السلام عليكم ..

خلونا نكسر الروتين في هالقسم اللي كله بيع وشرا ونتنقاش في موضوع تفيد فيه
وتستفيد منه . .

الاغلب اكيد كل مقالب من موتر خذاه وخلاف تندم عليه ماناسبه ولا مشاكله وايد
كل واحد يذكر لنا

الموتر :
الموديل :
العيوب والمشاكل:

خلونا نشوف تفاعلكم وفتكم بعافيه ياقدعان

99 thoughts on “موضوع للنقاش || سياره ندمت انك اشتريتها !!!”

  1. شوفوا يالربع ..
    انا شفت الموضوع اول ما حطــــه الأخ ( عتيم ) في هالمنتدى الطيب .. اللي ( اسعار السيارات فيه غاليه وااايد )
    عالعموم ..
    بالنسبه لخبرتي في السيارات .بحكم اني كل ثلاث او اربع شهور اغير نوع السياره اللي عندي ..تأكدت من الآتي :
    السيارات اليابانيه والوحيده القادره على التكيف مع مناخنا الصحراوي ..اللي يذيب الحديد .مش المخ بس هي ( التويوتا والنيسان ) وانا افضل التويوتا بمافيها ( اللكزس ) بالدرجه الأولى ..
    والسبب انه الأخ ( تويوتا ) ما قصر بصراحه .. قام بصنع السيارات لتتناسب مع اخــس المناخات الموجوده في كافة انحاء العالم .. ومنها المناخ الصحراوي الجاف .. وبصراحه .اذا خذت تويوتا انسى شي اسمه تصليح ( لمدة عشر سنوات جدااااااااام ) اذا مش اكثر …
    ومن بعد السيارات اليابانيه تأتي في المرتبه الثانيه السيارات الأمريكيه … عندنا جمس موديل ( 1986 ) مظهرينه من الوكاله ولازال في المزرعه …وعمره مادخل الصناعيه ..تدرون ليش ..؟ ( لانه الوالد يسوقه بس الله يحفظه )
    ولا لو حد منا نحن ( فئة الشباب ) ماتم الموتر ثلاث سنوات ..
    والشي الثالث والأخير ..
    يا جماعة الخير …بالنسبه للسيارات الألمانيه ( ما تنفع حق المكده ) ولا حق جونا وخاصة في الصيف ..تكثر اعطاله ..
    اللي يبا موتر الماني ..انا افضل انه تكون عنده سياره يابانيه حق المكده .والالماني حق الكشخه والويك اند .
    وبالنسبه للسياره اللي ندمت عليها ( همــــر h2 )
    سياره شكلها وحش ( بس ما تنفع حق استخدام ابدا” ) وتشرب البترول شرب ..وتدخل هوا من كل مكان ان سرتبها خط ..

  2. الاخ اللي يقول احترم الموتر يحترمك ..

    انا اقول عكس هالكلام تماماً ..احترم الموتر ..يدوس اخلاقك

    كان عندي أودي s8 احترمتها ..رفستني

    لعنت خيرها فالعابر ..والله مشت احسن ما يكون

    مب كل الموتر تيي بالزين ..

  3. الموتر : فايبر إس آر تي

    الموديل : 2008

    العيوب والمشاكل: الله لا يرده
    قطع غيارها مش متوفرة ابداً

    افترت علي فالدوار وبهدلت البمبر الامامي

    ترييت عالبمبر 8 شهور ..والسيارة تمت عندهم فالوكالة وعطوني موتر ما يسوى رنجات موتري

    وبهدلوني ليما بعتها وارتحت ولله الحمد


  4. تلاحظون انه ماشتكيت من مواتري تعرفون ليش ؟؟ لاني انا احترم الموتر هههه يعني مالعن صيره … الحمد الله اسوق باحترام والموتر يوم تحترمه يحترمك ويحطك فوق راسه بعد ومكيفه يبرد زياده في الصيف عشانك ههههههههه

    ومشكور على الموضوع الشيق

    والله ياخوي في ناس تدلل مواترها مثل بقرة لورباك … تعرفها
    ومع هذا ، كل ما دقها سلف اختربت

  5. موضوع جميل

    لكن لي ملاحظة بسيطة حول السيارات الألمانية بحكم إني عشت في المانيا

    ياأخوان السيارات الألمانية قوية وفيها قدر كبير من التكنولوجيا وأحد أسباب كثرة مشاكلها في الخليج من وجهة نظري بعد درجات الحرارة الكبيرة هو الإستهلاك الكبير في وقت قليل

    ففي المانيا – وأظن في كثير من دول أوروبا – الناس لا تقطع نفس المسافات مثل هنا

    ففي المانيا معدل المسافة المقطوعة سنوياً من الأفراد العاديين تتراوح بين 12 – 15 ألف كيلومتر في السنة أي أن السيارة تقطع ال100 ألف كيلومتر في سبع أو ثمان سنوات أما هنا فيقطعها البعض في سنتين أو ثلاث مما يقلل من عمر السيارة الأفتراضي ويؤدي لظهور الأعطال بعد فترة قليلة من شرائها

    تحياتي

    عن الممشى انا معااك
    ياريال شي مواتر تحصلها موديلات 2010 وماشيه 100 الف!
    اكيد بيشوفون فيها خرابات

Comments are closed.