السلام عليكم ورحمة من الله وبركاته ..
شحالكم يا أعضاء وزوار منتدانا !؟

بعد الحلقة الثامنة .. واللي استضفنا فيها العضو المميز “speed” كـ ضيف شرف وتقدرون تشوفونها من هالرابط http://satfrequencies.com/invest/uae339480/ .. اليوم إن شاء الله بنعرضلكم الحلقة التاسعة .. واللي تتكون من قسمين...

في كل حلقة .. بيشاركنا إن شاء الله أحد الأعضاء المميزين في المنتدى بإعداد الحلقة من خلال المشاركة في أحد أقسام الموضوع ..

في هالحلقة .. عندنا “ضيفين شرف” .. وضيفة الشرف الأولى هي العضوة “ديره” .. وضيفة الشرف الثانية هي العضوة “Miss_Burberry “ولهم جزيل الشكر على قبولهم للإستضافة .. ومشاركاتهم المتميزة في الحلقة ..
السموحة طولنا عليكم .. ونبدا إن شاء الله في الموضوع ..

~~ رسالة شكر .. أوجهها لخونا al3mimi على جهده المبذول في طرح الحلقات وترتيبها ,, يزاك الله كل خير ياخويه وكثر الله من امثالك ~~
~~~~~~~~~~~~~~~~~~~~
ذبيحة العيد

كانت الذبيحه في يوم من الايام .. نجم من نجوم المناسبات الكبيره مثل رمضان والاعياد ..

وطبعا قبل لا تنذبح .. كانت تشوف الويل منا … ليش ؟!

أونه نسليها مربوطه وضايجه ؟؟؟

لكن وقت الجد كنا بألف ريّـال … نوقف وقفه عشان ما تنذبح لكن ما شي فايده ..

كنا نعتبر الذَباح سفاح ….. واهلنا مشاركين في الجريمه

واحنا كنا الجمهور اللي ينتظر لحظة الاعدام للذبيحه

بعد ما شبعناها ظرب وتسحيب من رقبتها ونقلد صوتها اونه نكلمها مسكينه

الله يسامحنا ؟؟

المهم

وما إن يبدأ العد التنازلي ….تسيطر الرهبه على الموقف .. ويبدأ تأنيب الضمير

ويبدأ شريط التعذيب بالمرور امامنا .. ونتعاطف وياها والدموع تهمل

لكن بعد ما شي فايده .. !! بتنذبح يعني بتنذبح ..

ويوم يحط الذباح السكين على رقبتها.. كنا نغمظ لين ينطش الدم ..

وأخرتها ..يوم تتنتهي المأساه …. كنا ننسى كل شي ؟؟

نتغداها ولا نتعشاها وننسا اللي صار لين يتكرر الموقف مره ثانيه
~~~~~~~~~~~~~~~~~~~~

رمضان وقــــواطي التونه

طبعا كل واحد قرا العنوان اتذكر ســــــواد الويه اللي كان يسويه بفتره من الفترات يوم كان يتحـــــــــرى عمره صغير ,,

ويحس انه يصوم تحت الضغط والتهديد وهو بعده صغيرون مسكين مع انه مش صغيرون ولاهو بمسكين ,,

بس السؤال اللي يطرح نفسه : ليش ارتبط رمضان بــ قواطي التونه ؟؟ واحيان مع دقوس بوصقر؟؟!!

أنا اشوف انه من الغباء اتخاذ قوطي التونه النصير في نهار رمضان لأنه يكشفك!!

مع الاعتذار لأنصار التونه في وايد اشياء ممكن ياكلونها الفطّـــــــــار اللي سولت لهم نفسهم خخخ

والبدائل كثيرة مثل– الخبز والجبن

اذكرالاولاد بالفريج (( محد كان يسوي هالسوالف غير الاولاد)) كانوا يحطون درهم على درهم

ويشترون خبز وجبن و يسيرون صوب اليبال عشان يختفون عن الانظار وياكلون – فاصوليا – فول مدمس الككاو …

مثل ماكانت اتسوي اختكم بربري ..اللقمة الأولى طبعا بدووووون قصد وأقول

“اوييييييييييييييييييييييه نسييت .. خلاص فطرت

واطووف ع الباجي

ولاحظوا انها كلها اكلات ماتنكشف بعد ما تاكلها لأنها مب زفره شرات التونه

وهنــــي وعافيه ^_^

الأذااان

طبعا كلنا يوم صغار وقفنا عند الباب يتريا الاذاااان واول مايأذن نرررركض ونخبرهم انه اذن

واحيان نستهبل ونأذن بروحنا خخخ طبعا مايصدقون لأنه اصوات اليهال تنعرف

…..

مره من المرااات واحد من اهلي
عازم شباب ويستهبل عليهم وقف عند الباب وأذن

الشباب مامشت عليهم الحركة

لكن الحريم من الصوب الثاني سمعوا الاذاااان وافطروا

اكيد حد سوا هاي الحركه يوم صغير او حد سواها فيكم ..!!

……………..

فانــــــــوس رمضان

مع قرب شهر رمضان

الناس تتبادل التهاني وتبدأ الاعلانات في التلفزيون عن قرب الشهر الفضيل

وتكون فيه محطات اعلانيه خاصة فــ رمضان

واللي يميّز هالتهاني والمحطات الاعلانيه شيئين

1- هلال رمضان

2- فانوس رمضان

بالنسبه لهلال رمضان فهو شعار هذا الشهر الفضيل نسبة لتحري ظهور الهلال كإعلان لبداية الشهر

أما الشي اللي تساءلت عنه هو ليش الفانوس ارتبط برمضان ؟؟!!

شو علاقة الفانوس بشهر رمضان ؟؟!!

مع البحث قريت كمن روايه عن أصل العلاقه بين الفانوس وشهر رمضان

الرواية الاولى انه الخليفه الفاطمي في مصر كان يظهر ليلة التحري علشان يشوف هلال رمضان والاطفال يظهرون وياه ومعاهم فوانيس علشان ينورون له الطريج.

اما القصة الثانيه فتقول انه الخليفه كان يبا ينوّر الطرق في المدينه طول ليالي شهر رمضان فكان يأمر أئمة المساجد بوضع الفوانيس واشعال الشموع داخلها

~~~~~~~~~~~~~~~~~~~~

إلى هنا .. وتنتهي حلقة اليوم .. والسموحة طولنا عليكم ..

الشكر موصول لـ ضيفة الشرف أختنا المتميزة ديره ,,, ولـ ضيفة الشرف أختنا المتميزةMiss_Burberry على مشاركتهم المتميزة في الحلقة ..

إن شالله تكون الحلقة عيبتكم .. وفي انتظار آراءكم وتعليقاتكم ..
~~ وشكراً مره اخرى لخونا al3mimi على جهده المبذول في طرح الحلقات وترتيبها ,, يزاك الله كل خير ياخويه وكثر الله من امثالك ~~

ونشوفكم في حلقات قادمة بإذن الله ..

سامحونا على القصور ..

ربيه يحفظكم..

9 thoughts on “~● الحلقة التاسعه : مشاركة ضيوف الشرف ~ ديره + Miss_Burberry ~ + ذبيحة العيد !! ●~”

  1. بدايــــة احب اشكر اخوي العميمي واختي رويـــــــــال على استضافتهم لي

    يسعدنــــي جداً اني اشارك في الموضوع اللي عجبنـــــي من أول حلقة

    …………..

    ديـــــــــــــــــــره

    ذكريااااات اليمة

    انا اذكر مرّه ابوي لزم انه كلــــــــنا انشوف الاضحيه وهي ” تنجتــــــل”

    ومن شفّت السّفـــــــــــــاح يذبحها مسكينه بطّلت آكل لحــــــــــــــم

    بس بعد سنوات رديت اكله .. يوم راح تأثير المشهد المؤلـــــــــم

    ديره .. طلعتي سفاحه ونحن ما ندري !! ههههه

    بالفعل انا اذكر هالمواقف كانت صعبه .. و لين الحين اذكر صوت اللي يذبح وهو يقول : بسم الله والله اكبر ! يذبح الذبيحه وهو يضحك !! ولا كأنه مسوي شي هههههه

    ——–

    مس بربريتووو .. ما شاء الله خبره هههه

    انا دايما اسأل نفس السؤال .. ليش يعني التونه اللي ارتبط اسمها برمضان ؟!! من نسمع كلمة تونه نتذكر اللي يفطر خفيه في رمضان ! بس اعتقد الحين الموضوع تطور وطلعت اكلات ثانيه غير التونه ..

    ——–

    شكرا لكم جميعا .. العميمي + رويال و ديره + مس بربري

    وفي انتظار اليديد

    اكتسبنا الخبـــــــرة من اللي انشوفه ونسمعه ف الفريج

    والا انا وعليه مافطرت خفيه

    كلــــــــــــه بدووووون قصد

    وشكـــــــــرا لكم كلكم ^_^

  2. ديره .. طلعتي سفاحه ونحن ما ندري !! ههههه

    بالفعل انا اذكر هالمواقف كانت صعبه .. و لين الحين اذكر صوت اللي يذبح وهو يقول : بسم الله والله اكبر ! يذبح الذبيحه وهو يضحك !! ولا كأنه مسوي شي هههههه

    ——–

    مس بربريتووو .. ما شاء الله خبره هههه

    انا دايما اسأل نفس السؤال .. ليش يعني التونه اللي ارتبط اسمها برمضان ؟!! من نسمع كلمة تونه نتذكر اللي يفطر خفيه في رمضان ! بس اعتقد الحين الموضوع تطور وطلعت اكلات ثانيه غير التونه ..

    ——–

    شكرا لكم جميعا .. العميمي + رويال و ديره + مس بربري

    وفي انتظار اليديد

  3. ما شاء الله تبارك الله..

    طرح رائع..

    أفكار جميلة..

    ذكريات أسترسلت بنا إلى طفولة رمضانية عبقة..

    تبارك الله على المجهود الطيب..

    رويالتي..

    فائقة الروعة بالطرح….

    العميمي..

    لك جزيل الشكر بتبني المواهب المدفونه بمنتدانا العريق….

    ديرة..

    دائما رائعة وراقية بالطرح….

    Miss_Burberry

    روح طيبة وفائقة الجمال..

    لكمـ جزيل الشكر..

    أختكمـ

  4. مشاركه طيبه من الاخوات ديره والاخت Miss_Burberry

    الاخت ديره:

    مشاركه متميزه اختي ديره بخصوص الذبيحه

    في العيد الاضحى الذي مضى نويت عن اضحي وجاء يوم العيد

    وطبعا رحت اصلي العيد الاضحى وعقب الصلاه رجعت البيت

    صوب الاضحيه عشان امسح عليها وادعي وهي مسكينه

    حاسه بيوم أجلها تمت المسكينه اترافس

    وعقب سمعت العمال يقول كلمة (بسم الله والله اكبر)

    وانتهاء اجلها مسكينه ….

    الاخت Miss_Burberry :

    ايقولج يزيدون اسعار علب التونه في رمضان بسبب
    الطلب المستمر
    ويتجمعون الاولاد يشترون العده تونه + دقوس وبصقر + خبز
    + كم لوميه (( عشان نكهة التونه))

    وعقب يدورون مكان خفي عشان الوليمه

    اشكر اخي العميمي على مواضيع الحلقات

    واشكر ايضا اختي رويال ابوظبي في الدور الفعال لانجاح مواضيع الحلقات

    واشكر ايضا ضيوف الشرف لهذي الحلقه المميزه الاخت ديره والاخت Miss_Burberry

Comments are closed.