همستي الثالثه

[بسم الله الرحمن الرحيم
السلام عليكم ورحمة الله وبركاته
اخواتي وأخواني مشرفين واعضاء وزوار هذا المنتدى الغالي, سآخذ من وقتكم القليل بهمستي الثالثه واتمنى ان تتقبلها قلوبكم من شيبتكم , وحرصت ان اتعجل في الهمسه والتى كانت حسب تقديري للوقت بان تكون في نهاية شهر يوليو . ولكن رغبت انا اكتبها اليوم بعد الفتره الغيابيه لانشغالي ,,ولما لها من اهمية في هذا الوقت.
سنأخذها بشكل سيناريوا جميل تسهل للمبتدئ فهمها وتزيد معرفه لاصحاب الخبره .
وقبل كل شي سأبدأ عن المنتدى لانني اليوم تصفحت بشكل سريع جميع المواضيع التى لم اتمكن من قرائتي لها وملاحظاتي :
الحمد لله الهمسه الثانيه كانت لها صدى كبير في تقيد الاخوه الاعضاء في المنتدى ورأيت حرصهم وغيرتهم عليه وحبهم وتآلفهم مما افرحنى ذلك.. بس البعض بعده يفتح مواضيع جديده مع العلم يوجد موضوع مسبق لكن ان شاء الله بيتقلص والسبب لانه لو كتبت في الموضوع الاول وزيدت عليه , غيرك بيقراه من اول وبتكون عنده خلفيه تامه واعتقد بيشارك براي قد يكون غايب عنك .
_ واهم شي انه بدت الاشاعات تتقلص عندنا ويوقفولهم الاخوان وقفه يبل .. لكن اقول هب الكل يمكن تستفيدون من الاشاعه وتكون فرصه للمضاربين الاعضاء لاستغلالها .
كلمة جزاك الله خير لا تاخذ منك وقت وانما ستزيدك حسنه لانه ردك قد يحترمه الاخوان الاعضاء ويقدرونه منك .
كذلك خفت الاسئله اللي ادور حول انا عندي المبلغ الفلاني وابغي اشتري وشو تنصحوني مما يدل بانه بدأ السائل يبحث في طيات المنتدى وقد يحصل على اجابته والحمد لله بدت اتخف.
– اقلام جديده بدت تظهر وتكتب وهذا شي مفرح واقولكم بارك الله فيكم .
نصايحي اليديده :
في السوق : نحن نعرف الان قربت الشركات عن الاعلان عن نتائج الربع الثاني
والبعض من الخبراء ينصح في السوق والبعض الاخر يحذر من السوق والبعض الاخر يغني على ليلاه( الخبير دباس والكسواني وقرقاش) .
فالباقي علينا نحن. كلهم اللي ذكرتهم اصحاب محافظ كبيره وهمهم الاول والاخير فلوسهم وتراكم محافظهم بالبيزات يوم نرى قناة دبي تستضيف الكسواني ويوم نرى بالعريض في الجرايد ويوم نرى قرقاش يستهزي بطريقته الخاصه على الشركات ..ويبين انه قلبه على صغار المستثمرين ولكن بعد ماذا ؟
المهم لا يهمنا هذا الامر ولكن اود ان اوضحه للاخوان وحركت السوق الحاليه حتى نكون في السيف سايد بر امان .بر امان شو الشيبه بديت تخور بر الأمان لاه..دعابه..

قد يكون البعض متحفز الان لدخول السوق بعد اخذ اجازه الصيف ليقضيها في السوق المالي ولكن اقوله دش السوق والسوق فيه خير لكن بحذر .. لاتكون فريسة الهوامير واصحاب المحافظ ..
– عدم الشراء الان باسعار غاليه الا للشركات التى تملك محفزات وهدفك الاستثمار فيها لاخر السنه .واقولها بالمفتوح بعد وضوح الرؤيه الشركات القياديه والتى لها وزنها في السوق وسوف لن تتأثر بالنزول او التصحيح مثل دبي الاسلامي واعمار وبعض الشركات التى سوف ترفع راس مالها ويتبين ذلك من خلال المتابعه لحركة الاسهم في السوق .
– عدم البيع بخساره للحاق بشركات اخري قد تخسر الاثنين

– لو رجعنا فقط لثلاث اشهر للوراء وتمسك الجميع باسهمه ولم يبع .. متأكد بانه محد خسر وندم على بيعه لاسهمه في ذلك الوقت فاقول علشان ما تندم بعد ثلاث اشهر تمسك في اسهمك ولا تبيع.
– يدهشني بعض الاخوه لما يقول انا ماربحت اليوم وعنده اسهم مستثمرنها وقاعده ترتفع فتاكد انك تربح في هذا اليوم حتى لو مابعت واشتريت .. ومن تملك سهم ومكانك سر ولم يتحرك منذ اشتراه واعني الحركه هنا من شهر الى شهرين فيجب اعادة تنظيمه ويبدأ من جديد ان كان سهمه نزل يدخل المنتدى وهناك مواضيع وأسأله طرحت من اخوان وقوبلت بردود متعوب عليها .واذا ما حصلها يسأل والسؤال ما فيه شي وجميع الاخوان ما بيقصرون وياه
– كذلك هناك نقطه مهمه اغلب الشركات حاليا منفوضه يعني ما عندها أي ورقه رابحه ولا جوكر فيجب عليك اخي المستثمر المراقبه الجيده واطلاعك على تقارير الشركات اول باول وعدم بيعك باسهمك بخساره فتأكد ان ستربح في النهايه
– لاحظت في هذه الفتره مناورة اصحاب المحافظ والتجول بين الشركات لهدف المضاربه .. فلا تتبعهم ابدا لانهم يملكون الخبره والسيوله والوسيط المتحرك فقط نصيحه عن لا تتعلق ويوم تصد ما تحصل حد وياك الا انته وكم نفر وضلتك توهكتوا في السهم
– نقطه ايضا مهمه احيانا تجد السهم الذي اخترته سواء للمضاربه او الاستثمار خانك .ومجرد ما تحس انه هذا السهم هب حليفك احسب خسارتك وبتكون بسيطه وركز على سهم تعوض فيه خسارتك بسرعه ولا تنتظر وهذا هب نقيض فيما قلته سابقا بان تتمسك بسهمك ولا تبيعه بخساره .. لا .. فرق بين المستثمر المشتري برخيص وفرق بين المضارب المشتري بغالي وبيبع بفارق بسيط في الربح.
مثال بسيط : مره اشتريت سهم للمضاربه لمدة ثلاثة ايام وما بذكر اسم الشركه بس يمكن تعرفونها من الارقام .. لاني رايت اتجاه المحافظ وكانت لعبه واتفاق بينهم لرفع السهم لما كان على 7 واشتريته على 6.60 للخروج منه على 6.95 وما ان انتهت المده حتى احسست بان السهم او مدة المضاربه غير كافيه .. على طول حسبت خسارتي فكانت بسيطه وقمت بتسييل ما املكه من السهم على دفعات وبفارق 20 او 30 فلس .. هنا انا مضارب يومي يجب ان اخرج من السهم . لكن اذا كنت مستثمر او مضارب اسبوعي ومتأكد بان السهم يرتفع يوما ما .. ساقوم بتعديل السعر واشتريه في النزول مره ثانيه وقد ابيعه يمكن بربح ويمكن براس ماله , لكن بيعي للسهم لاسباب احتياجي للسيوله وكان وقتها وقت دخول لسهم ايضا قد تابعته فتره ولابد من دخوله في ذلك اليوم والحمد لله دخلت وخرجت من السهم في اليوم الثاني بربح عوضني الخساره .

– نقطه مهمه الحين بتقولون هالشيبه يقرا احساسنا ,, احيانا تبات تفكر وتخطط لسهم تشتريه باجر وانته متاكد وخلصت الورق من كثر ما حسبت الارباح ودخلت المنتدى ونجلت الموضوع وصبحت الصبح تعطي امر للوسيط انه يشتريلك السهم وتتفاجأ بواحد احذالك له خبره او يدعي الخبره يقولك السهم لفلاني بيرتفع وعليه اخبار او الوسيط يقولك سيبك منه المحافظ مركزه على السهم لفلاني ,, على طول خطتك تذهب سدى واتغير رايك وتشتري غير لمخططنه .. وتتفاجأ بالاحباط عقب وتقول انا شو خلاني اسمع رمسة فلان .. خذ نصيحة شيبتك ان كنت شاطر ومتابع يوم بتعزم وبتضارب لا تتشاور على طول حتى بعد لا تصد منه ومنه وترمس حدعط امر واتكل على الله وشوف واختبر مهارتك .( مجرب) بس ان شاء الله ما تختار سهم منتهية صلاحيته وتعقه في راسي عقب.
– احيانا تبيع سهم صابر عليه مده وحصلت فايده فيه وتشوفه طار عقب مابعته ,, مثل ما حصل لاملاك بعض المستثمرين كان هدفهم 8 دراهم والحين لما وصل 14 يالس يولول ..
هذا نصيبك ويجب ان تكون عندك قناعه وايضا غيرك بيربح .. فاذا قنعت وشكرت ربك على الربح البسيط بنية صادقه صدقني الله بيعوضك بسهم بربح قد لا تحلم فيه
ايضا مجرب
– الان وبعد توزيع الارباح للربع الاول يجب اعادة التنظيم لمحفظتك ودراسة جميع الشركات وشراء اسهم لم تأخذ حقها في الارتفاع والاحتفاظ بها حتى نهاية السنه خاصه شهر 8 و9 و10 شهر 12 شوف ربحك فيهم
– كثرت التساؤلات عن سهم اعمار وهو السهم القيادي لسوق دبي وهذه صراحه يجب ان لا ننكرها لانه دائما السوق يرتفع اذا ارتفع اعمار .. بعض الاخوان محتار هل ينتظر او هل يبيع واللي باع يفكر هل اشتري على هذا السعر ولا انتظر عقب ما ينزل السهم . شوفوا يا اخوان اذا يلستوا تفكرون وتشغلون بالكم وتتحسرون انكم بعتوا وتعدون وتقول لو ما بعت انا بصبح مليونير .. هذا الجلام فكرنا فيه قبل وما حصلنا فيه نتيجه غير التعب والارهاق الفكري …
سهم اعمار اغنى الفقير وزاد الغني غنى واللي ما اتوفق فيه هذا نصيبه وقسمته ويجب ان يرضى بها وان شاء الله بيعوض في اسهم احسن .
ابدا لا تتردد حتى الحين ان حصلت ربح فيه بيعه لا تصر انه بيوصل الرقم 60 او 70 او 80 ويمكن يوصل اكثر .. لكن هل تضمن .
انا بسوي هالطريقه لاخفف التفكير على البعض من الدلائل الواضحه انه السهم بيوصل 50 بسهوله وان شفت من خلال مراقبتي للسهم انه بيوصل اكثر بزيد 55 وبظهر من النص بربح مضمون والنص الاخر بكتتب فيه . لكن هذا ليس تشجيع للبيع او الشراء لاني متابع ومضارب ومستثمر في نفس الوقت .يمكن ما يوصل يمكن يصل خبر ويرجع السهم ويمكن خبر يظهر السهم الله واعلم .. والان نحن في ما زلنا في بحر الامان عندنا العقل للتفكير ما علينا غير المتابعه واتخاذ القرار .. لانه متاكد اذا نزل او ارتفع السهم عقب ما نبيعه بيظهرون الاخوان حط على الشركه والشفافيه .. الخ .
– النقطه الاخيره : واعتبروها اهداء من شيبتكم من اراد ربح في خلال من 15 يوم ومن اراد ان يستثمر الى آخر السنه هناك سهم طبلنا عليه وايد مجلمكم والاستاذ الغالي والعزيز اخي بن دينار الله يوفقه يارب في دراسته وبعض الاخوان الاعزاء ايضا انصحوا فيه . وهو سهم دبي الاسلامي . اذكر وصينا عليه من فتره وكان ارتفاعه من تلك الايام الى الان 100 درهم واللي اشتراه وباعه بربح مبروك ويستاهل واللي اشتراه ولم يبيعه الله يوفقه ويظهر بربح وما زالت الفرصه موجوده للاستثمار فيه فاعتبروه هديه من شيبتكم . بس نصيحه القناعه كنز لا يفني يجب ان نتحلى بها ونهذب انفسنا عليها .

:ar113: