السلام عليكم و رحمة الله وبركاته …
بعد التحية،،،
يا إخوان ما أدري إيش أسوي ربيعي من أيام الطفولة هذه قصته:
راح أبدأ القصة من الزيرو ..
والد ربيعي .. وياه جواز حكومة الشارقة بالولادة وكان طبعا من سكان الشارقة .. وجاه عرض عمل “بقوة دفاع أبوظبي ” كل هذا الكلام قبل الإتحاد .. فإنتقل من الشارقة لأبوظبي ..
ولله الحمد صار الإتحاد .. – الله يديمه علينا- وبعد الإتحاد .. بسنة 1975 كان يوم ميلاد ربيعي في المستشفى المركزي بأبوظبي ووقتها كتبوا له على شهادة الميلاد وتحت بند الجنسية “الإمارات مؤقت”
فسألوا الموظف ليش كلمة “مؤقت” خبرهم يوم يسيرون ويبدلوا جواز حكومة الشارقة بالجواز الإتحادي بشلون هالكلمة. فقالوا بسيطة..
وساروا جوازات أبوظبي خبروهم نبي نبدل جواز السفر ونظهر خلاصة القيد…
وبدأت المعاناة..
خبروهم في جوازات أبوظبي إن جواز السفر صادر من حكومة الشارقة فلازم يبدلونه بجوازات الشارقة ..
فساروا جوازات الشارقة .. وهناك كان المفاجأة الثانية .. خبروهم لا إنتم وقت قيام الإتحاد كنتم ساكنين بأبوظبي وتشتغلون ويا حكومة أبوظبي فلازم عن طريق حكومة أبوظبي تبدلون الجواز ..
ردوا لجوازات أبوظبي .. فخبروهم لا .. هالكلام موب صحيح سيروا وقابلوا الضابط المسؤول بجوازات الشارقة .. وباجوازت الشارقة خبروهم لا سيروا وقابلوا الضابط المسؤول بجوازت أبوظبي
وبين الشارقة و أبوظبي .. ضاعت الطاسة ..
وصار عمرنا 34 سنة وربيعي للحين ما نحلت مشكلته .. تزوج وصار عنده عيال .. يعني أبوه وهو وعياله 3 أجيال .. وللحين ما نحلت المشكلة ..
وإلي زاد الطين بلة لحين أبوه تخطى سن التقاعد .. وبيتفنش ووقتها لازم يترك البلاد !!!!
وبما إن ربيعي ما حصل الجنسية فهو يتعامل معاملة الوافدين .. وراتبه على قده .. فما يقدر يتكفل بأكثر من عايلة .. فراح يتضطر يترك هو البلاد .. ويسافر ويا الشيبة وعائلته ..
يعني مواطن وعلى مدار 3 أجيال ما قدر يبدل الجواز ويتعامل معاملة الأجانب .. ولتكتمل المأسأة رأح يضطروا لمغادرة الديرة ؟!!!
صراحة حاولنا نساعده .. يعني سرنا الجوازات وقالوا مافي باليد حيلة لازم تيجي الموافقة من فوق .. سرنا ديوان سمو ولي العهد – الله يحفظه- لجهة شؤون المواطنين وقدمنا طلب وماصار شي من 2006 ورجعنا مرة ثانية نحاول وسرنا ديوان سمو حاكم الشارقة .. وهم نفس الشيء ما قدرنا نخلص الموضوع .. ومن يومها ونحن نراجع وقلنا أكيد لو يوصل الموضوع لشيوخنا – الله يحفظهم- ما بقصروا ويا الريال .. ترا ولله الحمد شيوخنا معروفين بعدلهم ..
لكن ما قدرنا نوصل لهم بالذات إن الوافد مايقدر يدش عليهم
فما أدري هل في حل أو أي شخص يقدر يتدخل؟ حاولنا نوصلها لعلوم الدار في قناة أبوظبي لكن ما قدرنا .. أو حتى تلفزيون الشارقة هم بعد نفس الشي ..
الوحيد إلي كتب عن الموضوع المبدع “ناصر الظاهري” بعموده بجريدة الإتحاد “العامود الثامن” .. لكن للأن ما صار شيء
هذا رابط الموضوع بجريدة الإتحاد ..
Al Ittihad ظ…ظ† ظ‡ظ†ط§آ·آ· ظˆظ‡ظ†ط§ظƒ! – ط¬ط±ظٹط¯ط© ط§ظ„ط§طھط*ط§ط¯
والله كريم وأعتذر عن الإطالة لكن من حرقتي لأنها كانت ممكن تصير ويا أي مواطن..
ومشكورين
الله يعينهم
امثالهم وايدين وغير الي سحبو جنسياتهم بدون سبب والمشكله لا توجد جهه ممكن تراجعها
وغير ابناء المواطنات الي متلعوزين ويا امهاتهم
المواطن يمنح عياله وابناء الجنسيه
والمواطنه لا تمنح حتى ابنائها الجنسيه ؟؟؟؟!!!
الفلبينيه والروسيه في 3 سنيين تصير مواطنه وابناء المواطنات
الذين رضعوا الولاء من بنات الوطن وتربوا في الوطن يعتبرون في حكم القانون اجانب ؟؟؟!!
والي دخلت امس بتأشيره تعتبر مواطنه ؟؟؟!!
هل مقياس الولاء بالاوراق ؟؟؟؟
قبل الجواز تكون عنده هوية أو جنسية عبارة عن ورقة ما قبل الاتحاد اذا هاي مب عنده أظني مشكلة
بس هل عنده جواز سفر و الا وثيقة سفر الامارات تراه وايد عرب عطوهم وثيقة سفر و عقب طلبوا منهم يسلمونها للديوان مادري شو سالفتهم بس سمعت عن هالمواضيع
امارات مؤقت ما عطوه الا ما عنده الجنسية أخويه الي هيه الورقة الي خبرتك عنها
و يمكن بعد لظروف ما عرفها عن الريال لازم تبين اخويه اذا كان أبوه ما عنده الجنسية الي هيه الهوية فكيف بيحصلها الولد
انزين شو عن يده- جده وين جوازه و جنسيته
أنا أخويه أحاول أدرس الموضوع من كل نواحيه عشان نوصل لسبب عدم حصوله على الجواز و الجنسية
__________________
هلا خوي تراني ما سألته عن الهوية وبصراحة أنا نفسي ما أدري عنها
أنا بس إلي شفته جواز السفر مق حكومة الشارقة و شفت شهادة الميلاد المكتوب فيها الجنسية الإمارات..
بس أسأل لحين لو عنده جواز حكومة الشارقة مال الأول قبل الإتحاد .. يكونوا أصدروه بناءا على الهوية .. يعني جابوا بياناته من الهوية صح؟
انزين أخويه
هل ما عنده هوية الامارات قبل عندهم هوية عباره عن ورقة ينكتب فيها كل شي و عقب حولوا الهوية لبطاقة
اذا كان عنده تراه مواطن بس مادري شغايل ما حصل خلاصة القيد
المهم الله يعينه
خوي هو إماراتي بالأصل يعني هو ربيعي 34 سنة – مواليد المستشفى المركزي بأبوظبي- و أبوه حول 67 سنة – متخيل وياي موب هو أبوه – وياه جواز حكومة الشارقة بالولادة .. يعني أبوه مواليد شي وأربعين بالشارقة .. وهم من قبيلة الأشراف .. يعني من شبه الجزيرة … وأنا قابلت وياه ولاد عم أبوه جنسياتهم من الإمارات والكويت والسعودية .. يعني انت تعرف القابيل شلون تحصل نفس القبيلة بأكثر من دولة …. لكن هو ماعنده أعمام .. مشان كذا طريت ولاد عم أبوه …
__________________