السلام عليكم
ابا اتكلم عن موضوع بصراحه في خاطري من قبل و موضوع عليه ريفرش في المحاكم بشكل يومي ..!!
و اصبح شي معتاد و الواحد الي يعاني من هالقضيه او ضحيه ما يحب يسمع الطاري او اسمه …
باختصار عقد عقول البشر …
موضوع الطلاق
كل يوم و في الامارات و انا اعرف ناس و يخبروني انه الطلاق يستمر بشكل يومي في الامارات و في المحكمه اغلب القضايا طلاق !
بصراحه انا كنت ضحيه في هالموضوع و ما كنت اتوقع انه السالفه مأثره فيني بشكل كبييير و تعقد الامور بشكل كبير
يعني بصراحه
اقول لو اول يوم اطلق حرمتي ؟
لو زلت و عصبت و طلقتها ؟
لو حصل سوء تفاهم و طلقتها و خلاص ماروم اردها !!
لو و لو و لو
اكيد الكل يقول هالشي او اغلب الي عايشين هالجو الكئيب الي حتى مأثره بأكثر من شخص
يعني مثلا
ريال و حرمته و يابو عيال و كل شي و سوء تفاهم دون تفكير عقلاني..
طالق ..طالق ..طالق
ما يفكر!!
طلق حرمته و يتحرى الدنيا بخير
باجر الحرمه تقول ابا عيالي و الابو يقول ابا عيالي ..
والعيال محتارين
الابو يقول في المحكمه اختارني …و الام تقول في المحكمه اختارني
و طبعا وقتها من صغرك تحس انه العالم كله ضدك
وما تعرف ترضي منو
الابو ولا الام ؟ خاصه انه بعده صغير و ما يفهم !!!
آخر شي العيال يروحون للأبو ..يعيشون حياتهم عاديه بس كل اسبوعين يسيرون للوالده يومين !! و يردون
عقب يوم يكبرون ما يشوفون امهم الا فالسنه مره يمكن او فالشهر مره او مرتين !!
طبعا هالشي ما بيأثر لا في الابو و الام بس !!
اول الضرر سمعة البيت !!
ثاني شي الاولاد !! و احساسهم بفقدااان شي كبيير في البيت سواء ً كان عايش وي الام او وي الابو ؟
الابو ما بيقدر يمسك عيال الا بحرمه ولو فكر يعرس معروف الحرمه تتلاوت و العيال ما باهم و لا يا انا و لا يا العيال !!
في كلا الحالتين اكبر ضرر بيطيح في حياة العيال !!
الي بيروح و محد سائل عنه !
و الي بيرد البيت سكران عزكم الله
والي يتاجر مخدرات
والي يتحرش في خلق الله
والي يظارب يمين ويسار و يدخل قضايا لا اول لها ولا تالي
والي ما يعرف ربه
طبعا ً مب الكل ..
بس ها الضرر المعروف الي بيكون على العيال لو تم فالنص و الابو في صوب و الام في صوب
شو اسباب الطلاق في رايكم !!!
وليش الواحد ما يحاول يفكر و يتأكد من كل شي قبل !!
في ناس تفهم غلط حار بحار طالق !!
ليش !!
ناس يحبون بعض و اتطلقو و ندمو بقوووه !!
لانه الي يرووح مره لا تتحرى بيرد بسهووووله و الكل يعرف الشرع و الاسلام
الي يطلق لازم حرمته تعرس مره ثانيه و عقب لو طلقت اتردله !!
طبعا مب كل مطلقه تقدر تعرس و مب كل مطلقه عقب العرس بتدور الطلاق
والي يرتب الامور تزوجي فلان و طلقيه نفس الوقت معروف حرام و اكبر حرام !!
وقتها الندم ما يفيد !!
اول شي تضر نفسك و نفسيتك
و تضر نفسيتك و نفس الحرمه
ثالث شي تضر سمعة بيتك و بيتها و خاصه لو كانت من هلك
ورابعا ً تضر عيالك
شو الاشياء الي بتقل من الطلاق !!
انا شدني موضوع من الاعضاء الي الحرمه تقول لريلها يالثور جب و مالك خص و البقره !!
اغلب الاسباب سوء تفاهم
يعني مثلا لو حرمتك سبتك بس بروحك مب يدام الناس بتطلقها على طول
الي يعرف انه الحرمه ناقص عقل و دين و نفسيتها تتعب شهريا ً لامورها الشخصيه و ارهاق و غيره و تتضايج و يمكن تسب و خاصه بعد الحمل امور كثيره تخلي البنت تعصب و تقول كلام ابدا ً هي ما تقصده !!
فليش الاستعجال ؟؟؟؟
يعني مثلا تبا غيرها لا تستحي عرس الثانيه ترا الريال كلمته وحده !
على العموم
شو اسباب الطلاق !؟
و الي فاهم فهالامور اغلب اسباب الطلاق شو ؟؟
سوء تفاهم , شك , احساس بالاستعجال , الزواج في سن صغير .او التوتر او العصبيه او سبب الحرمه او الريال !!
وكم نسبة المطلقين و المطلقات في الامارات ؟؟
شو حلول ايقاف هالظاهره ؟؟
انا اشوف لو يسوون محاضرات عن الطلاق و اسبابها او دوره عشان الرياييل الي مب فاهمين البنات يعرفون الظروف و فترة الحمل و ما بعد الحمل و قبل الحمل و فترة الزواج و الظغوطات
وانه الزواج ابغض الحلال
يعني الضحايا لازم يعلمونكم هالشي غلط ؟؟؟؟
انا انسان الحمدالله مافكر لو اتزوج اطلق او اعرس فوق حد لو كانت الحرمه زينه بس خوفي و يا كل خوفي هالموضوع يأثر علي سير حياتي سواء ً شك او طلقه اولى و لا نص طلقه
بس حاب اقول الطلاق يأثر بشكل كبير على الي من حواليك و الله يحاسبك عقبها على كل شي
على ترك عيالك ! و اهمااالهم …و و و و
الزواج نص دين و ما دام انك صابر في البيت مع حرمتك متفاهم او فيه سوء تفاهم ياخي ( و اهجروهن في المضاجع ) 
ردها بيت هلها سبوع سبوعين شهر بس لا تطلق !!
البنت تتعلم و البنت الي تحب ما تقدر بدون ريلها يوم واحد وترد ندمااانه و تصلح اخطااااء كثيره
والله يكون في عون الجميع يارب
السموحه ثقلت عليكم
السلام عليكم ورحمة الله وبركاته
شكرا جزاك الله خير
موضوع جميل يا برب, والله بالنسبه لي بعدني عازب, وموضوع الطلاق كثرفي زمنا,انا اقول ضعف الوازع الديني هو السبب الرئيسي في حالات الطلاق,يكفي اللآيه الكريمه في قوله تعالى (موده ورحمه)صدق الله العظيم, كم تسوى هاي الكلمتين سبحان الله.
شي ردود عيبتني واايد مثل ردود ابوعمر و r34 جزاهم الله خير
جزاكم الله خير على الموضوع والردود الطيبه وبارك الله فيكم
خلقت المراة من ضلع و اعوج ما في الضلع اعلا فان استمتعت بها استمتعت بها على عوج و ان جئت تقيمها كسرتها و كسر الزوجة ( طلاقها)…
افهموا معنى الحديث يا معشر الرجال.
——————————————–
((يايها الذين ءامنوا ان جاءكم فاسق بنبأ فتبينوا ان تصيبوا قوما بجهاله فتصبحوا على مافعلتم نادمين))