بسم الله الرحمن الرحيم
في البداية وقبل ما ادخل فالموضوع حبيت اقول كلمة ” الله يرحم زايد بن سلطان ال نهيان ويدخله فسيح جناته ويطول عمر شيوخنا ويديمهم فخر وعز لبلادنا ”
……………………
من اسم الموضوع يبن اني اتكلم عن اهل الامارات بدون استثناء سوا كان في الغربية او الشرقية او الشمالية او اي مكان عالخريطة زايد المهم ياشباب ما تلاحظون ان شباب الامارات في الوقت الحالي دخلت عليهم معتقدات غربية غريبة تروح المولات تشوف شباب لبسين الجنز والشعر اصفر واحمر الله يرحم ايام اول يوم كان الريال يفتخر بكندورته وعقاله بس الحين نشوف العكس يوم تسال ليش يقولون موضه مدام موضه ليش الغرب مالبسو كندوره وغترة وعقال مثل انتو مالبستو الجنز اما المشكلة الثانية الله يهديهم الجنس الثالث شو اسباب انتشار الجنس الثالث هل من قلت الدين او من التربية او من وقت الفراغ محد يقدر يجاوب غير شخص عايش الحلة انا من وجهة نظري ان الفلوس تغير النفوس بس بعد في شباب ونعم فيهم ويقدر الواحد يعتمد عليهم ولو مب هالشباب كان ما شفنا الامارات مثل ما هيه الحين والفضل كله الله ثم شيوخنا ثم شباب لبلاد الله يحفضهم .
طبعا ما بنسا البنات بس حبيت ابداء بشباب عشان ما يعتبرون البنات كلامي من باب العنصرية البنت اول تنش من صباح الله خير وتخبز وتنظف اما البنت فالوقت الحالي تسهر لين الصبح وتهتم للبلاك بيري والمسن والشات اما العباية لي تم اختراعها عشان تستر صارت تفضح وصارت انواع منها الفراشة وباجر الخفاش والله يستر بعد شو بيطلع شئ يديد ومثل ما قلت لشباب اقول للبنات هالكلام مب لكل البنات انما لبعض البنات اما الباقي الله يخليهم لهلهم وبلدهم .
ثانكس عالمرور والكلام الطيب
ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ
ثانكس اختي بنت الامارات عكلامج الطيب وها اكبر دليل ان البلاد بعده بخير وفيها بنات وشباب ونعم فيهم
اخوي الوطر هذاك مب شرات الوطر الحين
الحين اليار ما يعرف شو الي يستوي عند ياره
بعض الاسر بدت تتشتت والاسباب كثيره وانا اختك
مرات ما نقدر نلوم الشباب والبنات بالي يستوي فيهم لانه بيكون الغلط ظاهره من البيئه الي عايشين فيها لو كانت البيئه الي عايشين فيها بعدهم متمسكين بالعادات والتقاليد والمذهب الي شفنا على ابائنا وجدودنا كنت بتشوف الدنيا بعدها بخير
مشكلة بعض العرب انهم يقلدون الغرب بكل شي سواء اشياء تصلح لهم او لا
مثل ما قلتوا ما يقلدونا الاجانب بالشي الي ينفهم ويطور من ذاتهم ونحنا دوم نقلدهم سواء في اللبس او الامور الثانية او غيره وها كله تحت مسمى تطور وموضه ومسايرة العصر
ولو شافوا واحد ملتزم ومتمسك بعاداته قالوا عنه جاهل رغم انه عنده اعلى الشهادات
المشكلة الاساسية تكمن فينا نحنا شعب تعودنا نتبع ونعتمد على غيرنا في لبسنا في طرق المواصلات الخ
شفت في يوم مخترع من عدنا اخترع موبيل او دراجه او سياره او او
اكيد لا وليش ما نشوف هل نحنا ما عدنا السيوله او شو الي ناقصنا الماده الحمد الله موجوده البيئه موجوده بس شو الي ناقص الفكر والعقل افكارنا وخاصه اغلب شبابنا شو اخر انواع التيلفونات شو اخر انواع السياير ووين بنسافر في الاجازه شو اخر عطر نزل والا شو الموضه هاي السنة وسوالف مالها اول وتالي
بس لو كل واحد منا فكر انه يبتكر شي بنفسه ويكون متميز عن الباقين بشي بتشوفنا نحنا من افضل الشعوب بس دام اغلبنا تفكيرهم سطحي اسمحلي عمرك ما بتشوف شي والغلط بيتبع الغلط الي تشوفه على الموضه ومبهدل بعمره علشان يقولون فلان فنان بيي يوم وبيعرس وبيب عيال بتشوف عياله شراته ترى ذا الشبل من ذاك الاسد والا شو رايك
بس لو كانت العادات والتقاليد موجوده في بيئته بتشوف الناس الي بيظهرون من هاي الفئه غير من كل النواحي وقارن بينهم وبين الفئه الي فوق بتشوف فرق السماء من الارض
بس نحنا ما بيدنا غير كلمة وحده الله يهديهم ويصلح حالهم ونحنا ما نقول جذيه الا من محبتنا بانه نكون شعب تضرب فيه الامثال
وترى مب بس اهل بوظبي والعين ترانا نحنا بعد اهل الشمال عدنا بنات وشباب والنعم فيهم وفي اهاليهم بعد
وسامحني اخوي ادري وايد رمست
اختك
بنت الامارات
هل العين معروفين بدون تعريف