هيروز و سوبرناتشورال؟ حقيقه ام خيال؟

هيروز و سوبرناتشورال؟ حقيقه ام خيال؟

السلام عليكم و رحمة الله و بركاته

هالموضوع كان في خاطري اكتبه من كمن شهر تقريبا بس كنت متخوفه من الاستهزاء اللي بييني

في النهايه قررت اكتبه و اشوف اذا في حد شراتي يصدق في الامور الخارقه للطبيعه او على الاقل امكانية حدوثها

لان اغلبنا ما يصدق بالشي الا اذا شافه بعينه و لمسه بيديه

و احب في البدايه اذكركم بأيه من سورة البقره

آية الكرسى
(البقرة 255)

بِسْمِ اللّهِ الرَّحْمنِ الرَّحِيمِ
‏﴿اللّهُ لاَ إِلَهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَّهُ مَا فِي السَّمَاوَاتِ وَمَا ‏فِي الأَرْضِ مَن ذَا الَّذِي يَشْفَعُ عِنْدَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ ‏يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ ‏حِفْظُهُمَا وَهُوَ الْعَلِيُّ الْعَظِيمُ ﴾‏

اللي شاف مسلسل هيروز ..شاف كيف بعض الناس عندهم قوى خارقه للطبيعه ..و نحن نقدر نشوفها شرات اللي سياره تطوف من فوقهم و لا ينكسر لهم عظم ..او اللي يسحب طياره بذنيه بدون ما تنقص ..و يحطونهم في الاخبار و الجرايد

و اللي شاف مسلسل سوبرناتشورال ..اساسا نحن كمسلمين نصدق في وجود الجن لانهم مذكورين في القران و ايضا في الارواح اللتي في برزخ لا يعلمه الا الله سبحانه و تعالى الى يوم الحساب

انتبهت لعدة اشياء في المسلسل اللي هي قصة ابليس و كيف كان من اجمل الملائكه و لانه رفض يسجد لادم عليه الصلاة و السلام ..استغربت كيف المسلسل كرر هالقصه مرتين طبعا بدون تجسيد ..و كيف ان ايضا النصارى يعرفون هالقصه

و شي ثاني شد انتباهي اللي هي ام الدويس اللي كلنا نعرفها يوم كنا يهال ..و اسمها بالانجليزي شرات ما قالو في المسلسل اوديسي ..يعني تشابه الاسماء

و ايضا امور السحر ..اللي كنت اعرفه ان اخطر انواع السحر اللي ينحط في مفترق الطرق ..و اكتشفت انه مذكور ايضا في المسلسل

و البارحه شفت في الملحق الطبي اللي ايي ويا الجريد عن بنت ينجلع يلد جسمها كل فتره و تذكرت كانو في المسلسل ذاكرين مخلوق اسمه shape-shifters ..احس عادي تكون منهم يوم بتكبر..هذا لو طبعا مرنت مخها و قدراتها على هالشي

من غير اللي ياكلون الاوادم و تصير لهم قوى خاصه.. و هاييل وايد كانو مشهورين في الباطنه من زمان ..و قصص يدودنا و يداتنا تشهد و لو نحن كنا نتحراها خراريف الاوليين

المهم انه في اشياء وايد تخلي الواحد فعلا يفكر …

عموما هاي مب دعايات للمسلسلات المذكوره ..بس كنت ابا اعرف هل فعلا في اشياء خارقه للطبيعه لهالدرجه؟؟

السحر مذكور في القران و كلنا نعرف عنه بس شخصيا ما تخيلت انه ممكن يكون من القوه انه يأثر في حياة الناس بهالطريقه ..و هو طبعا قوي كما ذكر في القران الكريم..بس لان يمكن لان عمري ما تعاملت بهالامور و لا صار لي اني اشوف شي قريب مني يصير له هالشي ..عشان جي مول مب حاطتنه في بالي

هالاشياء خلتني احس ان في طبقه ثانيه و مختلفه من الناس بينا بس يخفون عمارهم عسب ما يحسسون الناس انهم مختلفين او غريبين

هل فعلا في ناس لهم قوى خارقه للطبيعه؟ و احس حتى لو كانو فعلا موجودين ..في مجتمعنا بيتحرووون عمارهم ممسوسين يعني فيهم جني
و لو كانو في مجتمع اجنبي بيتحروون عمارهم فيهم حاله نفسيه و بيسيرون يتعالجون عند دكتور نفسي؟ على اساس انهم يشوفون هلوسات و من هالامور

و سؤال اخير اتمنى ما تتجاهلونه.. الانسان اللي يشوف رؤى و هو صاحي يعني مب راقد ..يعني مب احلام و تتحقق خلال فتره ..هل هالانسان يعتبر طبيعي و الا ممسوس و الا مريض نفسي؟؟ و الا سوبرناتشورال و المفروض يكون فخور بنفسه؟ << اللي فيه هالشي يراسلني على الخاص لان ابا اعرف شي مووهيم

و يلا اللي يبا يتمصخر على الموضوع يتفضل ..تراني حطيته و بستحمل اللي بييني ..بس اتمنى احل لو شخص واحد ممكن يفتح مخه وياي شوي

و السموحه من اللي ما فهم من الموضوع شي