السلام عليكم ..
خلونا نكسر الروتين في هالقسم اللي كله بيع وشرا ونتنقاش في موضوع تفيد فيه
وتستفيد منه . .
الاغلب اكيد كل مقالب من موتر خذاه وخلاف تندم عليه ماناسبه ولا مشاكله وايد
كل واحد يذكر لنا
الموتر :
الموديل :
العيوب والمشاكل:
خلونا نشوف تفاعلكم وفتكم بعافيه ياقدعان
مرحبا الكامري سيارة مكده وما تخرب كلش
دفعة 2008و2007 فيهن مشكله وهي السياره تنط على الشارع على سرعة 60 او 100 ثابت
تنط يعني تناقز خفيف تحس فيها pumping بس سيارة اقتصاديه و مريحه .
اعرف واحد مدمن فورد عنده اكسبلورر مخلنها للبيت وماقد اشتكى عنها اعتقد اللي عنده موديل 07 او 08
ويقول تنفع للمكده
وعنده فورد الصغيره الهاتشباك فوكس بعد يقول انها ماتعول ويسير بها الدوام عشان الزحمه ويقول ان الصيانه
تعاملهم تمام لان تابع للطاير
بخصوص تورس كانوا الامريكان يشتكون منه ويقولون ماتنفع وتعيسه اما الجيل اليديد في مواصفات حلوه ومسوين
لكن ماقدر افتيلك عنها
لها دعايه في مسلسل “وايت كولر”
احلى سيارات امتلكتهم:
جولف جي تي آي ٢٠٠١. ايام العزوبيه ودوام الاتصالات، يعل تسقى ذيك الايامي ،،،، هههه ، ثبات قوه، سهوله المناوره في الزحمه والمواقف.
العيوب: الوكاله في ذيك الايام كانت سمعتها (نمبر ون) السيرفس سريع والغيار متوفر وارخيييييص ، وعلى قولت عادل امام ، وانا بعيييياط!!!!
بي ام ٥٣٠ ٢٠٠٥
ثبات وفخامه وعزم متوسط، انا من عشاق ال ٣ لتر و ٦ سلندر، خخخخ
كامري الماني، عبي بترول وامش حتى في اشاعه انها تمشي على خليط من زيت زيتون مع ردبول، سنتين ونص دخلت فيهم الوكاله مرتين، مره لتبديل زيت، والسنه الثانيه تبديل آيل (قال يعني غير عن بعض).
العيوب: (كل شي في حبيبي اكتمل، الله الي كمله والله عطاه ما بقى للزين في خلي محل) ، ٥٣٠ فيها تكيف كراسي سنه ٢٠٠٥، واتحدى واحد ايبلي ٥٥٠ موديل ٢٠١١ مع تكييف كراسي.
بي ام ام ٣ ٢٠٠٥، خيل الموت الله لا يرده، كمل عندي شهرين بعدين قلت يا يبيعني يا ابيعه. طبعا السياره غنيه عن التعريف لانها تعتبر اسطوره.
المشاكل: لم اعاني من مشكله لان الوقت كان قصير، لكن اقدر اقول ان تكاليف الصيانه بتخليك اتقدم طلب اعانه في صندوق الزكاه.
بي ام الفئه السابعه عموما من ٢٠٠٦ لين ٢٠٠٨، احلى سواقه، ممكن تاخذ رخصه قياده شاحنه او يخت او حتى مركبه فضائيه لان الفئه السابعه نفس القياس.
العويب: باب الشفط اذا اخترب، بتروح الوكاله وانته تسوق بيد وميود الباب عن لا يتبطل بيدك الثانيه. الله يغربل هالموقف، فضيحه.
جيب رانجلر، هو شرا ام العيال، ما تروم تعيش وياه ولا تروم تعيش من دونه ، خذت واحد مستعمل من سنتين والسبوع الي طاف بعته، كلفني في تصليحه ٦٠ الف وبعته باقل من ٢٠الف.
::::: فلوسي، فلوسي
فورد اكسبلورر ٢٠٠٨
هذه السياره كملت عندي سنه، وسنه كامله ما قدرت احبها ولا قدرت اكرهها، يعني سياره وسط في كل شي، لكن خراباتها تطلع بسرعه.
بي ام ضرب خمسه، و في روايه اخرى x5 ٢٠٠٧
من افضل السيارات عمليه واستخدام، لكن يابسه وصلفه بشكل كبير.
ونصيحه اخيره الي بيشتري الماني خصوصا بي ام، لازم يكون وياه عقد صيانه عشان يفتك الا بالله من مصاريف الصيانه، وهذه عن تجربه ٥ سنوات مع البي ام.
سياره اتمنى امتلكها ان شاء الله اذا الله عطنا عمر
نيسان الشكل اليديد رقم واحد
حد عنده خبره مع الفورد اي نوع لا يبخل علينا
شي سياره جديده اسمها تورس حد جربه.
شـكــ وبارك الله فيك ـــرا لك … لك مني أجمل تحية .