السلام عليكم….
مرة كنت أتسبح…وسمعت التيلفون يدق…..ظهرت بسرعة لأني كنت أتريا مكالمة مهمة…ويوم ردّيت على التيلفون….طلع هندي مغلّط !
———
مرة كنت يالس مع الشباب في الكوفي شوب….ودق تيلفون واحد منهم….وعقب شوي استأذن….كانت امه متصلة تباه يمر على الجمعية قبل لايرد البيت.
——–
عشان أوفّر في فواتير إتصالات خذت بطاقة مدفوعة….وحطّيت فيها 500 درهم ويوم شيّكت على الرصيد حصّلته 493 درهم بس!!
——–
مرة كنت واقف على الإشـارة…وشوية ويي زلمة يسوق بنتلي ويوقّف على يساري….بصراحة عصّبت لأن الجهة اليمنى كانت فاضية….ليش ماوقّف فيها؟
——-
مرة كنت مع الأهل في المطعم…..ويوم طلبت الحساب…لقيت إنهم ياخذون 15% بدل خدمة!
——————————————
نمــــــــــاذج من (المواضيع) التي يزخر بها منتدانا العزيز……(مواضيع) تحس راعيها يصرف كلام والسلام بس يبا يزيد عدد مشاركاته وخلاص…..لا فكرة لا حبكة درامية لا اسلوب بلاغي ناهيك عن الأخطــاء الإملائية
……. ياجماعة الخير فكّونا من هالمواضيع قوم بو سطر وسطرين….وخلونا نرتقي بطرحنا وكتاباتنا….فمنتدانا ولله الحمد يزخر بكتّاب يملكون أقلاماً ذهبية….ولكن المشكلة أن مواضيعهم لاتأخذ حقها من القراءة والبحث جرّاء هجوم مواضيع (النص كم) وكثرتها….وسرعان ما تتدحدر المواضيع الجيدة إلى الصفحات الخلفية وعدد الردود عليها لايصل إلى الـ 10…..فيما الردود على المواضيع (النص كم) تتعدى العشر صفحات !!!!!!!!!!!
أنا اقول اللي ماعنده اسلوب في الكتابة يكتفي بالمتابعة والرد على المواضيع فقط….ولايأذي الخلق بمواضيع (نص كم)….ويخرّب على المواضيع المتميزة.
هيه بس حلو الواحد يحط من هالمواضيع النص كم
تغيير
مب حلو كلها مواضيع جد
يمكن موضوع بو كم ونص هذا لة مغزى ويمكن الواحد يسرد قصه او موقف خاص فيه بس يطلب المشورة والاستفاده المنتدى مليء بالمواضيع اقرأ اللي تباه واترك اللي ما تباه
والدليل أنه محد أتفاعل مع موضوعك ( للأسف الشديد ) بالرغم من أهميته إلا واحد
كلامك صحيح
بس يمكن صاحب الموضوع أنسان ومحنك وصاحب كلمة ثقيلة ويحب يختصر الكلام
خير الكلام ما قل ودل
مب شرط تكتب نشرة أخبار …. والموضوع ملخبط ومافيه تنسيييييييييييييق
بس موضوعك مميز …. وتسلم على الطرح
وأن شااااااء الله نشوف الأقلام الذهبيه شو بتبدع لناااااااااااااااااااااا
سلامكووووووووووووو مكبر كوكو