السلام عليكم ورحمة الله
مشكلتي بكل بساطه عن الخدامات الفلبينيات
لين الحين صرت يايبه 4 خدامات فلبينيات والوحده ما اتكمل عندي شهرين واتقولي ما ابا اشتغل
انزين ليش الحين وشو السبب ؟؟؟
اول شي انا يالسه فشقه غرفتين وصاله ومطبخ يعني على قدي انا وعائلتي وعندي بنت وولد الحمدلله .
والله والله والله انه لا اخليها تطبخ ولا اخليها تغسل ولا اخليها اتنشف ولا اخليها ادق العيال من اكل ولبس وشرب وسبوح وحتى ريلي ما يطلب منها شي واصلا هو ما يحب ياخد شي من الشغالات بس اخليها اتنظف وتكوي الثياب وانتو تعرفون الشقه صغيره وما فيها شغل وايد وحتى طبعا يوم اطلع ما اخلي العيال وياها هذا من سابع المستحيلات .
اخلي الشغاله اتنش سبع الصبح والله الريوق واغراض عيالي حق المدرسه والثياب والشنط انا احضرهم وترقد من الساعه ثمان او تسع فالليل .
انزين الحين شغاله ودافعه عليها دم قلبي وانتو عارفين كم تكلف وما عندها شي وايد تشتغله ويوم اسألها ليش ما تبين تشتغلين اتقول ما ابا !!!!
انا ما اقدر اغصبها اوديها المكتب وعقب كمن يوم اتقولي انا برد خلاص وطبعا ريلي ما يرضى لانه من اول يقول اللي تطلع ما اترد يمكن سبحان الله المكتب يغصبها اترد وعقب اطلع حرتها بالعيال لا ما نبا وانا اصلا اييب فلبينيه عشان الانجليزي وهم نظاف اكثر من غيرهم .
الحين هل انا الوحيده اللي عندي المشكله وياهم او اشو السالفه ما ادري ؟
الحين بييب اثيوبيه وبشوف انتو شو رايكم فيهم ؟؟
بيسوون نفس الشي ام انا حظي تشي ؟؟ مع العلم انها الصبح اتم بروحها لانه نحن انداوم والعيال فبيت اختي يعني تاخد راحتها ولا والله حد يزعجهم او يقولهم كلمه تشي او تشي والله شاهد على كلامي
ليش ليش ليش ما ادري 
اختي الكل يعاني من هالمشكلة نحنى نفس السالفة ساعات ما نبا نشتغل وساعات يشردن ولا لهم اثر والله تدلعينهم ما تدلعينهم كله واحد عندهم
صدق يمكن من الملل
انتي لو حسيتي انج فاضيه نص ساعه ماتسوين شي بتتضايقين وايد تخيلي طول فترة شغلها اتم جيه ماشي شغل غير 4 ساعات فاليوم كله
خليها تشتغل
ييبيلها كتاب طبخ تطبخلكم منه حتى لو ريلج مابياكل اكلي انتي والعيال
لا تخلينها تيلس بلا شغل
خاصه انها مابتكون تعرف حد وفبلاد غير بلادها
اختي شقه بس حجرتين وصاله!!!!!وتيبين خدامات؟؟
سمحيلي هذي بطره !!
الحين مدام انج انتي تقولين اتسوين كل شي ،، يت على سالفة الغسيل والكوي
والله الغساله ينحط فيها ماي وتغسل وتنشف برحها والكوي مايباله شي مدام عندج بس ولد وبنت يعني كم بتلبسون بليووم ؟!
اختي ودري عنج الخدم وعيشي مرتاحه افضل لج ..
ان شاء الله يوم بتسوين لج بيت عود ييبين لج خدامه ^_^
خواتي الحين الله يعطيكم العافيه ومشكورين ما قصرتو كلكم وارائكم صدق وايد مفيده والواحد يسمع ويتعلم
ومثل ما قالو بعض الخوات الشقه صغيره وهن يملون بروحهم ونحن قصدنا انا انريحهن مب اكثر
انا انشالله باخد بنصيحت الخوات وبصلي الاستخاره وبدعي يوم انييبها البيت انشالله
انا استنتجت انه الدلع وايد مب زين والقسوة وايد مب زين ترى كله هذا باجر منتحاسب عليه جدام رب العالمين
دوري لج مكتب زين اول شي شوفي المكتب مايكون مرجع فيه خدامات وايد واذا عندج حد من اهلج عنده خدامه اوكيه تخذي منها صورت جواز اختها