السلام عليكم ورحمة الله وبركاته

ماعرف اذا مكان الموضوع صحيح ولا لأ (عذرا من الجميع)
اولا: انا عندي سيارة مأمنتنها شامل لكن التصليح خارج الوكاله وقيمة الـتأمين 12.500 درهم في شركة الشارقة للتأمين
ثانيا: تاريخ 9-10-2010م سويت حادث والحمدلله الله ستر , المهم انا (المتضضرة) ولست المتسببه بالحادث , علما بأن سيارتي وسيارة المتسبب صادف انهم الاثنين بنفس الشركة (انا شامل واللي دعمني ضد الغير).

ثانيا: رحت على طول خذت سيارة ايجار عشان اروح وارجع فيها للدوام

ثالثا: يوم الاحد تاريخ 10-10-2010م اتصلت بشركة التامين وقلت لهم مسويه حادث وقالولي بيتصل فيج ريكفري وبياخذ السيارة الشارجه علما باني من دبي ومأمنه في شركة الشارقة للتأمين (فرع دبي) وعقب 4 ساعات نفس اليوم خذو السيارة وودوها في كراج للشارقه وقالولي بيصورونها وبيردون يخبروني.

رابعا: يوم الاربعاء تاريخ 13-10-2010م (يعني بعد يومين) اتصلت بالشركة في فرع دبي عشان اشوف شو صار في موضوع السيارة , وقالي موظف بالشركه المندوب بعده مايانا عشان نفتح الملف وانتظري لين باجر ولا عقبه لين ما ينفتح الملف وقلت بكل سرور شوركم وهداية الله .

خامسا: انتظرت يومين كما وعدوني بالرد ولكن لم يتم الاتصال بي و رابع يوم اتصلت بروحي اللي هو يوم الاحد 17-10-2010م الساعه 9:30صباحا وقالي الموظف اللي بالشركة اسمحيلنا الحين بنتصل في المندوب عشان يطرشلنا الصور , المهم قلت له يعني اتصل اليوم ولا لأ ؟؟ قالي ساعتين اتصلي وفعلا بعد ساعتين اتصلت فـ قالي: والله اختي موضوعج سار الفرع الرئيسي اللي بالشارقه وعطاني رقمهم واتصلت فيهم ورد علي موظف وقالي:نحن بنشوف اسعار الكراجات وبنرد عليج بس عطينا يومين , قلت له بكل سرور: اوكي خذو راحتكم .

سادسا: من تاريخ 17-10-2010م الى تاريخ 21-10-2010م (يعني 4 ايام) لم يتم الاتصال , قلت بتصل وبشوف شو موضوعهم , المهم اتصلت قالي الموظف: اختي طرشنا موضوع سيارة لخبير فني لان قيمة التصليح غاليه , وانشاءالله بنرد عليج خلال يومين بالكثير , قلت له: اذا قيمة التصليح غاليه ليش وافقتو على تأمين السيارة بالبداية ؟؟ وبعدين لتل نتضررة وغير متسببة يعني مب شغلي ابدا , المهم تم يتمتم لين ما صدعت وقلت له مع السلامه.

سابعا: تاريخ 24-10-2010م (يعني 4 ايام بعد) اتصلبي الخبير الفني وقالي ييجتمع معاج واشرحيلي الحادث ومكان الحادث وفعلا اجتمعت معاه وشفنا مكان الحادث وراح .

ثامنا: من تاريخ 24-10-2010م الى تاريخ 28-10-2010م (اللي هو اليوم) لم يتم الرد علي , واتصلت فيهم قبل اشوي رد علي الموظف وقالي: انتي بروحج اتصلي بالخبير وشوفي شو بيقولج وخبرينا !!! قلت له: اخوي انا مأمنه شامل وانا متضرره ولست المتسببه وبعدين مب مهمتي في فلان وعلان علشان التصليح , المهم حطاني في الهولد تقريبا نص ساعه لين ما بروحي صكرت !!

الصراحه فلم مكسيكي مب حادث

من تاريخ 10-10-2010 الى تاريخ 28-10-2010 (يعني 18 يوم) لم يتم لمس السيارة والسيارة واقفه بالشمس !! والسيارة اللي ماجرتنها من 18الله يعين كم بيطلع ايجارها

اقسم بالله اكره تأمين شفته وفوق هذا القهر اني مأمنه شامل + انا متضضرة ولست المتسببه تعبت والله تعبت ماعرف شو اسوي وياهم

ياليت حد يخبرني شو اسوي والله كرهت حياتي وياهم وجزاكم الله الف الف خير

9 thoughts on “█▓▓█ ‏مساعدة وشكوى وتحذير من شركة تأمين سيارات █▓▓█ ‏”

  1. 1- يستهبلون عليج..
    2- اشتكي في الدايرة الإقتصادية يوم بيوصل تلفون منهم للتأمين بيشتغلون على طول..
    3- نصيحه لا تصلحين في كراجاتهم لأن تصليحهم مب شي ومحد منهم بيضبط موترج..
    4- إذا قالوا بنكنسل السياره بينقصون نص قيمة السعر اللي متفقين عليه بيقولون لج إذا العمر إقل من 25 10% وكل ثلاث شهور خصم مبلغ قوليلهم ما با وعلى طول محكمة وريحي عمرج..
    5- من متى شركة التأمين تجتمع ويا المتضرر في الحادث وتقول له وين مسوي الحادث وكيف ليش مب مسجل عندهم في تقرير الشرطة ولا التقرير ما يمشي عليهم..

  2. أنا أخوي صار له حادث وكان متضرر والسيارة احتاجت أسبوع لحد ما صلحوها لأنها كرولا .

    تواصلي مع المندوب شركة التأمين المسؤول عن سيارتش و حاولي تضغطي عليه وإذا كانت سيارتش يديده يعني ما كملت

    سنة يجب على شركة التامين تبديل القطع من الوكاله وبعدين هذيله حرامية يعني ما يكفي إتصال لازم تروحي بنفسش او معع أحد من الأقرباء للتكلم عن الموضوع وإذا كان المندوب يلعب ويدور بلغي الشرطة او تصلي بإستوديو واحد .

    تراه شركات التأمين ما تنفع معهم إلا العين الحمرة

  4. مشكور العين101 بس وين اشتكي عليهم ؟ الشرطه ولا وين ؟ ولا انتظر ؟؟

    انا اول مره اسوي حادث وماعرف شو الاجراءات دخيلكم

    اللي ابا اعرفه هل اجراءاتهم صحيحه ولا يستهبلون ولا شو بالضبط ؟؟!!.

  5. اختي اشتكي عليهم وطالبيهم بدفع ايجار السيارة المستاجرتنها

    وخلي ريال يروحلهم ويوقف على راسهم لانها شغله استهبال الي مسوينه

    يا اما يصلحون او تدخلين السيارة الوكالة وهم يتحملون قيمه التصليح

Comments are closed.