مواقف يوميه … تعالو وشاركونا

140 thoughts on “مواقف يوميه … تعالو وشاركونا”

1. موقف حلو في الدوام

   كنا مسوين برنامج تهادوا تحابوا بين الموظفات فقط ومسوينه قبل العيد

   كل وحدة تسحب قرعة بالاسم اللي تهديه وبعد العيد كل وحدة تستلم هديتها

   القصد من الهدية مد جسر التواصل والمحبة بين الموظفات وتكون هدية متواضعة غير مكلفة

   لكن انصدمت ان الهدية اللي وصلتني كانت فخمة جدا جدا ومن أفخم الهدايا الموجودة

   وشعرت بالخجل الشديد يوم استلمتها ويوم عاتبتها ليش كلفتني على نفسج؟

   قالت لي: إن لي معزة خاصة عندها وكانت ننتظر الفرصة المناسبة اللي تهديني فيها

   واعتبره من أحلى المواقف اللي مريت فيها مب لقيمة الهدية لكن لمعرفة قدري عند هالانسانــــــــــــــة

2. صبحكم الله بالخير

   ….

   بصراحه متردد أقول هالموقف اللي شفته وماادري يصح أقوله ولا مايصحش..

   بتوكل على الله واقوله ومأعتبرها سالفه كثر مااشوف انه شي يحز بالنفس ويبيله حل ..

   قبل فتره كنت بدوله عربيه وكنا ساكنين بفندق من افخم الفنادق على اساس انه بيكون نظيف من

   السوالف والخرابيط..

   المهم ما لكم بطوالها نزلنا انا وأختي اللوبي الساعه 10 تقريبا وطلبنا كابتشينو وقعدنا نسولف

   وشوي شفت شابين خليجيين قعدوا بالطاوله اللي جنبنا وصاروا يتلفتون وكل شوي

   يكلمون بالتلفون كانهم ينتظرون حد ومب عارفين شكله ..

   المهم بعدها بشوي جاهم رجال شايب من نفس هالبلد وسلموا عليهم بحراره وقعد معاهم

   وبعدها بشوي هالشايب جاه اتصال وراح عند باب الفندق ينتظر حد..

   وانا بهاللحظه بدأ الفار يلعب بعبي وقلت لاختي أقص أيدي من لغاليغها أذا ماعندهم صفقه

   قالت لي لا ياشيخه حرام عليكي الشايب باين عليه وقور … قلت لها أيه صح باااين وقور حيييل ..

   و تشوفين اذا ماطلع كلامي صح .ووالله ماخلصت كلامي إلا ثنتين لابسات عبايات استقبلهم الشايب

   وجو عند الشباب وسلموا عليهم والمصيبه انهم فصخوا العبايات حطوها على الكراسي

   يعني كانت العبايات تمويه وهم اصلا مب خليجيات!! وليتهم حلوات والله كل وحده خشتها أخس عن الثانيه ..

   المهم دار بينهم نقااااش طويل وانا من قهري لفيت الكرسي عليهم وصرت اطالعهم ابيهم يستحون

   والله ولا حيا ولا مستحى ..

   وقاموا راحوا عند المصاعد على اساس بيطلعون فوق لكن السكيورتي منعهم والله استانست انه منعهم

   على الأقل الواحد يضمن نظافة الفندق من هالبلاوي .. لكن بنفس الوقت زعلت على حالهم ..

   المهم أخذوا البنات وطلعوا برى الفندق..
   …

   الليله اللي بعدها نزلنا انا وأختي الساعه 11 وانا نازله كنت أمزح وأقولها أخرتينا راحت علينا الصفقات ..

   وقعدنا باللوبي كالعادة ووالله بعدها بشوي إلا نفس الشايب و هالمره 3 شباب وبنتين غير البنتين اللي

   قبل ولابسين عبايات بعد.. والله صرت هالشكل يعني هذا مصدر رزق الشايب.. !!

   لاحول ولا قوة إلا بالله ..صدق يالله حسن الخاتمه ..

   والله أني زعلت من كل قلبي على حالهم ..

   خساااره صددق صددق خسااااره إذا هذا حال شبابنا .. مو الكل طبعا..

   ….

   (لو في هالقصه أي شي يخدش الحياء أتمنى حذفها ) وترى هذا كله وهي مقصوصه بمقص الرقابه

   والسموحه منكم

   …

3. اليوم استوالي موقف في الفستفال سيتي

   وما كنت اعرف في مكان الدفع بفلوس

   لان مكتوب خدمة صف السيارات

   وقفني وقالي نوقف قلت له لا بروحي بوقف (ما اظمن سواقة المهنده) وبعد ما وقفت وتحوطت بالمركز

   ويوم رجعت اشوفه يا عند سيارتي قلت يمكن مب ياي عندي وتجدمت
   قالت لي الحرمة يسجل رقم سيارتك

   ووقفت
   قلت له شو؟!
   قالي 17 درهم مال باركنق

   قلت له وشدراني انه بفلوس

   وللحين انا احس انه مب بفلوس
   لان ماشي لوحات ولا اي شي يدل انه بفلوس

   
   هلا أخوي

   ” RaK_BoY ”

   أتوقع إنك موقف في الباراكات التابعه للفندق

   لأنه باركات المركز نفسه ،، مب بفلوس !!
   

   __________________

4. قهرتني حركتهن .. صدق قليلات أدب

   عيل بقولج شي بيخليج صدق تنقهرين. هالشي توني تذكّرته و هو السبب من ذكر ربيعي للسالفه.

   يقولي إنه يوم عطاها الـ 100 بغت زياده، فـ خذ الـ 100 و عطاها 500.

   قالتله: “بسسس ؟”

   فـ الحبيب إنقهر من هالكلمه. يعني السالفه بكبرها ما قهرته كثل ما قهرته هالكلمه.

   و على طاريها يوم لحقته بالسياره، تذكّرت سالفة واحد من الربع.

   بقولكم إياها عقب، نبغي نعطي المجال للاخوان.
   __________________

5. البارحه صار ويايه موقف مع طالبتي،،..

   كنت مسويه لهن امتحان عملي ومن كثر ماني حريصة أنه الطالبات ايسفن شغلهن كل شوي اقول سيفن شغلكن على الدسك توب ومتحمسه وحللي بالاخير يوم خلصن الامتحان قلت لهن يلا روحن على الدسك توب ( بدل الصف ) نقعن عليه ضحك..

Comments are closed.