الموضوع صارلي و انا متضايق منه و ما في غير ردود الأعضاء الكرام اللي بيخلون الضيقه تروح عني
انا و زوجتي ساكنين في عماره و كل واحد فينا عنده سيارته الخاصه لأنه حرمتي تشتغل و هي ترجع من وقت عشان البيبي
اليوم الصبح إتفاجئت من حرمتي تقوللي ” إنت إللي كاتب على السياره ” ؟
قلت لا , شو اللي مكتوب !!؟
قالت : I Love You و مرسوم ورده على الزجاج الأمامي
طبعاً اول شي سويته دعيت على مسود الويه انه يجيه شلل و تنشل إيده و ينجلب ويموت و يفك الدنيا من واحد وصخ مثله
جلست افكر منو هذا اللي عنده الجرأة انه يسوي مثل هاذا الشيء خصوصاً انه نحنا معروفين في منطقتنا متزوجين و البيبي دووم ويانا
و طبعاً لين الحين انا متضايق حتى فكرت اغير سكني إللي باقي منه 7 شهور و السبب جرثومة الأرض هذا
و زوجتي الله يخليها لي على طول قالت خلاص من يوم و رايح انت وصلني و السياره بفرها بيت هلي
فيا زوج , لو كنت مكاني _ شو راح تسوي ؟
و إللي بعده عزابي بس مخه نظيف لا بأس ان يدلو بدلوه :S
.
.
.
والله ياخوي إذا كل واحد كتب شي على سيارتك سرت و بلّغت الشرطه و جلبت الدنيا، بعمرك ما بتعيش سعيد.
يمكن اللي كاتب هالكلام واحد لا يعرفكم ولا تعرفونه، و يا مكثر الناس اللي تكتب على السيايير. إنته لازم تاخذ إجراء بعد تكرار الحادثه، مب من أول يوم تركض للشرطه. هم أصلا بيسألونك عن هالشي، و إن جاوبتهم و قلتلهم أول مره، بيلبسونك. بالتالي لو تكرر الحدث، بياخذون عنك فكره إنك من قوم “دقني بنقع” و ما بيتجاوبون وياك عقبها.
أهم شي إنك واثق من مرتك و تعرف إنها بتخبّرك بأي شي يحصل معاها. و إذا تكررت السالفه سر خبّر الشرطه.
أخــوي أحمــد
كمــل حيــاتك طبيـعي ولا كــانـه صــار شــي … معــاقبــة الســفيه تـركــه
ومــا تعطيــه اي اهتــمــام … وربي يوفقـكــم دنيــا وآخــره
لا تتكدر اخوي
اول شي تسويه طنش
اللي بيستوي واحد من الاثنين
يا انه بيطنش مثلك وكفى الله المؤمنين شر القتال
او انه بيكتبها مره ثانيه وهاي المره لا تمسحها
واول ما تشوه مكلبش عطه كف يسبب له سرطان الجلد
الله يبعد عنكم عيال الشر
يا اخوي ما فهمتك ,, كيف يعني بتشك فيني الحرمه ؟
الكتبه على سيارة الحرمه و الحمدلله انا و الحرمه ما نشك في بعض و لا بنسبة 0 %
السالفه هب الشك يا اخوي , السالفه هذا الوسخ قليل الأدب اللي سوا هالشيء قاهرني
و خاطري اعرف منو هو عشان امسح فيه الأرض
و سببلي ضيقه و خلاني هب مرتاح في سكني
لاتكبر المشكلة عادي واحد كاتب على السيارة شو المشكلة
لاتكبر المشكلة وسوووو اكبر طاف
لانك لو اهتميت بالسالفة بتشك فيك الحرمة
اذ انت واثق من نفسك انك ماتسوي شي غلط ماعندك مشكلة
بو عسكور
كيف عادي ؟؟
اكيد ما فهمت
الجمله كتبوها على سيارة اهله مب سياتك بارك الله فيك