السلام عليكم ورحمة الله وبركاته
حبيت أطرح عليكم هذا الموضوع للنقاش وابداء الرأي
بصفتي كوالد بدأت أشوف الدنيا بعيون أولآدي بعد ما كنت أنا اللي أشور وأتخذ القرار
في السابق كانت البنت تنتظر اليوم اللي بيتقدم فيه حد لطلب ايدها للزواج .
أما في هذي الأيام أشوف الأمور تغيرت وبسرعة عجيبه تغير حال الشباب وصار الكل
يقلد بعضه البنت تريد الوظيفه راتب وسياره آخر موديل ( وما يعجبهم غير الأوروبي بعد )
وما حد فيهم يريد تحمل المسؤليه ويوم يتقدم حد من الشباب اللي هم تغيرو بدورهم
يفضل الزوجه الموظفه جاهزه مجهزه وسيارتها فوق البيعه،على البنت اللي ما تشتغل
المشكله ان البنات الحين ما يفكرن الآ في اللبس والكشخه والخروج للتسوق
والمشي في المولآت وصرف راتبها كله على أمور ثانويه في الحياة بس للأسف صار لها الأولية
مثل العطروات والمكياج والأكسسوارات والملآبس والأحذية الخ …..
صار ما ينقصها شيء وتخاف ان المعرس عنده طمع براتبها ومعاشها وان الزواج زواج مصلحه
والشباب هالأيام صار تفكيرهم ان البنت أصبحت تريد معاش خاص للصرف عليها ( معهم حق )
يقول انا ما اقدر على طلباتها واسرافها من وين اجيب راتب ثاني لها خليها تشتغل وراتبها
تصرفه على نفسها . !!!!!!!!!!!!!!!
ما اريد اطول عليكم مع ان الموضوع طووووووووووويل ويستاهل الطرح لايجاد الحلول المناسبه
وين الغلط أو الخلل بالضبط وكيف نقدر نعيد تفكير الشباب للطريق الصحيح ونعلمهم القناعه
اعطونا آرآءكم والسموحه من الجميع
ابو احمد
انا اعتقد هذا الموضوع نسبي يختلف من شخص لاخر ومن بنت لاخرى
اما عن راي الزواج للبنت وايد افظل وخاصه اذا حصلت الزوج المناسب
اما في حالة الزوج الغير مناسب فالوظيفه افظل
وانا عن نفسي اذا بغيت اتزوج راح اخذ وحده مب موظفه ومب جامعيه بس راعية دين
وسوالمكم
زواج البنت انا اشوف اهم شئ وعقب الوظيفة لان راح تهتم بالعيال وكل تفكيرها بالعيال
من وجهة نظري الوظيفه ما تصلح مع تربية العيال..
إذا الوحدة تبا تربي عيالها صح لازم تتفرغ لهم ( يعني ما تكون موظفه)
لكن المــوت
وكل الموت والقهر
لما ايي الريال يقول لحرمته أنا أباش تشتغلي علشان تساعديني
أو علشان تكوني مثل فلانه وفلانه…
وينتقص من مستوى زوجته علشان إنها ( ربة بيت)
ويروح يدور لها وظيفه حتى في القوات المسلحة والشرطة بس علشان يشغلها
والله الشاهد على كلامي ( أنا هذي الأشياء شايفتنها وعايشتنها عند البنات)
في النهايه
الحرمه أم
والأم قلبها على عيالها
لكن يوم بتلاقي الحرمه إن نظرة ريلها غير لها لأنها ما تشتغل مع إنها جامعية!!!!!!!!
إنتوا احكموا شو بيكون شعورها؟؟..
وشو بيكون موقفها؟؟؟
حطوا نفسكم مكانها…
الحيـــن هذي الحرمة طاعت ريلها وقابلت في الشرطة وتتريا الرد عليها مع إن عندها 4 أطفال
وفيه حالات وايـــــــــــــــــد…..
ترا مب كل الحريم الله رازقنهم برياييل يفكروا مثل تفكيركم يا جماعة..
نترك المجال للبنات يردون لانه يخصهم اكثر
تسلم القيصر
ربي يوفقك ويحفظك
الف شكر
العمل افضل …..