السلام عليكم
حبيت أطرح هذا الموضوع لاني شفته إنتشر في الإمارات بكثرة
المثال :
مرة كنت مارر قدام محل للكمبيوتر وكان المحل زجاج يعني اللي برع يروم يشوف داخل والمحل داخله
وحدة حرمة ويا زوجها وإبنها وكانت كاشفة الوجه (( رافعة الشيلة )) وكانت تتناقش ويا الهندي
المهم لمن دخلت وقلت السلام عليكم فورا تغشت
يا إخوان ليش هل هذا الرجل (( الهندي )) ماله نظرة ؟؟؟
وفي أمثلة وايد وقدام العيون
تتناقش ويا التاجر مهما كانت جنسيته وإسمحولي حتى العرب بس الخليجين تتغشى أو حتى بس الإماراتين وأحيانا حتى ما في غشوه
شو سبب هذا
وازع ديني ضعيف ؟؟؟ تربية الأهل ضعيفة ؟؟؟
بس بقول للإخوات إتقوا الله في نفسكم فرب الهندي كرب الإماراتي
وأترك لكم الرد
دمتم بود
اللي يشوف هالوضع مضايق فيه..او مب راضي عنه
بإمكانه يسير كل الأماكن اللي يتواجد فيها الرجال..ويا الحريم اللي يختص فيهم..
أعتقد توجيه سؤال : ليش تتغشين عن هالريال وهالريال لااااا؟؟
مب من حق أي واحد يسأله..
لأسباب عديدة:
1- احتمال اكثر اللي تشوفونهن..مب بنات البلاد…يعني تظلمون بنات الناس بس بالظن؟؟؟
2- انته وين شفتها في محل عبي والا محل ملابس نســائية أو صالون..؟؟انته اصلا شو موصلنك هنـــااك؟؟
3- البنت النظيفه والطاهره..لو ماتتغشى…يكفي انها بنت ناس وتعرف الصح والغلط……
مااعتقد فيه كلام أكثر……
انا كنت اشتغل مع هنود في مؤسسة شبة حكومية, و البنات ياخذون راحتهم وايد و يالهنود. للأسف الهنود كانوا يوصفون أجسام البنات بين بعضهم بصورة مب حلوة. و انا عرفتلهم لأني أفهم لغتهم.
يعني في الأخير الهندي ريّال بعد.
صدقك يا ريال ………انا بعد هذا التساؤل من زمان كان يدور في راسي …
ليش المواطنه او الخليجيه تتغشى يوم تشوف البائع خليجي .وتفتح للوافد ؟؟؟
وطبعا هاي العاده ليست لجميع النساء ….ولكن للاكثريه منهن ………
لكن الواحد ما يلومهن على تصرفاتهن هذي …وذلك نظرا للتصرفات الخاطئه التي يقوم بها الشاب الاماراتي او الخليجي …….وليش الكل طبعا سواء ….
يعني الحرمه مثلا يوم تسير محل العبايات …..ويكون البائع هندي او جنسيه غير عربيه ….تقدر تشل الشيله والعباه وتاخذ راحتها …..لانها تدري ان الهندي لا يستطيع ان يتلفض بان كلمه غزل او يقدر يقول شي ……..لانه يخاف على نفسه من الضرب والتفنيش والتسفير ……….
ولكن غالبيه الخليجيين والمواطنيه ..وليس الكل ….عيونهم زايغه ……….من يشوف بنوته بدون شيله او عباه ..على طول يشغل عنده قرون الاستشعار وجميع الرادارات ….ويتم يصور بعيونه كل حركات البنوته …….ويعطيها من هاك الكلام الحلو اللي ما يخلص ……..مما يسبب احراجات للبنوته وعدم الرغبه في الشراء ……..لعدم وجود مطلق الحريه في التعامل ………
وبعض البنات متعودات جذه ….من تشوف مواطن او خليجي حتى لو هي تحوط في السنتر ……على طول تقول شافت عزرائيل …..ترتبك وتتلفت وتربط نفسها بالشيله والعباه مع انها من شوي كانت كاشفه كل شي …….وهذا لعدم الثقه بالنفس نوعا ما …..والخوف من الطرف الآخر بشكل سلبي…..
هذا مجرد وجهت نظر ……
دمتم بود…….
الصراحة صحيح انها لازم تعامل الكل على انهم رجال بس الصراحة شوفوا كثير من عيال البلاد شو يسوون يوم يشوفون عباية سودا تمر عليهم.
الصراحة الكثير منهم ما يأتمنون. والهندي او الزلمة ما يسوي شرات كثير من الاماراتيين او حتى الخليجيين. شاف وحدة ما تتغشى قال تغازل وزخ تيلفونه وجيك على البلوتوث جان جهازها شغال ولا وقال يدور شرات الثعلب. والحريم ادرى بمواقفهم ويسون اللي يسوونه منها هذي الاسباب.
وانا قلت الكثير وليس الكل. وصحيح هناك كثير من الهنود والزلمات ايضا لا يؤتمنون لان في صور كثيرة ملقوطة من اصحاب المحلات لبنات اللي عندهن العبايات مفتوحة من جدام.
ظاهرة غريبة ودائما نشوفها
المشكلة في الزمن