لو ربنا فك عقدتك.. واتكتب كتابك.. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..
أجمل ما في الخطوبة العزومات الرومانسية.. على أحلى محلات أكل في البلد.. واللي عمرك مانتي شايفاها بعد الجواز.. المهم نصائحي ليكي عند أي عزومة مع ختيبك.. قلنا رقَّه ….
1- الأول لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوء طبعًااا
2- العيش أوعي تفضحينا وتأطعيه بسنانك.. ولا الرغيف نصين بأيدك وكل نص لأمة وتحشري.. أوعي.. العيش بيتأطع بالسكينة ف الطبأ.. وبعدين تاخدي لأمة.. لأمة.. بالعافية.. قال يعني نفسك مسدودة. اضغطي على أعصابك جدااا وبعدين لما تروَّحي.. إبأي حِفِّي زي مانتِ عايزه….
3- الشوووربة.. أبوس كعب رجلك.. بند الشوربة ده مهم جدًاااا.
. الشوربة تتشرب من غير صوت خالص.
. ومن غير ماتأعدي تنفخي فيها.. زي القهوجي اللي بينفخ ف الحجر للزبون.
. وطبعًاااااا عايزك تنسى تمامًا السلطانية اللي بتقيميها على بؤك ف البيت. وتدلدقي على روحك بالمعلقه وبدون صوت.
. سخنة ولعة برضه بدون صوت.. وتسيبي تلت الطبأ عالأأل.. مش تميليه.. عشان تلهطيها لآخر نأطة…..
4- الرز طبعاً .. بيتاكل بالشوكة.. أوعي إيدك تتمد ع الملأعة.. وتغرفي من طبأ الرز وتعبي. إوعي.. الرز بالشوكة.. وكأنك بتبوسيه مش بتاكليه..
5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها ف بؤك من سكات.. مش تشفطي المكرونة عود عود.
.
6- السمك.. مشكلة.. شوفي.. بتفصلي اللحم عن الشوك.. إزاي..؟؟ تاطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متألبيش السمكة.. بلاش فلح.. شيلي السلسلة بالشوكة والسكينة وحطيها في جنب الطبأ وكملي أكل النص التاني.. وبدل الفيلم الهندي ده.. نصيحة ماتكليش السمك خالص.. أولي مابحبش السمك وخلصي نفسك..
7- الجمبري.. -إذا كنتي عارفاه-.. أول ماطبق الجمبري ينزل.. بصيله بأرف واحتقار شديدين.. آل يعني زهأانة من كتر أكل الجمبري الجامبو في بيت ببااااا.. وأتنهدي جامد وقولي.. برضه..؟؟؟ وتروحي آطعة راس الجمبريياية.. بالشوكة.. أنا ف عرضك إنسي المصمصة دلوقت.. 
8- البطاطس سواء مسلوئة أو محمرة.. أوعي تهرسيها وتدبيها ع الرز وتدي .لا..لآ…لآ…بالشوكة حتة حتة وإنت زي ما تكوني هتعيطي من كتر ما البطاطس صعبانة عليكي..
9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي…. 
10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتؤولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه….. وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك.. وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفااااااااااااا
وربنا يكون في عون زوج المستقبل المخدوع
موفق بإذن الله … لك مني أجمل تحية .
صباح الخير اختي اشحالج ان شاء الله بخير
شو رايج بالانسجام
وبعدين لاتخلطين المكرونه بالتاتا
الانسجام مال المكرونه شي وانسجام التاتا شي ثاني ….
شرفني مرورج يالقنوعه……