الشاحنات والمعدات الثقيله

اقترح لادارة المنتدى بانشاء قسم خاص للشاحنات والمعدات الثقيله تحت المشاريع التجاريه اللي يندرج منه بيع السيارات والمعدات البحريه.
علما بانه يوجد موقع سعودي لديهم قسم خاص بالشاحنات والمعدات الثقيله الشباب السعودي امفعلينه بشكل ممتاز لا ويتم طلب وتوفير اعمال للمعدات هذه وارشاد اصحاب الشاحنات باماكن العمل المتوفره
فكيف ونحن في الامارات لدينا شركات نقليات ضخمه ومواقع كسارات كثيره لا يستفيد منها الا الوافدين
انا شغال في هذا المجال والله هنود وسوريين وباكستانيين يملكون شاحنات خاصه يعملون عليها ويطلعون دخا لا باس به ناهيك عن اصحاب الشركات الظخمه من الوافدين والمواطنين.
اتمنا ان يكون في منتدانا السبق في وضع قسم خاص بالشاحنات ليكون الاول في الامارات المتخصص في هذا المجال الكبير اللي المواطنين غافلين عنه .
للعلم ان اصحاب السيارات من المواطنين ايشغلون سياراتهم تاكسي عند الشركات الكبيره وياخذون الفتات ويتم انتهازهم من قبل الشركات الكبيره اللي اتكون متعاقده مع الكسارات وشركة نخيل وشركات الردي مكس ومصانع الاسمنت وموقع الدفان في الجزيره الحمره.
ياخذ صاحب السياره سعر الطن بسعر قليل بالنسبه للسعر الاصلي اللي تحصل عليه شركة النقليات
فيضيع المواطن اللي توه بادي الشغل بين انياب الشركات الكبيره اللي معظمها مملوكه للاجانب او تدار من قبلهم .
فلا يجد صاحب السياره الجهه اللي اتساعده ناهيك عن المصاعب الكثيره اللي اتواجهه في الحصول على سياره بالحجز بالشهور في الوكاله ومصانع الصناديق التريلا .
اقترح انشاء القسم الخاص لتبادل المعلومات بين الاعضاء من عرض شاحنات واعمال وتوفير شغل للشاحنات بعقود مجزيه.
انصح الشباب اللي يبا يتربح يفرد عضلاته في السوق اما اهنيه فارجو اعطاء معلومات صادقه بهدف المساعده بدون الطمع من التربح من الاعضاء كوصيط ويريد ربح وعموله الموضوع تساعد اليوم بوفر عمل لشاحنتك باكر انتا بتحصل شغل لشاحنتي والموضوع علاقات .
بعض المواضيع دارة في المنتدى عن الشاحنات ما حصلت الى المعلومات المغلوطه للشباب اللي مب فاهمين عن الشاحنات واللي يعشمهم بمبالغ معينه الغير ملم بدخل الشاحنات ايشوف المبلغ مجزي بس للاسف مب صحيح الدخل يختلف واكثر يمكن ايكون الضعف بس لعب على العقول الواحد ايكلف عمره 470 الف للراس و170 الف للصندوق ويعشمونه ب 20 الف بعد فتره يتعايز ويهون وصاحب الموضوع المروج ما يستفيد الى انه نفر الناس من الشغله البعض يبدا بسيارات مستعمله باسعار معقوله ويدخل له دخل شهري لا باس به . تحديد الربح لا يجوز اسلاميا اولا لازم يفهم اللي بيدخل في هذى الشغله ان التجاره فيها الربح والخساره بعد الدخل العام وحذف المصاريف التشغيليه تحسب نسبه المشغل والدخل يستحقه صاحب الشاحنه وليس بالعكس الكثير لا يملك الوقت في متابعة الشاحنه يبا ايريح راسه بس الامور لازم اتكون واضحه لا يغبن الشخص حقه وفي النهايه يرى الامور غير واضحه وينسحب من الشغله وايريح راسه.
الموضوع مثير للجدل وانا متاكد ان في اعضاء يملكون معلومات تثري الموضوع وكل واحد يدلو بدلوه لما فيه مصلحة الاعضاء مب حرام اتفيد الشباب والله ما حد بينافسك بشاحنه او شاحنتين اذا تبا اتخاف خاف من الشركات الضخمه اللي تملك مئات الشاحنات والكل عارف اللي مشتغل في الشغله هذى ان السوق يتسع للجميع واهنيه في الامارات الشغل والمشاريع تستوعب العدد الموجود والضعف بعد لانا اهنيه في الامارات نتميز بالعدد الكبير لمواقع التحميل خاصة لو عرفتو ان قطر تمتلك موقع او اكثر والشاحنات اتعبي التريب الواحد بعد انتظار اكثر من 48 ساعه .
اتوقع ان القسم المقترح يحتاج الى وقت وبيكون من افضل المواقع اللي تشد اصحاب الاختصاص في البحث عن الشاحنات المعروضه للبيع او طلب عقود عمل او طلب استاجار شاحنات لاعمال دفان او معدات حفر ويتم عرض الاسعار في الخاص والتعاقد حتى شركات المقاولات مستفيده .
والله الميسر وشكرا