بقولكم اليوم قصتي مع الطبخ.. أول يوم تعلمت فيه الطبخ بشكل إجباري. موقف في حياتي ما بنساه. صادف أول يوم رمضان وأول رمضان كنت اقضيه في الغربة وبعيد عن الأهل. كان يوم دراسي عادي والدوام لين الساعه 3 العصر وكنا نتريا ضيف يزورنا من ولاية ثانية بنفس اليوم.
كنا 4 شباب و ولا واحد فينا يعرف يطبخ ما عدا سوالف همبرجر والبيض. فواحد من الربع اتصل في والدته يوم قبل وكتب طريقة تحضير ومقادير صالونة دياي وعيش بالتفاصيل المملة عشان تكون الوجبة مميزة لأول يوم رمضان وخاصة كان بيينا ضيف وريال كبير فقلنا لازم نفطره شي عدل. وبنفس الوقت صادف موعد لـ 3 من ربعي في اول يوم رمضان بعد الدوام الدراسي . قام ربيعي عطاني طريقة التحضير وشرح لي على السريع على اساس اني اطبخ وهم بيروحون الموعد…وهقوني وطلعوا..
المهم بديت بالتحضيرات وجهزت الدياي..ومشيت خطوة خطوة حسب المكتوب في الورقة..وحسب التوقيت المكتوب… نص ساعه افور العيش..ماشي التزم نص ساعه بالضبط ولا دقيقة زيادة..طبقت كل الامور المكتوبة في الورقة..وخلصت قبل الاذان بدقايق ووصلوا الشباب تقريبا نفس الحزه ويا الضيف..فرشنا السفرة ع الارض…ونزلنا الاكل ع السفرة..وغرفنا العيش..كل واحد يطالع الثاني لان العيش كان غادي شكله هريس..طبعا ريحة الصالونة فايحة في السكن بكبره..دخل وقت الاذان والشباب ماشي بالخمس على الاكل…من اليوع كلنا العيش ..لكن الصالونه طلعت ضابطه 110% حتى ربيعي قالي ضبطتها احسن عن الوالده..
بعد ما احلوت السالفة..قمنا نطبخ يوميا..تحدي امبينا كل يوم اللي يطبخ احسن وشي يديد (بعد الاتصال بالاهل طبعا واخذ المقادير)..وريحة الاكل ماشي..فايحة الين اخر السكن..وبعد التطورات..وصلنا نسوي مجابيس ودياي مبخر بالفرن على الطريقة السعودية..لا ونتفنن بالبهارات وطريقة الطبخ ومقادير تأليف..طبعا اللي ما كان يعرف يطبخ..يغسل المواعين..عقاب.
وبعد مرور 9 سنوات على العودة..تبخرت كل الخبرات في الطبخ وتبخرت معها ماجستير علوم الطبخ..لكنها كانت تجربة حلوة..صدق الغربة تعلمك وايد أشياء وأهمها الاعتماد على النفس..ياما نظفنا وياما كنسنا..والشي اللي ساعدني وايد اني ما اواجه صعوبة في الاعتماد على النفس..عدم وجود بشكارة بالبيت من صغرنا لين ما كبرنا…وهذي قصتي مع الطبخ الإجباري.
مع تحياتي
الشيف أحمد
اذا محتاجيني اقدم برنامج منافس للشيف أسامة..ما عندي مانع 
الحمدلله طبخت لين ماقلت بس ايام الجامعه والحمدلله ماغسلت صحون الغسيل على الشباب الباجين احمد انا وياك بنقدم برنامج شو رايك بنغلب البنات تشااااااااااااااو
موضوع حلو و الله …هيه و الله ذكرتونا بايام اول ..ايام التونه بالعيش اللي بدايتها يطلع العيش لين تقول هريس مب عيش و بعدين عاد اطورت العزبه قمت اسوي مجبوس و صالونه و لا قمت اسوي برياني ربيان ما ياخذ نص ساعة عاد اسويت خبير …ايام حلوة ليتها ترد …بالعافيه عليكم ان شالله و رمضان مبارك …تحياتي شيوخي
ذكرتوني بايام الغربه على المسنجر و المقادير ان لاين بالصوت و الصوره ههههههههه يلين ما قمت اضبط الاكل
وفي الاعياد قمنا نتفنن ونسوي الهريس وشغالين ظرب به في الدرل هههههههههههههه
ذكرتونا بايام والله ايام روعة و احلى شي مستحيل حد ينتقد طبخك لان ماشي غيره و غصب بياكلونه و طبعا اول ايام الطبخ تجارب على كيف كيفك بس عقب قمنا نظبط الاكل صح والله احيد ان اخر التطورات كنا نشتري ذبايح و نسويهن