في شي بخاطري ابغي اقوله بخصوص زواج كبار السن من اجنبيات بشكل خاص و زواج الشباب من اجنبيات بشكل عام
اخواني الموضوع خطير جدا في نظري و اعتقد هو سبب العادات و المشاكل الاجتماعية الدخيلةعلى الدولة فالمجتمع الاماراتي محافظ
الرجل الكبير في السن لا يفكر سوى في زوجة ذات مهر رخيص
وطبعا هذه الزوجة داخلة على طمع
و لا يفكر في عواقب هذا الزواج و في الابناء
دائما الابناء هم الذين يدفعون الثمن في مثل هذه الزيجات
يتوفى الاب الكبير في السن
و يترك زوجة شابة يصعب عليها تعليم ابناءها لغة و عادات هذا البلد و تعلمهم عاداتها و تقاليدها
ديل بيرو: بالنسبة للسيارة الراهية …ربيعتي نصحتها بس ماشي فايدة راتبها لا يتعدى 8500 و قبل اجازة العيد طلعت لكزس IS لانها ما رامت على ال gs والحين بتم تدفع فيه 5 سنوات و تقولي انا من الشهر الياي لازم اضغط على نفسي شويه عشان اقساط السيارة !!! محد ضربها على ايدها…. قلت لها خذي كامري و الكامري اليديدة حلوة جنها لكزس :rofl: بس البنية ما اقتنعت…تقريبا اغلب البنات اللي اعرفهم سيايرهم راهية بس باقساط
بس يا اخي الكريم في النهاية البنت مب وراها مسؤوليات نفس الرجل من بيت و زواج و غيره :hhhrr5:
شو عندها غير اقساط السيارة و بعدين نص راتبهم على المظاهر و باريس غاليري
يا اخوي الانسان لازم يبدا حياته بالتدريج و يوم بيصير عنده فلوس مافيها شي لو فكر بالسيارة الفخمة لان طبيعي الانسان يبغي الافضل
وبعدين يا اخوي اذا انت تؤيد زواج المواطن من اجنبية فلا تلوم البنات و الجيل القادم منهن اذا لقيت فيهن العجب العجاب و الانحدار الاخلاقي
مشكوره بزنس وومن على الموضوع الحلو
نعم صدقتي والله وايد من المشاكل انشوفها بسبب زواج كبار السن من اجنبيات
حتى زواج الشباب من اجنبيات لها تأثيرات سلبيه كبيره مثل ادخال العادات السيئه لبلدنا مب عن طريق الزوجه بل عن طريق اهلها مثل شرب الخموروالعلاقات المحرمه
اخي الكريم بالعكس انا ما ذكرت اي جنسية وانا احترم الجميع و لكن موضوعي نابع من غيرتي على هذا الوطن و اسمحولي اخواني الاعضاء و القراء انا ابدا لا اقصد الاساءة و الاحراج و لكن هذا الموضوع من الواقع ومافيه شي يزعل و هو للمناقشة لا للاحراج و لكن للصراحة
خبرني يا اخوي انا شو خسرانة من زواج الرجال من اجنبيات و خاصة كبار السن في النهاية الابناء اللي راح ينولددون من هالزيجات راح يتضررون وانا اقول هالكلام و فتحت هالموضوع لان قلبي يعورني على هالاطفال بصراحة اشوف ان مالهم ذنب
الاخت الكريمة بزنس وومن
حقيقة موضوعج شائك و طويل و يباله كتب تؤلف له
قبل لا ابدأ في الرد
اقول حق اخونا المرزوقي :
الله يوفقك يا خوي و يرزقك بالذرية الصالحة
و خير متاع الدنيا المرأة الصالحة ( لم يذكر الحديث الشريف اي جنسية )
بداية احب اقولج اختي ان لكل ظاهرة استثناءات كثيرة
يعني ما نروم نعمم ان الزواج من اجنبية ظاهرة غير صحية بنسبة 100%
ااعطيج مثال لج انتي و لبقية الاخوات في المنتدى لأني بصراحة كل ما ادش اي موضوع يتعلق بالزواج اشوف الحريم ينتقدون الشباب في انهم يصرفون و يتدينون من البنوك حق شراء المواتر لكن لحظة الزواج يقولون ما عندنا
اقولج على معلومة :
لي زميلة مواطنة تدرس معاي في الماستر و عندها هامر H3 و انا عندي تيوتا Yars
اتذكر في محاضرة لنا قالت للدكتور ان شبابانا يصرفون على مواترهم و يهتمون بها بشكل مبالغ فيه
جان ارد عليها و اجعمها :
شو موترج انتي ؟؟؟
قالت لي هامر
قلتلها قبل لا تحاسبين الشباب على بذخهم في شراء المواتر شوفي عمرج ، انتوا الحريم على كيفكم تشرون اي وتر تبونه ، لكن الشباب ممنوع عليهم جذة !!!
يا سلام على الأنانية !!!
طبعا ما رامت ترد علي
انا ما اعمم على كل البنات
و نفس الشي اتمنى من البنات ما يعممون على كل الشباب لأن انا مثل ما خبرتج عندي تيوتا يارس يديدة جيمتها 42 الف درهم
و فوق هذا كله ما اروم اتزوج مواطنة
الكلام وايد سهل ان المواطنة ترضى بالقليل و رضى تسكن مع اهل الزوج
لكن مثل ما قال اخوي ون مور :
ان لحظة الجدية و الزواج تطلع طلبات و امور ما انزل الله بها من سلطان
يعني في موظفة زميلة كانت تداوم معي قبل في بلدية دبي كان مهرها حسب ما سمعنا 300 الف درهم و عرفنا لأن السبب ان اختها المتزوجة كان مهرها جذة
يعني التقليد الأعمى
انا معاج شي مواطنات ربي يحفظهن من كل سوء و النعم فيهن و اهلهن بالفعل ناس متدينين و قنوعين و غير مبالغين في عملية المهور
لكن هذيل صعب الواحد يحصلهم لأنهم فئة قليلة في المجتمع
الحين لوبكتب عن سلبيات و ايجابيات الزواج من اجنبية ما رح اخلص
لكن انا اؤيد اخواني اللي يعانون يوم يبون يتزوجون من مواطنة انهم ياخذون اجنبيات
ليش ؟؟؟
لأن هذا هو الحل و لا الوقوع في الحرام ؟؟؟
شو الأفضل ؟؟ اتزوج و احصن عمري بغض النظر عن الجنسية و الا اتريا حد يتعطف علي و يرضى بظروفي و يزوجني بنته ؟؟
و يوم تقولين خله يتسلف من اهله
شي ناس ما تحب مساعدة الأهل و لا الاقتراض من البنوك
لأن احيانا الأهل يكونون اصعب من البنوك
عموما انا بس حبيت ارد على النقطة اللي استوت لبانة في حلوج الحريم : :dddff:
” ان الريال بس يحب يصرف على الموتر ، لكنه ما يستكثر اي مبلغ في الزواج “
و هذي علة يقولونها الحريم عسب يغطون على طمع اهاليهم في المهور و المبالغة فيها
و اللي عندها رد او احصائية ان كل الشباب جذة تحطها هني عسب اناقشها :064:
لكن مب اعمم كل ظاهرة على كل جنس و نوع
و اذا كانت هذي هي المسألة اروم اعمم وايد ظواهر اشوفها على بناتنا هذي الأيام
لكني اعرف ان اصابعج مب شرات بعض
عموما
يعطيج العافية اختي على موضوعج الحساس
تقبلي تحياتي العطرة
و الله أنا اشوف ما فيها شيء ……………. شو يعني صارت أهانه للوطن لو ريال مسلم تزوج امراه مسلمه من جنسيه ثانيه … حتى لو كبير في العمر … ما في شيء في الشرع يحرم على الرجل ذلك الفعل … و بعدين الاجنبيات في منهم افضل من ألف مواطنه … و العكس صحيح طبعا .في بنات مواطنات افضل من الف اجنبيه ……… و لا تنسون في ناس هني في المنتدى امهاتهم او زوجاتهم اجنبيات فأرجو أن لا تحرجوهم ببعض الردود . و في النهايه اختيار الزوجه حريه شخصيه للشخص و ما نقدر نفرض على أي شخص اختيار زوجه من جنسيه محدده فقط .
مشكوره بزنس وومن على الموضوع الحلو
نعم صدقتي والله وايد من المشاكل انشوفها بسبب زواج كبار السن من اجنبيات
حتى زواج الشباب من اجنبيات لها تأثيرات سلبيه كبيره مثل ادخال العادات السيئه لبلدنا مب عن طريق الزوجه بل عن طريق اهلها مثل شرب الخموروالعلاقات المحرمه