السلام عليكم ورحمه الله وبركاته
اخواني مشرفين واعضاء المنتدى حبيت اشكركم على المنتدى الطيب والمشاركات الطيبه
لاحظت بعض الناس يعرضون بضايع ويغالون في اسعارها مغالاه غير طبيعيه وانحن في سوق مفتوح والكل حر في ماله
ومن قوانين المنتدى عدم ابخاس البضاعه بالسعر او النوعيه
ولكن نقطتي انه السوق نصيحه وشور ولو حد يعرض شي غالي وانا اعرف وين احصله بسعر احسن انصح الناس اقولهم في المكان الفلاني بيكون بسعر فلاني … بس اكون متاكد من انه نفس النوعيه والجوده او حتى ممكن انه يكون مطابق للمعروض
حمدلله خبرتي فالكمبيوترات زينه والاحظ المعروضات من اكسسوارات الكمبيوتر مثلا.. شي منه ممكن انا انفع الناس واقدر ادليهم من وين اييبونه ارخص … موب اني اخرب على تجار المنتدى بس بعد شوي الزمهم المنافسه بسعر السوق موب كانه محتكر لانه الناس ما يعرفون من وين يشترون هالبضاعه
وحمدلله البيع عالنت مفيد لا اجار ولا عماله ولا اوراق ومعاملات بلديه وعمل وعمال وتفتيشات وغرامات
وليش احصل صاحب محل يبيع ارخص عنكم والله يخليكم لا تقولون يشتري بالجمله لانه ماشالله عندنا ناس يبيعون بالجمله
وسلمتوا
اتمنى فتح مجال المداخلات وتناقش الاسعار بحدود المعرفه وانه محد يفتي بدون مصدر وتوثيق
اتمنى الفكره وصلت واتريا ردود الاعضاء والمشرفين
ما يصير هالكلام لأن السرقه حرام ان شاء الله من كان يكون. اعتقد خانك التعبير اخوي في هالنقطه.
وموضوع رفع الاسعار والفوايد الجنونيه هذا لا يرضاه بشر ولكن الزياده في السعر بالشي المقبول ويفدى ولد او بنت بلادي وغيره كل مسلم يترزق الرزق “الحلال” وغير هذا المثال من الافضل انه يراجع نفسه ويعلم ان المال زائل اليوم ولا يكره.
اشد على ايد صاحب الموضوع واتمنى ان يكون هناك من الاعضاء مثلك يفيدون اللي ماعندهم خبرة في بعض السلع واكيد مع الالتزام بالامانه والصدق في عرض المعلومات والسعر وبا حبذا بروابط للتاكيد او ارقام هواتف .
ومثلما يوجد من لا يذكر سعره الاصلي مثلما لازم يوجد في المقابل من يذكره ويذكّره ان الله يراه.
واسمحولي عالاطاله
وارجوا من المشرفين عدم مجامله اي شخص على حساب الاعضاء والزوار .
شـكــ وبارك الله فيك ـــرا لك … لك مني أجمل تحية .
التجاره شطاره
والواحد يوم بيرفع فالسعر مب يعني غاشنك هذي تجارته وهو حر فيها
انته ناسبك السعر اشتري ماتبا براحتك بس ليش اروح اخرب عليه
انا فنظري خلو الناس تستفيد كيف ما تبا بس بدون غش يعني ما يكون وصف السلعه شي والسلعه شي ثاني
والسموحه
أخوي كل تاجر يطلع ربحه من السلعة اللي يبيعها و هالشي طبيعي …يعني كل واحد و ظرفه كيف انه جاب البضاعه يمكن في بعض التجار يستوردون البضاعة من أماكن بعيدة يعني شحن و غيره من التكاليف غير المجهود اللي يبذله في عرض السلعة من تصوير السلعة و تحميل الصورة و ارفاقها في الموضوع و رفع الموضوع بعد هذا كله جهد و لا زم يكون دايما اون لاين…يعني لازم الواحد بيزيد من سعر السلعة و كل واحد حر سواء الزبون او التاجر …
و السموحة على الاطالة
أخوي شكرا على التعليق والملاحظة الطيبة ..
فعلا في بعض البضايغ اغلى من السوق .. لكن حتى لو انت نتأكد من ان برع ارخص مايجوز تعلق عالعام بأن السلعة الفلانية ارخص برع إلخ … لانه مخالف لقوانين المنتدى ..
اغلبية الاعضاء يشترونه من برع ويبيعونه بفايدة بسيطة … وانا ما اعترض على الشي بالعكس ياخي ” كل واحد يشتري راحته بفلوسة ”
يعني انت يالس ف البيت وتطلب وانت يالس والبضاعة توصلك لين باب البيت وتباه ارخص عن السوق !!!
ثانيا .. ولد البلاد اتشد على ايده وتساعده حتى لو يبيعلك اغلى ماشي مشكلة .. في النهاية هذا ولد البلاد وولد الامارات ..
ولو ماحبيت اتساعد ولد البلاد .. بتلاقي اعضاء اسعارهم حلوة الصراحة وممتازة ونادرة في نفس الوقت ..