في بعض إعلانات السيارات ، تحصل صاحب الموضوع مركّز على نقطة معينة
وهي … “إستخدام حرمة” … وما أدري ليش البعض يعتقد إن السيارة إذا كانت استخدام
حرمة فهي نقطة إيجابية لصالحه
عن نفسي أنا أشوف هالشي نقطة سلبية
وأحاول أتفادى هالنوع من السيارات لأن إستخادم حرمة بالنسبة لي يعني :
– اهمال شديد في صيانة السيارة لأنها ما تعرف ، يعني عادي جداً الآيل يكمل 20 ألف بدون تبديل … عاااادي
– السيارة 90% في دعمات وصبغ ، وعلى أقل تقدير الليتات اللي ورا مبدلات 3 أو 4 مرات والمدعمية مصبوغة 7 أو 8 مرات … على أقل تقدير
– إذا الحرمة متزوجة وعندها عيال ، خاصة 3 أو 4 ، تحصل السيارة من داخل مزبلة ، ولو تطالع تحت السيت بتحصل بلاااااااااااوي
شيبس ، لبان ، بقع عصير ، شباصات ، شعر ، نص سندويشه ، بقايا سمبوسه وأخيراً آثار الكرك
وغيره أشياء كثيرة ما تحضرني حالياً
النقطة الثانية اللي لاحظتها في اعلانات مواقع الإنترنت
بعض الشباب الله يهديهم ما أعرف كيف يفكرون
يكون عارض سيارته للبيع ومنزل صوره له وهو يصيّح ويلات في السيارة !!
والثاني عنده سيارة فورويل عارضنها للبيع ومنزل صورة للموتر وهو مغرّز في الطين ولا معلّق في واحد من العراقيب
لا ويقولك … نظييييف وبحالة الوكالة 
موضوع طيب للنقاش
واختلاف الرأي لا يفس الود
يعتبر ميزه لانه المرأه تحافظ على سيارتها وتضمن انه الموتر مش ملعوب في مكينته ومن الناحيه الميكانيكيه والفنيه يكون نظيف
اما باجي الامور من النظافه الداخليه بقايا الاكل على قولتك هذا يعتمد على الشخص نفسه وموضوعه بسيط مره وحده تاخذ السياره المغسله وتسوي لها غسيل مرتب وخلاص يرجع الموتر يلمع من النظافه
عن نفسي الحمدالله محافظه على سيارتي من الداخل والخارج لا شخطه ولا شحفه الحمدالله قمه في النظافه
ودايماً التشييكات في الوكاله أول بأول
ومن الداخل اكياس الوكاله للحين على الكراسي
والصراحه اشوف اغلب البنات محافظات على مواترهن وتلقى الموتر للحين سعره فيه لانه يكون نظيف وممشاه هب وايد
على عكس سيارات الاولاد اللي لاعبين في المكينه وفي البدي والتخميسات والامور الثانيه
وانا بنفسي يوم استخدم سيارات اخواني اشوف العجب فيها من داخل الاغراض والكابات والاشرطه والوايرات والجرايد منثوره فوق بعض والدبه بعد بروحها حفله !!!
ومن غير الصوت اللي يطلع من الموتر يون مسكين ويشتكي من اللي مسويينه فيه !
وفي النهايه مثل ما قلت لك ترجع للشخص نفسه هل هو يبا يحافظ على سيارته او لا ..
انا موتري تجييكات وكاله ما فيه ولا دعمه و لا صبغه
اصابعك مش سواااا
حتا الي يقولون استخدام شييبه !! يعني الشياب في منهم الي ما يشوفون و يشحفون كل شي فطريجهم و في منهم الي رزانه و تكانه
يعني مافي شي يحكم ع الموتر غير الفحص الشامل (( انا شخصيا ما اعترف فيه اهنيه لانه اعتبر الشي الرئيسي مفقود فالخليج و الدول العربيه و هو الكارفاكس ))
يعني انا اتجه للامريكي دايما
اظمن وايد وتقاريره سليمه 
المهم
رايي هو انه استخدام حرمه ولا شيبه ولا ياهل كله ها ما يحكم على حالة الموتر
كل انسان و له طبيعته ..
^_^ وكل حرمه غير عن الثانيه
وتقبلو مروري
ومشكور ع الطرح يا خوي
كلامك صحيح 100%