مومتحجبة.. ما ابي .. انزين ليش

ماذا قد يمنع النساء او الفتيات عن الحجاب؟ او ما افكار التي تعيقهم ؟؟

1- مب مقتنعة:
اختي يلي تقولين انج مب مقتنعه ..
شنو دينج؟؟
انتي مسلمة؟؟
اذا كنت مسلمة تعرفين شنو معناة مسلمه؟
معناتها مستسلمة لله
واذا انتي ما تبين تتحجبين او مو مقتنعه مثل ما تقولين معناته انج مب مستسلمة لربج
وشلون تقولين مب مقتنعه بأمر الله عز وجل؟؟!!

2- أنا نيتي اتحجب والحجاب في قلبي وانا اصلي عدل:
الي بياخذ الدين بياخذه كله مو بياخذ جزء وبخلي جزء ..
يعني بتقولين حق ربج أنا ماتحجبت لأنه كفاية العبادات الي سويتها لك ؟؟
مو لازم اسوي لك كل شي؟؟ ( استغفر الله)

كل يوم تطلعين فيه من البيت كل واحد يطالع جسمج او شعرج بتآثمين
يعني تخيلي جم شخص راح اطالعج باليوم؟؟
وبعدين لين طالعج يمكن يشتهي أو يتمناج تخيلي.. حجم الذنوب الي بتتراكم عليج كل يوم
انت متأكده حسناتج راح تكفي؟؟؟

خلنا نحسب حسبه بسيطه:
طلعتي من البيت جافوج جم واحد بطريج .. نزلتي البرادة جافج الهندي وجم صبي الي كانو بالبرادة،، رحتي السوق رحتي المجمع جافوج ثلاثة ارباع الرياييل الي كانو اهناك .. انتي متخيله الموضوع؟؟
مجرد نظر لج تاخذين سيئات هذي مجرد ذنوب الحجاب.. مابالج الذنوب الآخرى الي بتاخذينها خلال اليوم..

انتي قاعدة تتخيلين الموضوع من وين راح اتيبين حسنات تغطي كل ذي!!!

3- الحجاب بحت الشعر والجو حار:
قال تعالى: ” قل نار جهنم اشد حراُ”

4- في وايد ناس متحجبات بس اهمه حدهم مأساه :
انزين في وايد ناس بتصلي وبتزني يعني خلاص مانصلي؟؟
وايد ناس بتروح الحج وبعدين بتسوي معاصي يعني خلاص مانروح الحج؟
العيب اهني في الي اطبقه غلط مو العيب في الحجاب او الصلاة
وبعدين انتي راح تتحجبين طاعة لله شعليج من الناس!!

5- أنا لحين ربي ما هداني، بس ان شالله باتحجب لين الله هداني:
قال تعالى: ” أن الله لا يغير ما بقوم حتى يغيروا ما بأنفسهم”
ما بتتحجبين إلا اذا غيرتي الي بداخلج،، لا تقولين أنا ربي لحين ما هداني.. الله هداج والدليل انج قاعدة تقرين هالكلام,, انتي الله قاعد يهديج ولكنج تبين اتعيشين بالعمى عن الهدى ما تبين الهداية,,الله بعث لج فرصة الهداية ..

6- لما بتزوج باتحجب:
شدراج انج بتزوجين؟؟
شضمنج؟؟
ثلاث ارباع الريايل ادورون على المرأة المتحجبة الي ساتره على روحها
نسبة قليلة جدا الي ادورون على الغير متحجبات..
وبعدين لا تخافين وتقولين اخاف اتحجب وما اتزوج.. لأن كل واحد مكتوب عند ربه من بياخذ من اول ما انولد .. فتوكلي على الله

7- أنا لحين اصغيرة:
انتي تضمنين متى بتموتين؟
انتي تضمين انج بتعيشين لي باجر..؟ او لي عقب ساعة؟؟
كان في شابة صغير بالسن غير متحجبه قالت حق رفيجتها المتحجبة تعالي معاي السوق ابي اشتري اثياب قالت لها لبنت الذكية اوكي بس بشرط بنروح محاضرة قبل ما نروح السوق فوافقت البنت،، راحوا المحاضرة وكان الدرس عن التوبة والرجوع الى الله.. فيوم خلص الدرس قامت لبينة تصيح تقول تبت اليك يارب سامحني يارب.. تصيح منهارة.. قالو لها بس خلاص قومي انروح السوق وان شالله الله بيغفر لج قالت مستحيل اطلع قبل ما تغطوني .. لبسوها العباية والحجاب وانزلوا السوق.. اول ما انزلوا دعمتها سيارة ومــاتت l …

8- الموضة:
يعني الموضة اعز من ربج؟
بلعكس الحجاب بطلعج احلى .. شكلج بصير احلى بتنورين..
وبعدين حتى لو ما في حجاب على الموضة، بعد تتحجبين لأنه هذي امر الله .. والله سبحانه اعلى من الموضة وهالتفاهات..

9- ابي اقلد الغرب:
من الي احترم المرأة ومن الي اهنها؟
الغرب او الإسلام؟
الإسلام اهوه الي عززج..

10- ما ابي اتحجب لأنه اخاف افصخه :
وهذي معصية اكبر..
اخذي العزيمة وتوكلي على الله ، وحاولي::
أ‌) تماشين البنات المتحجبات عشان اعينونج “الصحبة الصالحة”
ب‌) حضري الدروس الدينية وقوي ايمانج
ت‌) الدعاء والأستعانة بالله عز وجل
يارب انا بنفذ امرك وما علي من احد وبلبس الحجاب والإعانه عليك
” اللهم يامقلب القلوب ثبت قلوبنا على دينك”

11- متفشلة من ربعي ومن عائلتي:
باصير الوحيدة بالعايلة متحجبة فشيلة .. باصير الوحيد بين ربعي المتحجبة فشيلة ..
بتتفشلين من الناس ما بتتفشلين من ربج يوم القيامة؟؟
بعدين من المفروض الي يتفشل الي فلت شعرها وطلعت جسمها والله الي لبست وغطت روحها وطاعت ربها ؟؟؟؟
خلج قدوة لهم
——————-

كلام أخير لكي اختي الحبيبة:
اصحوا حبايبي الواحد ما يدري لي متى بعيش
اتقوا ربكم وقو ايمانكم و عدلوا صلاتكم

وتره الجمال جمال الروح والأخلاق مو جمال الشكل والمظهر
اخواتي الحبيبات جاء الوقت لنصحى مجددا ونصارح انفسنا !