~ْ~ْ صــور وتعليقات : من نتائج بطء تصفح المنتدى على أحد الأعضاء ++ صور مختلفة ْ~ْ~

السلام عليكم ورحمة من الله وبركاته ..

شحالكم يا زوار وأعضاء ومشرفي منتدى الإمارات للأوراق المالية !؟

اليوم .. حبيت أغير تخصصي في طرح المواضيع والمقالات اللي كانت تسببلكم الصداع .. وحبيت أطرح هالموضوع ومن تصميمي وإعدادي .. ليكون كفارة عن مواضيعي السابقة .. أسولف ..

المهم ما بطول عليكم .. وإن شالله تعيبكم الصور والتعليقات .. و و و و .. ..و نرجع إلى محور حديثنا .. وخلوني أبدا في الموضوع ..

____________________________

طبعاً مثل ما الكثير من الأعضاء يعانون .. وأنا منهم للأسف .. من أن تصفح المنتدى وايد بطيء ويرفع الضغط .. واحد من الأعضاء الله يهديه ويصلحه .. ارتفعله الضغط وعصب من كثر ما يسوي ريفريش للصفحة ومن كثر ما أن المنتدى بطيء .. قام صاحبنا وطلع حرته في اللابتوب :

الله يعينه .. الصراحة بيني وبينكم غمضني اللابتوب ياخي لو عاطني اياه أحسن عن ما أنك تكسره !!

المهم .. بعد ما صاحبنا كسر اللابتوب .. وخلاه قطعة قطعة .. ظهر فجأة كائن غريب .. ألا وهو أحد القطاو اللي دايماً يتشكى منهن اخونا العضو gtr30000 .. والقطو اللي فالصورة هو نفسه اللي كان على بونيت موتر صاحبنا .. لكن هالمرة القطو غير رايه واختار وحدة من قطع اللابتوب المتكسر بدل البونيت .. لأنه الظاهر ناوي يتعلم عالكمبيوتر ويسجل ويانا فالمنتدى ..

~ وصلة سياسية ~ .. خوينا “جورج بوش” .. عاطينه منظار في عرض عسكري .. ويقوله العسكري اللي عاليسار : تشوف ذيج الدبابة يا طويل العمر ؟؟! ويرد عليه جورج بوش “هيه أشوفها .. هاذيج الي مرشوشة عاكس ومركبيلها رنجات ستيشن لكزس أمريكية ؟! … أما العسكري اللي على اليمين يقول في خاطره : انته لو فيك خير .. بطل البلاستيك اللي على عدسات المنظار بالاول !!

عاد عقب ما انتهى العرض .. تدرون انتو أمريكا حر وموت وقيض عندهم ذيج الأيام .. صاحبنا دايركت ظهر من العرض العسكري .. وسار على طول البيت الأبيض بدون لا يتسبح ولا يبدل ثيابه .. وخطف عداله “كولن باول ” وأحسه يقول في خاطره : يالله بالستر شو هالريحة ؟ أسميه انه بيفضحنا اليوم في الكونجرس !! يالفضيحة .. أخافني أقوله سير اتسبح ويفنشني !! خلني ساكت أحسن ..

على طاري العرض العسكري .. بتخبركم ؟! شو تتوقعون لو دخلوا الحريم في مجال تصميم الأسلحة والصناعة العسكرية ؟! هذي أولى التوقعات

~ وصلة رياضية ~ نصيحة .. مني .. لكل عضو من أعضاء المنتدى ويلعب كرة قدم في النادي وخصوصاً حراس الجول .. إذا في يوم .. واحد من لاعبين الفريق المنافس هددك وقالك شي !! خذ حذرك منه في المباراة اللي عقبها !! نصيحة !! أنا قلتلك

وأيضاً .. ماذا ستفعل .. إذا أغلقت في وجهك السبل .. ولم تجد مفراً .. من الهزيمة .. مثل ما صار لصاحبنا :

إلا على طاري الكورة والمشاوت .. الكثير من الأعضاء .. يتمنى مرات أنه يشوت حد فينجر .. أو يشوت شي .. بدون لا يتعور صبعه .. وفي نفس الوقت تكون الشوته فعاله وقويه .. تبا نصيحتي ؟! عليك بهالجوتي

كان يا مكان .. في قديم الزمان .. كانو هناك اثنين من الشباب .. واحد عنده همر .. والثاني عنده شفر .. يتمصخرون على صاحبهم الثالث اللي كان يوقف موتره فالنص من بين مواترهم !! ويضحكون على موتره !! لكن بعد فتره .. صار هو يتمصخر عليهم .. تدرون ليش ؟!

عطاري المواتر والباركنات .. الصراحة أنا سمعت عن كلمة “STOP” .. بس كلمة “SOTP” الصراحة أول مرة أسمع عنها وأشوفها !! مادري يمكن بالفرنسي مكتوبة أو أنه اللي كاتبنها هندي من اللي يشتغلون في المكتبات أو من الخطاطين الهنود :

هذا الله يسلمكم .. ولد واحد من الربع .. يلعب كورة خاري ويا الصغارية .. وعاد الكورة يت تحت واحد من المواتر .. وكل مافي الموضوع أنه حب يسترجع الكورة !! لا أكثر ولا أقل

عاد واحد من ربع هذا الياهل .. غار منه !! وحب يتعنتر ويظهر قوته جدام ربعه .. أول ما شاف موتر خاطف عدالهم .. نقز مرة وحده أونه يبا يحومه !! ما لقى عمره إلا طايح عالبونيت ومتقبض بالمشاشات

أخيراً .. تخيل عمرك تمشي في الصناعية .. وتسمع حشرة وازعاج في واحد من المستودعات .. توقف موترك .. وتنزل وتدق الباب .. وشويه .. ينفتح الباب ويظهرولك هذيلا ويقولولك ” نعم اخويه ؟! … فيه شي !؟ !!

في النهاية .. اسمحولنا طولنا عليكم .. وان شالله الموضوع عيبكم .. وأكون وفقت في اختيار الصور والتعليقات .. والسموحة مرة ثانية .. وفي انتظار آرائكم حول الموضوع ..

ودمتم ..