السلام عليكم ورحمة الله وبركاته
شحالكم يالربع
صار لي فترة ما ناقشتكم بموضوع ^^
المهم يا جماعه عندي نقطتين
الاولى:
قبل لما كنت اسير المارينا مول فبوظبي انا وام العيال بروحنى
وبالذات اذا كنت موقف سيارتي فوق … بخبركم بالضبط
بعد ما تطلع من البوابة الرئيسية وتعبر الشارع…. اييك واحد زلمة لابس لبس كشخة بكرفته وجل وحركاته
ياني يقولي نحن شركة فلان الفلانية … سجلت معانا عشان تربح معانا رحلة لك ولزوجتك الى “يألف من عنده اي مكان” ؟
واذا كنت انا ويا هلي والعيال يقولي سجلت عيالك ربح قسيمة بقيمة “مبلغ خيالي”
المهم انا ما اسوي له سالفه اقوله مب مشغول تشوفني شال اغراض واسير عنه…
حد صار له نفس الموقف؟
ومنو هذيل ووين عنهم الشرطة؟
—
والموقف الثاني عند دخلة ارامكس … لما ادش اللفة في باكستاني تلاحظه يطلع لك مفتاح.. كل ما امر بنفس المكان اشوفه يسوي لي نفس الشي… كأنه يبين لي ربحت سيارة ولا ان مفتاح حصلوه..
ما فهمت شو يقصد بس ما تفيجت له… بس احسها شي نصب فيها… لان في واحد وقف له والف واحد التم عالسيارة
وما دري شو يصير…..!!
اتحذروا يا جماعه من النصب الي قاعد يصير
في المولات لا
لكن أذكر مرة اتصلتبي شركة سياحية وقالولي اني ربحت جائزة كبيرة وما بنخبرج الا لما اتينا المكتب
قلت بسير بجرب حظي شليت اخوي الصغير وسرت لهم المكتب في عيمااان ويوم وصلت قالولي اني فزت باقامة مجانية في فنادق خمس نجوم وخيروني بين ثلاث مدن (مصر . تركيا. ماليزيا) لمدة اسبوع من دون تذكرة ولا شي واونه ما أقدر أسافر في الصيف لان ماشي حجز الا في شهور معينه وعندهم شروط عشان التحق فيها بالجائزه وحاولي يقنعوني بس سويلتهم طاف ……… وقلت لهم خلوا جائزتكم حقكم ماباها
انا نفس الشي
صارلي هالموقف بس قبل حوالي 9 شهور يمكن او اكثر
بس مب هنيه
فراس الخيمه
كنت توني ظاهر من مركز المنار البوابه الرئيسيه وياني واحد مصري وانا مستعيل
ساعه يلف ويدور عليه ويقولي سجل رقمك ويانا وبنطلبك وفي مؤتمر ومادري شوه قريب واحتمال تربح
عطيته رقمي وافتكيت من صدعه
ولا ياني اتصال ولا شي عقب
ولا افتكرت فالموضوع
الله المستعان
المصري اسمه عاطف بكر وصدق من كثر ما وقفني وعطاني قسايم اوني ربحت ولازم اراجع مكتبهم السياحي بديره ستي سنتر اسميني حفظت اسمه ولابحياتي رحت وشفت شو سالفتهم ولكن اعتقد انه كل كذب بكذب!!!!
صارتلي
بس على قولتهم المشهوره
ربح رقم تلفونك فسحوباات الي سويناهااا
وان كالعاده ردي بعدين بكلمج ان عندي اجتمااع احين
خخخخ