السلام عليكم,
في ناس ما شاء الله يحبون ينشون من الصبح الباكر. يعني من بعد الفجر ما يحب يرقد, يحب يطلع ويتمشى.
وفي ناس ما تحب نشة الصبح خير شر. ينش 11 ونص وما بعد وهذاك يومه.
انت من اي نوع وليش؟
عن نفسي, احب نشة الصبح واحب اطلع, اتمشى بالسياره صوب البحر والا في سكيك فرجانا الاوليه.
لان فترة الصبح تشوف الناس هاديه, تمشي بهدوء وماشي زحمه, ولطافة الجو مفعم بالاكسجين (<< مب فاهم معناها بس يت عالبال), وتسمع اصوات العصافير. احس براحه نفسيه.
بعكس النشه المتأخره, احس ان اليوم كله طار. احس بضيق, وايي وقت الظهر, احس بصخه فضيعه, وحر ما تروم تسير مكان. والعصر زحمه وحشره واضرابه ناقص تشوف سياره تعفد فوق سياره ثانيه.
هذا بالنسبالي, شو بالنسبالكم, وليش؟
انا ولله الحمد صلاة الفجر بالمسيد ماافوتها لآن لو راحت على صلاة الفجر احس يومي كله مشؤوم
وبالطبع نشت الصبح تعطيك جو من الروحانية من عقب نزولك من المسيد اتحس بالجو العليل وأصوات العصافير اتغرد على الصبح بأصوات جميله وكلها اتسبح لله سبحانة وتعالى وتحمده وتشكره على نعمة هاليوم الجديد المفعم بروح الأيمان والصفاء روح التواصل بالخالق العظيم سبحانة وتعالى .
انا من الناس اللي تحب نشة الصبح
وخاصتن بعد صلاة الفجر اسير اتمشى مع الشايب وربعه (رياضه وفي نفس الوقت سوالف واخذ علوم)
وجو الصبح ماشي بعده يتسم بالهدوء ويكون منعش بالهواء الصافي وتسمع صوت العصافير
بس مرات يختبص عندي الوقت وخاصتن يوم يكون عندي الاجازه اقوم متاخر من النوم
وعليكم السلام ورحمة الله وبركاته
sam sam
اللهم رياضة بعد الفجـــــــــــــر مباشرة .
ما شي مثل نشة الصبح اختي وما شاء الله على يدوتج تعرف اهمية الصبح, الاولين يعرفون الدين اكثر عنا الحين.
مريت بأيام السهر فالليل. حسيت عمري خفاش. خخخخ. مخالف الخلق. من انش على الظهر, خلاص اقول اليوم خلص.
مشكوره اختي روح وريحان على المشاركه.
احلى شي يوم تشوف دلة الجاي والقهوه ميلسه وخبز الخمير توه مسواي والدبس حارينه لك وباب الصاله مفتوح وتشوف النور توه فبدايته وتشوف الجيران ايونك. هذي يلستي انا والوالد قبل. ما قمنا نشوفها الحين.
ذكرتنا وشوقتنا اخوي الشامسي لذيك الايام.
شكرا على مرورك الكريم.