ساكنين بأبوظبي وتشتغلون ويا حكومة أبوظبي فلازم عن طريق حكومة أبوظبي تبدلون الجواز ..
ردوا لجوازات أبوظبي .. فخبروهم لا .. هالكلام موب صحيح سيروا وقابلوا الضابط المسؤول بجوازات الشارقة .. وباجوازت الشارقة خبروهم لا سيروا وقابلوا الضابط المسؤول بجوازت أبوظبي
وبين الشارقة و أبوظبي .. ضاعت الطاسة ..
وصار عمرنا 34 سنة وربيعي للحين ما نحلت مشكلته .. تزوج وصار عنده عيال .. يعني أبوه وهو وعياله 3 أجيال .. وللحين ما نحلت المشكلة ..
وإلي زاد الطين بلة لحين أبوه تخطى سن التقاعد .. وبيتفنش ووقتها لازم يترك البلاد !!!!
وبما إن ربيعي ما حصل الجنسية فهو يتعامل معاملة الوافدين .. وراتبه على قده .. فما يقدر يتكفل بأكثر من عايلة .. فراح يتضطر يترك هو البلاد .. ويسافر ويا الشيبة وعائلته ..
يعني مواطن وعلى مدار 3 أجيال ما قدر يبدل الجواز ويتعامل معاملة الأجانب .. ولتكتمل المأسأة رأح يضطروا لمغادرة الديرة ؟!!!
صراحة حاولنا نساعده .. يعني سرنا الجوازات وقالوا مافي باليد حيلة لازم تيجي الموافقة من فوق .. سرنا ديوان سمو ولي العهد – الله يحفظه- لجهة شؤون المواطنين وقدمنا طلب وماصار شي من 2006 ورجعنا مرة ثانية نحاول وسرنا ديوان سمو حاكم الشارقة .. وهم نفس الشيء ما قدرنا نخلص الموضوع .. ومن يومها ونحن نراجع وقلنا أكيد لو يوصل الموضوع لشيوخنا – الله يحفظهم- ما بقصروا ويا الريال .. ترا ولله الحمد شيوخنا معروفين بعدلهم ..
لكن ما قدرنا نوصل لهم بالذات إن الوافد مايقدر يدش عليهم
فما أدري هل في حل أو أي شخص يقدر يتدخل؟ حاولنا نوصلها لعلوم الدار في قناة أبوظبي لكن ما قدرنا .. أو حتى تلفزيون الشارقة هم بعد نفس الشي ..
الوحيد إلي كتب عن الموضوع المبدع “ناصر الظاهري” بعموده بجريدة الإتحاد “العامود الثامن” .. لكن للأن ما صار شيء
هذا رابط الموضوع بجريدة الإتحاد ..
Al Ittihad ظ…ظ† ظ‡ظ†ط§آ·آ· ظˆظ‡ظ†ط§ظƒ! – ط¬ط±ظٹط¯ط© ط§ظ„ط§طھط*ط§ط¯
والله كريم وأعتذر عن الإطالة لكن من حرقتي لأنها كانت ممكن تصير ويا أي مواطن..
ومشكورين
الله يكون في عونه .
بسرد لك قصة واحد من الناس بيحصل على جنسية الامارات …. كان طال عمرك واحد من الاخوان يبا يحصل الجنسية وما خلى حد ما يعرفة وبحكم عمله كان يعرف ناس كثير في المجتمع وتم يروح عند هذا وعند ذاك وكل واحد يقوله فالك طيب وما يصير الا الخير وتم على هذي الحالة تقريبا 7 سنوات … وما خلى حد ما سار له …. في يوم من الايام وهو يالس في المسيد ومهموم من مشاكل الحياة …. وياه واحد من الشباب وهو يالس وقاله بلاك ابوي شو فيك مهموم وعليك علامات الحزن .. واصر عليه الشاب وقال له بالقصة كلها وانه ما خلى باب وما دقه ومل بصراحة وما يعرف شو الحل … المهم لما انتهى قال له الشاب ما دقيت باب رب السموات العلى …. الباب الرباني الي ما يتصكر ابدا هنا استغرب الرجل وفكر شوي ….. المهم قال له الشاب عليك بقيام الليل وصدقني لا تلجأ الا لرب العباد ويقول بعد 4 أيام من الصلاة رحت وكان يوم اربعاء … وسبحان الله يوم كنت ساير نفس المكان الي كل يوم يرجعوني سألت عن الاوضاع وفي نفس اليوم حددوا لي موعد للمقابلة … وبعد اسبوع قابلت اللجنة والحمد لله تيسرت اموري …. طبعا الحكاية هذي على لسان الرجل حكاها لي منذ تقريبا 3 سنوات .
ربي يسر أمره أن شاء الله
الله يكون في عونه ودعواتنا له ان شاء الله ربنا ييسر اموره ،
يا الله صدق مأساة ما اقول غير الله يكون في عونهم ويفرجها عليهم يارب
مشكور اخوي على النقل بميزان حسناتك
الله ايسر أمره ان شاء الله …واقع نعيشه للأسف..