مواقف يوميه … تعالو وشاركونا

140 thoughts on “مواقف يوميه … تعالو وشاركونا”

1. سوالفكم عجيبه

2. خلوني اشارك وياكم في هالموضوع

   استوى لي موقف امس .. اعاد لي ذكريات ما احب اتذكرها هههه

   مريت البنك بسحب فلوس .. السيارات كانت واقفه جدام البنك في المواقف .. انا ييت ووقفت سيارتي ورى السيارات اللي في المواقف .. يعني سكرت على سيارة من السيارات .. على اساس اني بنزل بسحب فلوس بسرعه وبرجع احرك السياره

   اول ما نزلت .. من السياره واتجهت صوب البنك .. لاحظت ريال شيبه متجه للسياره اللي انا سكرت عليها .. طبعا انا ما كنت بوقف او برجع للسياره كنت عادي اخليه يتريا كملت مشي بسرعه بس فجأه وقفت ..

   اكتشفت ان هذا الريال .. كان يدرسني أحياء في الصف الأول الثانوي

   التفت له .. وهو كان عاطني ظهره .. وكانت بينا مسافه يمكن ثلاث امتار ..

   فقلت بصوت عالي .. استاذ احمد !

   التفت شوي شوي .. لأنه شايب يحليله

   كان يطالع يمين ويسار يدور منو اللي قال اسمه ..

   قربت منه و سلمت عليه باليد .. قلتله تعرفني ؟ انا فلان .. تذكرني ؟

   سكت شوي وابتسم .. قالي ابن فلان ! اخو فلان !

   طبعا هو يتذكر اخويه الأكبر لأنه كان مدرسنه بعد .. اخوي الأكبر كان واحد دحيح يذاكر لازم بيذكره .. اما العبد لله فما كان يخصه في شي اسمه كتب ولا مدرسه

   قلتله هيه انا فلان .. قالي ازيك يا ابني وخذني بالحضن

   هذا الاستاذ كان يائس من حالتي .. كانت العلاقه بينا سيئه جدا .. لا هو يطيقني ولا انا كنت احب اشوف شكله حتى وبينا مشاكل تقريبا بشكل دايم .. كان يشتكي عليه عند مدير المدرسه ! بدل ما الطالب يشتكي على المدرس .. المدرس هو اللي كان يشتكي >> احم خلونا ساكتين عن الفضايح ههههه

   كان اول ما يدخل الصف وفي خاطره يضرب حد من الطلاب .. يستلمني انا ! لأني كنت يالس في اخر الصف .. و كنت في الحصة .. اما اكمل اكل .. او اذاكر لامتحان .. او اكتب واجبات .. او اسولف واضحك .. او اني اصلا ما احضر الحصة .. يعني حصة الأحياء بالنسبه لي كانت وقت فراغ اخلص فيه اموري

   كان يقول لكل اللي يعرفهم .. ان هذا الطالب مستحيل ينجح .. وكان ينجحني بالعافيه في الأحياء يعني شوي وبسقط

   المهم .. قالي ياااه انا ما شفتك من هذيك السنه .. يمكن من 15 سنه .. سألته عن احواله قالي انا تقاعدت من زمان والحين مرتاح .. وعياله خلصوا دراستهم واشتغلوا وفي منهم عرسوا و انه استوى جد

   سألني انت شو سويت .. قلتله تذكر هذاك الطالب .. درس هندسه و خلص الماجستير .. يحليله دمعت عينه وابتسم وحضني مره ثانيه

   الصراحه حسيت ان الدنيا صغيره بعد هالموقف .. و حتى لو كانت بيننا وبين اي حد مشاكل حسيت انها ما تسوى لأنها صغيره بالفعل .. و مع مرور الوقت المفروض اننا ننسى ولا نخليها في خاطرنا

3. للرفع

4. 
   صبحكم الله بالخير
   

   ….
   
   بصراحه متردد أقول هالموقف اللي شفته وماادري يصح أقوله ولا مايصحش..
   
   بتوكل على الله واقوله ومأعتبرها سالفه كثر مااشوف انه شي يحز بالنفس ويبيله حل ..
   
   قبل فتره كنت بدوله عربيه وكنا ساكنين بفندق من افخم الفنادق على اساس انه بيكون نظيف من
   
   السوالف والخرابيط..
   
   المهم ما لكم بطوالها نزلنا انا وأختي اللوبي الساعه 10 تقريبا وطلبنا كابتشينو وقعدنا نسولف
   
   وشوي شفت شابين خليجيين قعدوا بالطاوله اللي جنبنا وصاروا يتلفتون وكل شوي
   
   يكلمون بالتلفون كانهم ينتظرون حد ومب عارفين شكله ..
   
   المهم بعدها بشوي جاهم رجال شايب من نفس هالبلد وسلموا عليهم بحراره وقعد معاهم
   
   وبعدها بشوي هالشايب جاه اتصال وراح عند باب الفندق ينتظر حد..
   
   وانا بهاللحظه بدأ الفار يلعب بعبي وقلت لاختي أقص أيدي من لغاليغها أذا ماعندهم صفقه
   
   قالت لي لا ياشيخه حرام عليكي الشايب باين عليه وقور … قلت لها أيه صح باااين وقور حيييل ..
   
   و تشوفين اذا ماطلع كلامي صح .ووالله ماخلصت كلامي إلا ثنتين لابسات عبايات استقبلهم الشايب
   
   وجو عند الشباب وسلموا عليهم والمصيبه انهم فصخوا العبايات حطوها على الكراسي
   
   يعني كانت العبايات تمويه وهم اصلا مب خليجيات!! وليتهم حلوات والله كل وحده خشتها أخس عن الثانيه ..
   
   المهم دار بينهم نقااااش طويل وانا من قهري لفيت الكرسي عليهم وصرت اطالعهم ابيهم يستحون
   
   والله ولا حيا ولا مستحى ..
   
   وقاموا راحوا عند المصاعد على اساس بيطلعون فوق لكن السكيورتي منعهم والله استانست انه منعهم
   
   على الأقل الواحد يضمن نظافة الفندق من هالبلاوي .. لكن بنفس الوقت زعلت على حالهم ..
   
   المهم أخذوا البنات وطلعوا برى الفندق..
   …

   الليله اللي بعدها نزلنا انا وأختي الساعه 11 وانا نازله كنت أمزح وأقولها أخرتينا راحت علينا الصفقات ..
   
   وقعدنا باللوبي كالعادة ووالله بعدها بشوي إلا نفس الشايب و هالمره 3 شباب وبنتين غير البنتين اللي
   
   قبل ولابسين عبايات بعد.. والله صرت هالشكل يعني هذا مصدر رزق الشايب.. !!
   
   لاحول ولا قوة إلا بالله ..صدق يالله حسن الخاتمه ..
   
   والله أني زعلت من كل قلبي على حالهم ..
   
   خساااره صددق صددق خسااااره إذا هذا حال شبابنا .. مو الكل طبعا..
   
   ….
   
   (لو في هالقصه أي شي يخدش الحياء أتمنى حذفها ) وترى هذا كله وهي مقصوصه بمقص الرقابه

   
   والسموحه منكم
   
   …

   اقول دقيقه بنادي كبير يسوي لج باند … شو هالكلاام الخادش للحياء

   امزح

   أرف صراحة .. هاييل مايفكرون باجر يوم بيلاقون ربهم

   الله يهديهم ان شااء الله

   __________________

5. موقف حلو في الدوام

   كنا مسوين برنامج تهادوا تحابوا بين الموظفات فقط ومسوينه قبل العيد

   كل وحدة تسحب قرعة بالاسم اللي تهديه وبعد العيد كل وحدة تستلم هديتها

   القصد من الهدية مد جسر التواصل والمحبة بين الموظفات وتكون هدية متواضعة غير مكلفة

   لكن انصدمت ان الهدية اللي وصلتني كانت فخمة جدا جدا ومن أفخم الهدايا الموجودة

   وشعرت بالخجل الشديد يوم استلمتها ويوم عاتبتها ليش كلفتني على نفسج؟

   قالت لي: إن لي معزة خاصة عندها وكانت ننتظر الفرصة المناسبة اللي تهديني فيها

   واعتبره من أحلى المواقف اللي مريت فيها مب لقيمة الهدية لكن لمعرفة قدري عند هالانسانــــــــــــــة

   حلوووووو اختي عود معطر .. ذكرتيني يوم كنت مشاركة فصيف أفنان فجمعية المرأة
   قبل 3 سنين أعتقد ..

   ودونا رحلة لـ دبي من بوظبي
   وفالدرب كان كله فعاليات أذكار الصباح بعدين تريقنا بعدين لعبنا .. ونفس الشي سحبنا أسامي وفطريق الرجعة كل وحده تييب هديتها ..
   هديت وحده ماعرفها و وصلتني هدية من وحده ماعرفها ..
   وهذا كان سبب انه نتعرف ع بعض ونحب بعض فـ الله ..

   والعجيب العجب انه من قريب اكتشفت أنه “ســاريـة“
   كانت من أبلاتنا فـ صيف أفنان وكانت معانا فالرحلة =)

   يعني أبلتي فالواقع و فالمنتدى =)
   ربي يحفظها و يحفظكم ..

   __________________

Comments are closed.