مرحبا .. نكمل معاكم في الجزء الثاني من مذكرات الثمانينات …
كنت انا ضعيف البنية و كان لساني طويل يعني اغلب الايام انضرب المهم مره ياني اقوى طالب في المدرسة هوه راسب كم سنة ودوم يشوفني انضرب قالي تباني احميك و ادافع عنك شوف ابا مقلمة سندباد وقلم باركر كان ارقى قلم هذيج الفترة ينباع ب 12 درهم تميت افكر لحظات وقبلت العرض بس قلت له عطني اسبوع افكر .لانه مصروفي درهمين في اليوم و درهم العصر يعني يبالي 6 ايام لين ادبر المبلغ ( 17 ) 12 للقلم و 3 للمقلمة.وريالين لباص المواصلات لين الغرير يعني بتم 6 ايام بدون أكل ,,,,, انزين ثاني يوم زقرونا في العيادة المدرسية وكانوا يفرزون اسامي الطلبة اللي في راسهم قمل و يعطونهم دوا اووف من ريحته تقول قاااز ريحته غريبة حق القمل و بعد يعطون مثل الرش مبيد للقمل فيه صلب احمر طويل علشان يدخل بين الشعر .. المهم كنا نضحك على الي يطلع فيه قمل ونسوي له فضيحه في المدرسة و في البيت .. بالصدفة شفت اقوى طالب في المدرسة يعطونة الدوا مال القمل ترى العيادة عند المقصف وهو شافني و ابتسمت انا ابتسامة صفرا يعني كشفته .وجكيتة. على طول قالي ها المبيد مب مالي مال ربيعي و انا بعدني مبتسم الابتسامة الصفرا … جان يقول خلاص مباب مقلمة و مابا قلم و اي واحد يضربك تعالي خبرني … الهم انا ما انتظرت عطيته كم اسم من اطلبة اللي ضربوني و قلت له اضربهم .. اليوم على البيت .. ويم على البيت فعلا ضربهم الله عقب اغلب الطلبة عرفوا انه اقوى طالب ربيعي ومحد كان يقدر يقولي شي …وعقب اسبوع يا طالب اقوى من ها الطالب منقول من مدرسة ثانية.. كفخ البطل القديم .. حرام.

وبخصوص الاذاعه المدرسية كنت مشارك و اسبوع احفظ حكمة اليوم ( درهم وقاية خير من قنطار علاج ) اسبوع كل يوم الورقة ويايه في مخبايه كنت من محبي المشاركة في الاذاعة المدرسية وعلى فكرة مبنى الاذعه كان بين شجرتين نبج ( كنار ) عرفتوا النبج و فيه خلية نحل ..انزين فجأة ونا ياي اقدم فقرتي حكمة اليوم اشوف الكل يشرد مادري ليش ونا شاد حيلي ابا القي الحكمة المدرس يقول امشي امشي النحل بيقرص فينا ونا مصر على القاء الكلمة اسبوع اتحفظ فيها و آخر شي ما اقولها مستحيل و احس بالنحل يقرصني عادي اونه بطل قومي وشجاع لانه القرصه اول شي ماتعور و اشوف الطلبة عدالي يشردون و اللي يحط ايده في شعره و يطلع النحل المهم قلت حكمة اليوم و قلتها غلط بعد تصدقون بعد اسبوع من الحفظ قلتها غلط .. انزين بعد ساعة ما اقدر افتح عيوني حرام تنفخت وراسي ورم و جفوني حرام ما قمت اشوف …. كله من حكمة اليوم لو شردت احسن لي علي فكرة اللي كان بيقول فقرة هل تعلم شرد واللي كان بيقول الحديث الشريف شرد … وماياهم شي الا انا البطل ويهي تنفخ… حليلي و تميت في البيت حاط ثلج .. وكل الفريج يضحك على ويهي حتى قناة الجزيرة و السي ان ان وراعي الدكان كلهم عرفوا السالفه .والفريج اللي عدالنا عرف السالفه و دبي كللها عرفت السالفة وحتى الامم المتحدة عرفت سالفتي.وجميع وكالات الانباء . و قاموا يسموني في المدرسة حكمة اليوم …… و كل ما امر يقولون هكوه حكمة اليوم و ياشرون علي و انا على طول ارد واقول انا ريال على الاقل ما شردت … و على فكرة اللي شرد من فقرة هل تعلم ربيعي و صديقي العزيز مسؤول في مكان .. مشهور .ودوم اطرش له مسج اكتب فيه هل تعلم .. و السموحة حشرتكم

8 thoughts on “ذكريات طالب إماراتي في الابتدائية في الثمانينات ( الاذاعه المدرسية )…الجزء الثاني”

  2. ههههههههههههههههههههههههههههههههههه
    الله يغربل ابليسك نقعت ضحك على سوالفك !!
    ومشكور على الذكريات الحلوة

    وان شاء الله نشوف يديدك

  3. Alain 111
    مشكور عمي على الكلام الحلو …

    مثلثمة شعرية
    مشكورة اختي على المشاركة ترى فيه اجزاء وايد باقية

  4. سلامي عليك الفلاسي ..

    ذكرتني بايام الدراسه ..

    انا عشت الدور .. هالزمان حتى قلامت بو 50 ماتملي عيون عيالنا ..يبون مونتي بلانك .. هههههه..يارين لو تكون في تكمله او جزء اخر ..

    بانتظار جديدك ..

    واسمحلي على القصور

  5. الله عليك يالفلاسي…

    ماشاء الله عليك..

    انا الصراحه قريت وعشت الحدث يالس اتخيل المواقف جنه هالشي مستوي جدمي..

    ماشاء الله عليك سردك حلو وما ينمل ..

    ياليت في 10 اجزاء واكثر..

    احييك على كتاباتك الحلوه..

Comments are closed.