السلام عليكم ورحمه الله
اخواتي اخواني الاعضاء والزوار واصدقائهم بعد 
لان ياليت اللي يدخل هالموضوع ويشوف المناقشه اللي فيه يوصل الكلام الموجود لمعارفه عشان يستفيدون من خبرات وتجارب الاعضاء
انزين طبعا مابطول عليكم والموضوع مثل اللي كتبتته بالعنوان وبنكتب الموضوع على نقط..
اولا: موضوع التمويلات الكبيره :
اللي توصل فيها التمويلات للمليارات ونسمع عنها وايد هاليومين والكل متحمس لها ماشالله ويعتقد انها نهاية ديونه وبدايه مشاريعه وانطلاقه من اوسع الابواب لعالم المال والاعمال..!!
اخواني هالصفقات ماتتم الا في حاله ان طالب التمويل كان يحصل على نفس المبلغ من اي بنك وهذا يصير للي عنده ملاءه بنكيه قويه او عنده اراضي باكثر من قيمة التمويل المطلوب او عنده مصنع او مشروع قائم من 3 سنوات على الاقل ودخله بالملايين وهالاشخاص ياخذون قروض من هالشركات عشان ان فوايدها اقل وبعضها اسلاميه..
يعني اخواني لو هالصفقات تتم بهالسهوله كان الكل غني ماليا..!!
(( ياليت من الوسطاء او اصحاب طلبات التمويلات الضخمه يفيدنا اذا تمم صفقه ))
وياليت محد تييه الحميه ويقول يصير الكل ياخذ لان نبي الكل يستفيد فاذا وسيط تمت معاه صفقه ياليت يقول تمت معاي صفقه ويكون صادق معانا ومايقول ان سمع او يعرف صفقات تمت
ابيه ان هو نفسه الوسيط اللي يكلمنا هني يعرض مداخلته بالموضوع يقول ان تمم صفقه والكلام نفسه موجه لطالبي التمويل..
اخواني هذا مب تحدي او شي ثاني الموضوع ومافيه ان ابي سواء الوسطاء او طالبين التمويل ينظرون للموضوع بعين الواقع عشان لايجرون الوسطاء العديد من الاتصالات ويعطون الكثير من الوعود
وفي النهايه يكتشف ان دفع مصاريف مكالمات ولقاءات وطالبين التمويل يلومونه ويتهمونه كذب وهو الوسيط ماله خص غير ان كان يبي يكون وسيط لصفقه ويحصل عمولته .. بعض طالبي التمويل الله يهداهم من يسمعون ان الموضوع سهل تحصله راح وتدين او اتصل بلي يطالبونه ووعدهم ان خلاص بيعطيهم فلوسهم وان بيسوي وبيسوي وفي النهايه يطلع كذاب بعيونهم في حال ماتمت الصفقه..!!
وهذا غيض من فيض بموضوع التمويلات وياليت اللي صارت معاهم قصص بالتمويل من هالنوع سواء من وسطاء اوطالبي تمويل ان يثرون الموضوع ويفيدونا بتجاربهم..
وطبعا كعادة اغلب مواضيعي بيكون اكمال الحديث والنقاش في الرد
وبننتقل لمواضيع صفقات السكر وبقول لكم ليش الكل يبي يسويها مع انها بعد ماتصير عادة وننتقل للجزءالثاني من المحادثه في الاسفل ..
جزاك الله خير أخي نايف وشكرا لنصيحتك الغاليه
و الله يفرجها علينا وعليك وعلى أمة محمد صلى الله عليه وسلم
صباح الخير اخوي ابن الفرات وهلا فيك
وشكرا لك على طرحك التجارب وتعاونك مع اخوانك لتوجيهم واعطائهم من خبرتك بهالموضوع
شوف الله يسلمك بخصوص التجربه اللي صارت معاك دوم بقول لك في كلام بين السطور هو اللي دايما يخلي كل صفقه للسكر عن طريق الوسطاء تنلغي في اللحظه الاخيره..
فانا انصحك نصيحه شخصيه هالموضوع معقد ومتشعب بطريقه كبيره جدا ودايما الوسيط يكون هو الملام ويتعرض لكل انواع الكلام وينقال عنه كذاب وغيره مع ان في اكثر الاحيان يكون الوسيط حاول بكل جهده ان ينجز الموضوع بافضل الاوفرات لكن في النهايه ينقلب الموضوع عليه ويضعف اسمه في السوق
فموضوع هالبضاعات معقد ودوم في اتفاقيات جاهزه مسبقا لكنهم يلجاون للوسطاء للتمويه واطاله الطريق للوصول الى حجج مستهدفينها سواء هالشي من البائع او الشاري
وان شالله الاخوان والكل يعرف هالموضوع وينتبهون له.. ويعرفون ان هالموضوع الدخول فيه غريب والخروج منه اغرب
والله يسهل عليك ان شالله بالوساطه باموراخرى غير المواد الغذائيه لانه عباره عن تجاره اصعب من تجاره الالماس والذهب في ايمانا الحاليه..
بخصوص موضوع وساطه العقارات ترى فيها خير خصوصا في الوقت الحالي من توجه الشريحه العظمى من المجتمع نحو تجاره العقارات ..
فلهالسبب ومع الدخول الكبير للمتسهلكين فشي طبيعي بيزيد عدد الوسطاء مما يخلي ان الواحد يلقى له نسبه في السوق يكون شي يبي له وقت لكن مش صعب
اخوي ابن الفرات حاول التميز في وساطتك العقاريه وغير ادواتك التسويقيه وان شالله يكون لك نصيب في هالسوق الكبير والممتاز وانا انصح بالوساطه العقاريه بكل اشكالها
لكن باستخدام ادوات وساطه متميزه
وبالتوفيق ان شالله اخوي ابن الفرات وتسلم مره ثانيه على اثرائك الموضوع بهالتجارب وان شالله الكل يستفيد منها
حبيبي الأخ نايف
سلمت يمناك وشكرا لتفاعلك و حروفك انما هي حروف محب لإخوانه
أخي الكريم تركت المنتدى العام وجئت اليك اتشارك معك الأفكار والتجارب والهموم
لست أدري عن جوابك لكن هناك دوما شيء محير
اطرح عليكم هذه القصه واسف لكن التجربه هي فيها العبره وفيها الحكمه
كثر الطلب على السكر بالمخازن و حاولت فيها ويطلع بعد شد وجذب الأوفر والمقدرة ورؤيه السكر توصل للسكر يقال لك السكر انباع
راح اسمك في السوق و محمل بأشنع عبارات الخيانه ان لم يرافقها الشتيمه
طيب شو الحل
رحت بحثت عند مصدر أكيد للسكر و وجدت أن مصدر السكر هو مصنع السكر ( مصنع الخليج لتكرير السكر ) رحت وتفاهمت مع المدير العراقي المسئول عن دبي ووبعض المناطق
تفهمنا وطلب مني طلب شراء و احضرت له طلب الشراء و تفاهمنا ان المشتري يريد100 الف طن سكر يستلمها من دبي لإيران
وأخبرني أن المائه الف كمية ضخمه تريد مالايقل عن شهر الى شهرين لتسليمها من قدره على التحميل والتفريغ و سعة المراكب التي تدخل للتحميل وغير ذلك
وقال لي وكتب ذلك على ورقة ربما لازلت محتفظ بها الى اليوم انه الأن موجود كمية 75 الف طن بالمخازن متاحه للبيع (ليست محجوزة لعملائهم )
اتفقنا على ترتيب العمل والية الكوميشن وفي اليوم الثاني أو اللي بعده جاء المشتري ومعه المسئول المالي واثنان من الوسطاء واجتمعنا في غرفة الأجتماعات
تبخر السكر الأبيض ووجد السكر البني الغير مكرر ولا يستطيع ان يتعاقد حتى على كمية 25 الف طن
تواجهنا ولكن بقيت حجته الأقوى كونه صاحب سكر اما أنا فوسيط
يعني بالأخير هناك جزئية مهمه غائبة مفقودة هل حتى المصنع يريد يتعرف على الزبائن ليبيع لهم أم غير ذلك لست أدري
فعلا السكر خلت الحليم حيران
وتشكر الغالي نايف وكل الأخوان المحبين
بالنسبة للحكومات ما عندك حكومه الا وعندها حبال طويله ما توصل للمسئول المباشر الا وتكون قد كرهت التعامل مع هذه الحكومه
وثانيا يطلبوا منك سبق أعمال وثالثا كثير من الأحيان الوسطاء يفشلون الموضوع قبل ما يكون هناك خبر للبائع أو المشتري
والأن عمل الوساطه في العقارات نفس الشيء ونفس المشاكل
لما يتفقوا الوسطاء مع بعض يكون البائع شاف له مشتري والمشتري وجد له أرض
اخي العزيز ابن الفرات
تسلم على ردك ومشاركتك بالموضوع وعلى تجاربك القيمه وللعلم اخوي انا ترى كنت موجه لك الموضوع بعد بخصوص شحنات السكر لان اشوفك كثير تعرض عن هالموضوع ..
وكنت انتظر مشاركتك بفارغ الصبر
وانا اقول ليش تقول ان الحظ موجود يمكن من التجربه الاولى لان يمكن انت اعتقدت ان اللي صار فيها حظ بس تراه للعلم مش حظ تعرف ليش ..؟؟
لان اذا قريت بين السطور ان هم مااتصلوا لك وخبروك ان القدره البنكيه جاهزه الا بعد ارتفاع الاسعار بساعتين يعني صار عندهم خبر بارتفاع الاسعار ..
ومثل ماقلت سابقا هؤلاء من تجار الاحتكار والسوق السوداء ويجهزون هالطلبات عشان يوهمون الجهات المختصه برفع الاسعار وعدم توافر السكر مما يساعدهم على رفع الاسعار واحتكار البضاعه
وطبعا مثل ماشفت اللي كانوا مزورين او اللي كانت نيتهم غريبه مثل موضوع الالماني و العشرين دولار ولو اني اعتقد ان الموضوع مش بالعشرين دولار بس كان ايهام منه لكم ان الموضوع انلغى بهالسبب وكان يبي يوصل لكم فكره ووصلت بتمثيليه حلوه يعني ان سمع هالكلمه وتغير شكله واجرى اتصاله ومن ثم موضوع البيع عشان تفهمون الموضوع بالطريقه اللي هو يبيها بس ليش … اكيد لسبب هو يعلمه @@
اخوي الله يعينك على حرق الاعصاب في هالصفقات ويبعد عن السكر ويحفظك ان شالله
بس بسالك سؤال بحكم ان لك تجارب كثيره بهالموضوع
(( ماتلاحظ دوما ودائما ان هالصفقات تنلغي في اخر لحظه ))
ياليت تقرا مابين السطور عشان تعرف السبب .. والسبب بتلاقاه في بداية الموضوع
الله يوفقك اخوي مره ثانيه وماشالله عليك وعلى مجهودك الرائع وعلاقاتك الممتازه واذا تبي نصيحه مني ياليت تحاول تتعاقد مع حكومات اذا كانت هالكثر عندك مصادر لان الوساطه مع الوسطاء في هالصفقات الكبيره جدا بتكون نهايتها كلها متاشبهه وهي الغاء الصفقه في اخر لحظه
وبالتوفيق ان شالله وتسلم للمره الثانيه والثالثه والرابعه وماقصرت اخي الكريم على اثرائك موضوعي بتجاربك القيمه وتقبل تحياتي
مرحبااا اخوي الهاجس
اول شي شكرا الف الف شكر لك على عرضك تجربتك لنا بالمنتدى عشان يستفيد منها غيرك طبعا بعد استفادتك انت منها بالبدايه
والله يعينك على موضوع الوساطه في 90% من الحالات يطلع الشاري هو البيع والعكس بعد.. عاد انت هني تضيع بالسالفه تقول الحين منو الغلطان انا ولا هم …؟؟؟؟
اخوي اسلوب سردك كان حلو ومشوق واهم شي بخصوص يوم الاحد والخميس بس غريبه المفروض انك تتعلمهم بلغه ثانيه بعد ^
عموما اخوي قدر الله وماشاء فعل والفلوس اللي خسرتها الله يعوضك بغيرها ان شالله بس ياليت تخبرنا كم دفعت لهم بالضبط واذا ماتبي تكتب عام ياليت تخبرني خاص مادري ليش يااخي صار عندي فضول ابي اعرف كم خذوا ..؟؟؟
وليش ماوديت الشيك واشتكيت عليهم يعني شنوهي الاسباب اللي خلتك تسكت عنهم للحين مع ان الفتره كانت طويله من تاريخ توقيع الشيك لهالوقت ..؟؟
بس والله كل شي يهون ولا حرقه القلب والانتظار وانت تنطر وهم قاعدين ياجلون عشان جذي حبيت انصح الكل من هالمواضيع ترى بتييكم حرقة قلب وتعب نفسي وانتوا في انتظااااااااااااااااااااار
اخوي الحمدالله انك طلعت من الموضوع احسن من غيرك تصدق ان في ناس مايصحون من هالوهم ..!!!
واذا مثلا ماصار معاهم مثل هالتمويل يروحون يدورون على تمويل غيره ويطيحون بنفس الاخطاء @@
الله يحفظ الجميع ان شالله من مثلا هالامور والحذر اخواني ثم الحذر
واوجه تحذيري لاخواني الوسطاء لان بعضهم بعد مايدرون شسالفه ويكونون ضحايا وفي النهايه يطيح كل اللوم عليهم…
وبالتوفيق اخوي الهاجس وصراحه ماقصرت وتسلم مليون مره على هالطرح والله يعوضك بكل خير ان شالله ونسمع عنك كل اخبار طيبه
** للعلم بس.. نكك الهاجس ترى كنت استخدم نفس النك من سنة 1998 لسنه 2002 (( يعني على ايام الشباب )) ونك حلو مادري ليش عاجبني