السلام عليكم ورحمة الله وبركاته …
اول شي كل عام وانتم بخير وعساكم من العايدي يارب …
تدرون اجازه والواحد وده يطلع من هالزحمه والتعب في دبي .. وناوي أسير العين …
اخر مره سرت العين يمكن قبل خمس سنين 
ودي أسيرها وخصوصا الفندق اللي على جبل حفيت ( اظن اسمه ميركوري؟ )
وين الاماكن اللي الواحد يقدر يسيرها في العين بهالاوقات وتصلح حق لعيال ؟
ومشكورين اخواني وخواتي مقدما …
هالفندق حلو، بس حط فـ بالك إنك بتكون مقطوع عن العالم الخارجي.
يعني إن دقت فـ راسك تاكل من كنتاكي مثلا و إتصلت عـ الدلفري، بيقولك إسمحلنا ما نوصل الطلبات فوق اليبل.
الدرب في الإتجاه الواحد ياخذله 15-20 دقيقه، خلال هالوقت، غير مسموحلك إنك تسهى عن الطريج. هذا غير إنك لو شاري عشا مثلا، بيبرد يوم بتوصل الفندق.
بصراحه، حتى هالمكان ما أنصحك فيه. المكان حلو، بس يحب الغامرين شويه، و بما إن مغامراتك في المضاربات اليوميه في سوق الأسهم خبلتبك، خلك تحت أحسن.
بخصوص قوس قزح، خلك منه، عندنا في الشارجه مطعم راقي يسمونه زمزم، خبرني إن بغيت تسير.
فكرة حلوه اخوي الرباش … بس ما ادري بيكونون فاتحين السبت والا لا …
تسلم اخوي على الرد …
مشكور اخوي متعني .. واذا سرت العين بسير فندق ميركوري اللي على جبل حفيت .. بس شكلها السيره بتنلغي لان في ضيوف بيوني باجر …
شكلي بسير اتعشا بمطعم قوس قزح في الشارجه احسن
لاتنسا المتاحف و خاصة متحف العين
و متحف قصر الشيخ زايد
الله يوفقك في السيره.
الصراحه العين من أفضل الوجهات السياحيه في نظري.
الأخوان ما قصروا وياك، بس أنا عندي تحذير صغير.
دير بالك تسكن في شاليهات أو فندق “عين الفايضه”. إذا تبا تكره السيره بكبرها و تسب الشباب اللي شاروا عليك تسير العين، إسكن هناك. بصراحه مادري ليش السلطات المختصه في العين هامله منتجع “عين الفايضه” بهالشكل، شي يحزن بكل ما للكلمه من معنى.