السلام عليكم ورحمة الله وبركاته
شحالكم اخواني
انا اليووم فاتح هالموضوع بسبب المواقف السخيفه (المرض) الي قامت تتكرر ..
والهدف من الموضوع … انه الي يشوف نفسه من هالنوع يتقي ربه وما يضيع حقوق الناس وترا الله بيحاسبه ..
طبعا اغلبكم يعرف عن موضوع برامج النوكيا ..
انا اسوي البرامج واطرشها حق الي يطلبها و يجربها اذا اشتغلت يحوّل لي قيمة البرنامج عن طريق الرصيد ..
فكرة الموضوع عشان اقضي وقت الفراغ في شي مفيد .. انا استفيد منه وافيد غيري .. انا أقدر اسويها ببلاش ، بس اذا سويتها ببلاش طبعا الكل بيطلب ومابيكون عندي وقت اسوي حق كل حد .
المهم شوفو المواقف الي مرت عليّ :
الموقف رقم 1 : يطلب كم من برنامج مثلا 4 برامج .. وآخر شي يطرش لي جيمة برنامج واحد .. ليييش ؟؟ لأن البرامج الثانيه شاف انه ما يستعملها أو ما عيبته .. يعني يت على حسابي .. مع اني موضح كل برنامج شو شغلته ومتأكد من شغل البرنامج .
الموقف رقم 2 : طبعا هالموقف طبيعي : اني اطرش البرامج ومن عقبها طااف ولا كأنه استوا شي .
الموقف رقم 3 : يطلب البرنامج ويستقبل وكل شي تمام وآخر شي مايطرش جيمته … ليييش؟؟ لأن البرنامج طلع انجليزي بس ! مع اني كاتب في الموضوع انه البرنامج ( انجليزي فقط ).
الموقف رقم 4 : الصراحه موقف طرررر بمعنى الكلمه .. انا مسوي عرض قبل يومين انه كل البرامج بـ 60 .. وآخر شي اييني واحد من الي طلبووو وطرشت لهم ويقول انا مابا كل البرامج .. ابا 4 ولا 5 برامج بس وبحول لك 20 ولا 15 .. يعني يسوي عرض فوق عرضي على كيفه ههههههههه … المشكله اهنيه اني جذي انا بظلم الباجيين الي طلبو مني 4 ولا 5 برامج والجيمه طلعت عليهم 60 ولا 70 درهم …
يعني مثل الي يشتري صندوق فيه 10 عطور بـ100 ويقول حق راعي المحل بسير اييب البيزات وبييك .. وعقب ايي حق راعي المحل ويقوله بس عطرين عيبوني .. اندوك 20
——————
.. الحمدلله الخير وايد وانا مب محتاي للرصيد يعني مافرقت وياي طرش ولا ما طرش .. بس انه يطلب وهو يعرف انه بيذلني او ما بيدفع لا يطلب لان شي ناس غيره تستاهل ومحتايه للبرامج وأنا مب بطالي يعني طول الوقت يالس ع الكمبيوتر وماعندي شغل .. يعني انا انسان عندي اشغال ثانيه مهمه حالي من حال اي انسان ثاني .
وشي ناس يزاهم الله الف خير .. يطرشون جيمة الي يطلبونه وزياده ..
الزبده من الموضوع:
أي حد بيطلب أي شي من أي موضوع يحط في باله انه الشخص الي بياخذ عنه مب بطالي وماعنده شغل غير انه يالس ع الكمبيوتر وبيبيع الغرض الفلاني !! أكيد عنده اشغال ثانيه
واذا يعرف انه ماله حايه في الشي الي بيطلبه ليش يطلبه واخر شي تيي على حساب البايع ؟؟ يضيع وقته وشغله ع الفاضي
ما أقوول غير الله يهديهم … انا ما كتبت هالموضوع الا بسبب تكرار هاي المواقف .. مب بس في الموضوع الي تكلمت عنه .. في المواضيع الثانيه بعد .
والسموحه من الكل .. و الي حاس اني ماخذ حقه يراسلني ع الخاص وفاله طيب.
الي يبا يناقش اي نقطه حياه الله ..
وبصراحه ليعجز القلم عن التعبير عن المشاكل التي تدور بين الأعضاء الكرام ومنها البخس بالبضاعة المطروحه أو التقليل منها أو الرد باسلوب غير حضاري ، ولذا الحد من هذه المواقف تكون بيد العضو نفسه ولا يمكن ايقاف جميع الاعضاء لهذا السبب ولكن هناك اسلوب يجب ان يتبعه العضو وهو إما الرد على الموضوع بالدعاء له بالتوفيق أو عدم الرد على الموضوع و يكتفي بالمرور على الموضوع فقط ولذا اتمني من جميع الأعضاء الكرام التعاون للحد من هذه الظاهرة المنتشرة بالكثير من المنتديات ووضح حد لهذا الظاهرة
الله يوفقك ان شاء الله
نصيحة لوجه الله
( أعط كل ذي حق حقه )
( نام وأنت مظلوم ولا تنام وأنت ظالم )
الله يعافييك الغالي
شو بنقول غير الله كريم
ومشكوور اخووي على وقتك
لا حول ولا قوة إلا بالله.. فعلا في ناس ما تخاف من ربها..
الله يعطيك ع قد نيتك.. ويوفقك ويرزقك الحلال..
انت ريال والنعم
انا ماتعاملت وياك بس من اسلوبك وطرق عرضك احس بهالشي فيك والله انها مب مجاملة
بس ياخويه نصيحه
اي حد يوم بيطلب منك شي
خله يطرش الرصيد قبل وعقب طرشله البرنامج