الموضوع صارلي و انا متضايق منه و ما في غير ردود الأعضاء الكرام اللي بيخلون الضيقه تروح عني
انا و زوجتي ساكنين في عماره و كل واحد فينا عنده سيارته الخاصه لأنه حرمتي تشتغل و هي ترجع من وقت عشان البيبي
اليوم الصبح إتفاجئت من حرمتي تقوللي ” إنت إللي كاتب على السياره ” ؟
قلت لا , شو اللي مكتوب !!؟
قالت : I Love You و مرسوم ورده على الزجاج الأمامي
طبعاً اول شي سويته دعيت على مسود الويه انه يجيه شلل و تنشل إيده و ينجلب ويموت و يفك الدنيا من واحد وصخ مثله
جلست افكر منو هذا اللي عنده الجرأة انه يسوي مثل هاذا الشيء خصوصاً انه نحنا معروفين في منطقتنا متزوجين و البيبي دووم ويانا
و طبعاً لين الحين انا متضايق حتى فكرت اغير سكني إللي باقي منه 7 شهور و السبب جرثومة الأرض هذا
و زوجتي الله يخليها لي على طول قالت خلاص من يوم و رايح انت وصلني و السياره بفرها بيت هلي
فيا زوج , لو كنت مكاني _ شو راح تسوي ؟
و إللي بعده عزابي بس مخه نظيف لا بأس ان يدلو بدلوه :S
.
.
.
اسمع اخوي. الموضوع صار وهذا امر كتب الله عليك ما تقدر تغير منه شي. فالتفكير فيه ما بينفعك بل بيضرك.ولكن الموضوع كيف تتصرف الحين. المرة الاولى مثل ما اخونا المدير التنفيذي ما تقدر تسوي شي. اذا كررها تقدر تشتكي. ومثل ما قال كبير المستثمرين بييبون التيس من قرونه.امور كشف هالمواضيع صارت سهله بالنسبة للشرطه ولله الحمد. تجنب الظن فان بعض الظن اثم.تجنب التفكير لان التفكير ما بيظهرلك الشخص وبتعور راسك وتضيع وقتك بلا فايده. بل ادعوا بان عليه من الله ما يستحق.تجنب الغضب وتستوي شارلك هومز لان حتى لو قبضت عليه, ما تقدر تسوي شي بلا دليل. ولو ضربه مأواك السجن ولو هددته يقدر يشتكي عليك انك مهددنه.فنصيحه, امشي على الاجراءات المطبقة قانونيا.
لا تزعل مني اذا قلتلك انك مكبر الموضوع عل فاضي …
تخيل … يمكن واحد عمره 10 سنوات و كان يمشي فالشارع و ملان …
و حصل سيارة مايعرف منو صاحبها ..
بس كتب الجمله و روح …
اول يمكن اثنين من الاطفال ملانين و يسولفون قول مراهقين … و واحد منهم كتب االجمله للثاني
ما يعرف انها سيارو ريال او حرمه ولا هم يحزنون …
أحس أن المقصود هو أنت مب الأهل
لأنه لو أهلك مفصودين يمكن بتلاحظون الشخص يحوط في المكان
ويمكن يعيد حركاته الغبية هاي .. لأنه فعلا غبي
هو يتحسب أنه بتشك ولأنه تيس مب عارف شو يسوي !
أنصحك تركز في عملك وتلاحظ منو ممكن يسويها !!
فتح بلاغ في الشرطة بلا دليل مايفيد شي
لأنه مستحيل الشرطة تقدر تتفرغ تراقب وعندهم بلاوي أكبر لها أولويات
عليك بالدعاء
واستخير الله
ولا تترك بيتك أو سياراتكم عسب واحد أو وحدة أقل مايمكن نوصفه أنه مريض
ريح بالك ياخوي الدنيا فعلا تغيرت والناس غير
الانسان مب من أي موقف يمر فيه يتخذ قرارات مصيرية في حياته لازم أول شي يطنش
لكن اذا تكرر كذا مرة هاذيج الساعة ممكن يتخذ الاجراء اللي يناسبه
مثلا انا مرة تعرضت لموقف في السوق نزلت شوي المحل اشتري عطور
ويوم ييت بركب السيارة شفت عند قبضة السيارة ورقة فيها رقم
والله اني ما اهتميت شليت الورقة وفريتها وخلاص انتهى الموضوع
هل معناته اني ما أسير السوق او ابيع سيارتي!!!