(موقف استوالي)الله يستر على المسلمات

السلام عليكم

اليوم استوالي موقف غريب ابي اشاركه معاكم

الله يسلمكم وانا ساير الدوام اللي يبدا الساعة 6:30 صباحا قلت بمر على محطة ادنوك على الكورنيس (الواحة مول) بعبي بترول وبشتري كوفي

وقفت الموتر وخبرت الريال يفولي السيارة وتركتها وسرت صوب المحطة وشفت شباب مواطنين على صومالية على زلمات وسيايير ودراجات واقفين برع المحطة شكلهم سهرانين وما وراهم شغل

يوم دشيت داخل اطلب الكوفي من دونكن دونت جفت حريم من جنسيات عربية داخل يالسات ووياهم ريال من المحطة تموا شوي وراحو وتمت وحدة لابسة عباية

انا صراحة ما اهتميت للموضوع جهز الكوفي خذيته وكنت ساير في حال سبيلي ابي الحق على صلاة الفجر قبل لا ادوام (الوقت كان 5:12 صباحا وكنت متاخر) وانا ياي اطلع اشوف الحرمة تزقرني “اخوي لو سمحت” انا قلت اها شو سالفتها !!

قالتلي “الشباب اللي برع يلعوزوني وانا خايفة” لين هذي الجملة تعاطفت وياها وعقب قالتلي “اتصل في تاكسي وما لاقية واباك توصلني” قلتلها “انا ساير الدوام وقريب عن هني يعني ما بتسيرين مكان لو تبين خذي تلفوني واتصلي بتاكسي” قالتلي “لا بس وصلني للشارع وباخذ تكسي” وانا صراحة لين هني كنت ناوي ومتردد اوصلها ولو ان هذي ثاني مرة يستوي معاي موقف مشابه من سنوات

المهم قالتلي الحرمة تتكلم انجليزي قلتها هيه قالتلي بلالنجيلزي بما معناه “انا متزوجة وطلعت مرقص وشربت ومابي الشرطة تيي وتستوي مشكلة وريلي يعرف وبياخذ ولدي عني”!

يا جماعة الخير انا انصعقت! متزوجة وسهرانة وتشرب وعندها ولد بالبيت !!! لا وبعد لابسة عباية !!! تميت خمس ثواني السيستم شت داون من الصعقة !! وقلت في نفسي “الله يعين ها الولد يمكن لو ريلها خذه بيكون وضعه احسن”

المهم عقب قلتلها اسمحيلي انا بسير وقلتلها بالانجليزي “لو تفكرين في الغلط قبل ما تسوينه بيكون احسن ” وسرت وانا طالع شفت دورية ياية صوب المحطة

صراحة فكرت في الموضوع وقلت الحمد لله بنات بلادنا مافي مثلهم يتحملون كل الضغوط ومحترمات اعمارهن الله يحفظهم ويستر على المسلمين والمسلمات في كل مكان