ياهلا باللي لفاني عاني … ياهلا به الف ترحيبه

مساكم الله بالخير وحياالله خواتي واخواني

……

من المعروف ارتباط الضيافه الخليجيه بالقهوه العربيه فنحن نعتبرها رمزا للكرم والأصاله فقد ارتبط الخليجي بالقهوه العربيه ارتباط عميق في حله وترحاله
وفي أفراحه واحزانه والقهوه لها طقوس ولها احترامها ولا يخلو بيت من بيوت الجود منها ونحرص كخليجيين على وجود القهوه بالبيت اكثر من حرصنا على أي شي اخر ..

سلم الــــعـــرب جيلٍ يعلم بها جيل…مازان مجلس دلــــتــــه مانصبها
فيها السلام وكيف روس الرجاجيل…ومعها علوم تــــــدور اللي رغبها
فياما انقذ الفنجال بعض المقاتيل…وامــــــــن مطاليبٍ تــعــذر طلبها
صـــب اقهوه من طيبات المعاميل…وشــــب نارك فالدفا في حطبها
فبيتٍ بـــــلا قهوه فلا فيه تسهي…فهي شيمة العربان وايضا نسبها
وللقهوه طقوس اغلبنا يعرفها ويطبقها .. وهي أن نبدا بالضيافه من يمين المجلس وحتى ان كان هناك طفل لايمكن تخطيه وتقدم له وان رفض فينتقل لمن يليه.
. وان نمسك الدله باليسار والفنجان باليمين..ان لايمليء الفنجان وان تصب القهوه بقاع الفنجان ( اذا مليت الفنجان يقولك قلبك مليان علي ) << طيب واذا صبيت شوي أكون .. يلا عادات شنقول ..
ومن العيب ان يكون الفنجان فيه كسر ( يقولون اللي تشرب بفنجان طرفه مكسور تتزوج زوج اشرم ) أنتبهو يابنات عاد بلوه الوحده تتزوج زوج اشرم بسبب فنجان قهوه
ويعرف انتهاء الضيف من القهوه بهز الفنجان..

وتختلف قواعد التحضير والطعم والتقديم بين دول الخليج ..
ولعلي كنت اتوقع ان القهوه الخليجيه هي نفسها حتى تعرفت على اختين الأولى قطريه والاخرى اماراتيه ..
القطريه تعرفت عليها بالحرم بمكه المكرمه ..وعزمتها على القهوه وكل ماكانت تبي تقوم تقعد مره ثانيه وتشرب فنجان قهوه وتقول قهوتكم ماينشبع منها ابددد …

أما صديقتي الاماراتيه .. وهي تعشق القهوه السعوديه آخر مره زارتني فيها كانت تشرب شوي وتقلب عيونها وهي تشرب وتقوووول ادماااااااان ههههه ….

وحبيت اكتب لكم طريقة القهوه السعوديه ..
اولا .البن ..والبن عندنا نوعين بن هرري وهو الأفضل و بن لقمتي وياتي بالدرجة الثانيه من ناحية السعر والجوده… وطعم البن يتوقف على الحمسه .
.وهي 3 انواع غامق ووسط وفاتح .. والأفضل ان يخلط الغامق بالوسط .. ويوضع بالدله بمقدار فنجان قهوه مع لتر ماء ويطبخ على نار هادئه لمده ربع ساعه ..

دنَّيت لك من غالـي البـن مـا لاق..بالكــف ناقيها عـن العـذف منسـوق
احمس ثلاث يا نديمـي علـى سـاق ..ريحه على جمر الغضى يفضح السوق

ثانيا ..الهيل .. من الافضل ان يكون الهيل مجروش وليس مطحون طحن ناعم ويوضع بمقدار ملعقه صغيره في دله التقديم.
ثالثا ..الزعفران ..ويوضع القليل منه في دله التقديم ايضا..
رابعا..المسمار او القرنفل وهو اختياري ..ويوضع بدون طحن من 3الى 4 حبات في دلة التقديم ايضا..

بي شـــــوق للدله وصوت الفناجيل….والقهوه اللي النار تــوقــد حطبها
واشتقت للمسمار والــبـــن والهيل.. والزعــفــــران اللي يطيب شربها

وبعد ان يطبخ البن مع الماء ربع ساعه يسل في دلة التقديم على الهيل والزعفران والمسمار ويترك قليلا حتى تركد القهوه .. ثم تقدم …
وماتحلى القهوه إلا باللمه الحلوه مثلكم وشرواكم

يا ما حلا الفنجال مع سيحة البال…في مجلسن ما فيه نفسن ثقيلة
هذا ولــد عمن وهذا ولـــد خـال…وهـذا رفــيــقن مالـقينا مــثيله

واكيد ماراح تشربون قهوه بدون ماتحلون.. وسويت لكم هالحلى وهني وعااافيه على ضيوفي
ودمتم بخير

9 thoughts on “ياهلا باللي لفاني عاني ..ياهلا به ألف ترحيبه”

  1. تسلمين على الموضوع الرائع اللي يبين عاداتنا وتقاليدنا العربية الاصيلة

    …

    يقال بأنه يصعب على العرب في منطقة الخليج الحصول على كمية كافيه من القهوه او استيرادها من اليمن لصعبونة المواصلات ولذلك كانوا يصبون مقدار بسيط بالفنجان حتى يكفي الجميع ويبقى اطول فتره ممكنه ويقال بأن في بلاد اليمن يصبون القهوه ويملؤون الفنجان لأن القهوه متوفره عندهم بشكل كبير.

    هذا ما سمعته

    والسموحه منج

  3. مشكورة اختي على الموضوع الحلو … ولا تنسين انا بعد ابا قهوة واهم شي ابا الحلا …

    لووووووووول

  4. عاد اهم شي القهوة

    مرة بغيت اصب حق اميي

    وسالفة استوت اول شي مسكتها باليمين والفنيان باليسار

    انهزبنا وعكسنا كل شي .. الدلة باليسار والفنيان باليمين

    انزين سرت وترسته ههههه على بالي ماي ..

    نازعونا ..

    عطيتها فنيان وناشة بشرد هههه زخونا وانهزبنا اونه ما هزينا الفنيان بعدنا >> سالفة عودة

    وعطوني محاضرة فهالموضوع

    حرام عليج يا روعة تاكلين حلو وما تعزمينا عاد انا عوقي الحلو .. >.<

    الوصفة لو سمحتي عالخاص فديتج ههه

    >> احس انها سنافر بس طريقة التزيين غير .

    تسلمين عالموضوع الروعة يا روعة ..

    ^^

    .
    .

  5. الله يعطيج العافيه على هل الموضوع الرائع ومشكوره الشيخه على حسن الضيافه ودله عامره بالقهوه لوووول

Comments are closed.