السلام عليكم,
اليوم كنت ساير اتشرى من كارفور, وبالتحديد في راس الخيمة. واشوف واحد مواطن يالس يتشرى هو وخلنا نقول زوجته ( ما اريد اقول صديقته او “زميلة العمل”) اجنبية ولابسه مثل ما يلبسون السياح في وقت الصيف.
الحين شو بتقول عن هذا “الريال”. ان كانت زوجته شو من الناس الي ما يغار على مرته ومخلنها (فالتوه). وان كانت صديقته, ما يستحي على ويهه ويظهر وياها جدام العرب!
وطبعا مشيت عنه, وجان اشوف واحد ثاني مسوي نفس الشي!
شو بلاهم هالناس! لا يستحون من ربهم ولا من الخلق.
الله يهدينا ويهديهم.
الدين يحدث العقل والعاقل نحن لا نفصل بينهم بل نربط
وناخذ بالدين اولااااااااااااااااااااااا واخيرا
لا تخلط الامور اخوي سعيد رأيي واضح والدكتور فيصل استشهد بالايات القرآنيه ولم يأت بشيئ من عنده
اخوي العقلانية شي
والدين شي
الله نزل لنا شريعة واضحة
وهذا الشي مافية عقلانية وتشاور وراي افضل من راي
ولو كانت السالفة بالعقل
لكان مسح الرجل من اسفل اولى من مسح ظاهر الخف
من أمن العقوبة اساءالادب
لو محصل ناس تسدحة في الشارع وتمرغة بخيازرين ويحلقون لة راسة وحواجبة
هذيك الساعة بيعرف السنع
تعبنا وملينا من كثر مانتكلم والله
الدكتور الفاضل فيصل العفيف
صدقت نحن نحتاج للحلول والعلاج اكثر من اي شيء اخر ….
وأيضا نحتاج لآراء عقلانيه كنظرتك ونظرة اخواني مضارب مغامر واقتصادي إماراتي
ولكن هذه الامور جديده ودخيله على مجتمعنا المتحفظ وهذا ما يثير الكثير
في النفوس …
كل الاحترام والتقدير لصوتك الواعي المحايد العقلاني …
من زمان ما شاركت .. بس الموضوع والهدف الأسمى له غصبني اشارك
فالبداية لازم نتفق أن هالحركات اللي نشوفها من بعض الشباب المواطنين أو حتى العرب مخالفه لدرجه كبيره لتعاليم ديينا اللي نص على الحشمه والستر
والأعذار اللي يلتجأ لها بعض الشباب كثيره بخصوص هالموضوع واسمحولي ما بذكرها عشان ما تؤخذ بشكل خاطئ واتحمل وزر ذلك
لكن الحل فاعتقادي أن النصح والتوعيه هو جوهر الحل ، والنصح مب شرط أني أوقف الريال وأقوله اللي تسوييه يافلان غلط لأنه بيعاند ، لكن لازم تكون لنا طرق ثانيه للنصح ،
منها فتح هذي المواضيع والحديث عنها في مختلف وسائل الاعلام المرئية والسمعية والصحافه وحتى المنتديات
بعد في حل ثاني أني أحاول لما اشوف هالاخ وأكون ويا أهلي أني ارفع راسي بأهلي وانظر له بابتسامه فيها ما فيها من المغازي ، واظهر له أني شخص افتخر بثقافتي وعاداتي وانشرها فالاماكن اللي هو يعتقد بأنه “”فضيحه”” ان الواحد ينشرها فيها
والحلول كثيره وطرق التوعيه أكثر لكن علينا نفكر فيها ولانتبع دائما الطرق المعروفه .. وطبعاً لا نغفل النيه من هالعمل وهو النصح والدين النصيحه
……….
أما عن سالفة الريال اللي يالس في مكان الحرم فالعياده ويا ربيعته الآسيويه ، فكنت اتمنى لو كلمتي المسؤولين أنهم يطلعونه لأنه هني مب بس خالف العادات والاعراف ، بل هو خالف القوانين والانظمة في الاماكن العامه واللي ما يقدر يتعالى عليها لو استخدمناها ضده
…………
واتمنى من نفسي والجميع أننا ننظر لبلادنا بجمالها وايجابيات أهلها وأخلاقهم ، لا النظر إلى السلبيات والاخلاق الفاسده للبعض ويعمم هذا السلبيات اللي يقوم فيها فئة بسيطة من الناس على جميع أفراد أو عناصر المجتمع
والسموحه عالاطالة