السلام عليكم..
عدنا والعودة احمد..عدنا لكم بعد فترة انقطاع بسبب مشاغل الحياة والعمل..لكن كنت حاضر بقراءة المواضيع بشكل يومي سريع..صراحة المخ عندي انحرف شوي….انحرف لقسم السيارات خخخ.
بكتب لكم موقف مريت فيه اليوم وهالموقف ما يتمناه أي صاحب سيارة..خاصة بالصيف.
بداية عشان محد ياخذ فكرة ويقول حليله عنده سيارة قرمبع وسكراب خخخ (حلوة هذي من زمان ما استخدمتها) عندي سيارة ثانية يديدة وفورويل شارنها من 4 شهور..لكن القلب دوم يحن للحب الاولي الا وهي سيارة سبورت..فقلت ليش ما اخذ سيارة سبورت مستعملة اطلع حرتي فيها بدل ما ابيع السيارة اليديدة..المهم يوم الاربعاء او الخميس حصلت سيارة على النت معروضة للبيع (الميموري تعبان) ..صراحة حبيتها من اول نظرة..اتصلت براعيها واتلاقيت وياه عقب ساعه واشتريت عنه السيارة…السيارة ما كانت بحالة صحية جيدة.كان فيها زجام وكحة واشياء كهربائية ثانية لكن من برع ” لئطه “..قلت مب مشكلة بشتريها وبصلحها..
واليوم الصبح وانا واعي من وقت
..اول شي يى في بالي اصلح السيارة..حتى طلعت بدون ريوق لوول (صباحية مباركة يا عريس خخخ)..فوديت السيارة محطة الوصل بجميرا عشان يشيكون لي ع السريع المكيف والمروحة..رفعوا السيارة وانا رحت اشتري ريوق..رجعت اشوف الهندي ماسك قطعة نايلون من النوع الغليظ طولها وعرضها كبر بونيت السيارة..قالي بلكّنة غير مفهومة ان داخل مكينة شي جذي..انا ع بالي يقول يبى يغطى بالنايلون المكينة عشان ما تتوسخ (فخاطري اقول هالسيرفيس والا بلاش…نظافة صارت من اولويات الهنود 
)…جان يقولي “ارباب لا هذا في نايلون داخل مكينة مال سيارة..سكّر على كاربيتر..مشان جذي سيارة يجي حراراة زيادة ومكيف مافي بارد ” ..وهو يرمسني وانا اطالع قطعة النايلون
..مب مستوعب القطعة هذي طلعها من المكينة..فخاطري اقول لا يكون يبا ينصب علي لوول…المهم طلع صدق النايلون كان عالق داخل المكينة…ضبطوا المكيف…غسلت السيارة ورحت الوكالة وعطوني موعد عقب باجر عشان تصليح السيارة بالكامل..ونفس اليوم عندي موعد سيرفس لسيارتي اليديدة لول..
رجعت البيت واتغديت..يلست ع النت شوي..شغلت التلفزيون..فرفرت بالقنوات..لكن شي ثاني شاغل تفكيري 
..ابا اسوق السيارة لول..اتلبست وركبت السيارة..الى اين؟ الى هناك..مريت على محل زينة السيارات كان مركب لي شاشة يوم الخميس (طبعا يوم الخميس هاي روحها قصة ثانية ما بين صناعية الشارجة وصناعية القوز ومحلات زينة السيارات جدام فندق ريجنسي لين 12:30 بالليل
..ما انلام حرمة يديدة..قصدي سيارة)…قلتله ما يطلع الاذاعات .اعتقد في مشكلة في الانتينا (اريل) قالي مشغول الحين تعال اخر الليل الساعه 12 بكون فاضي (توقيت مناسب ) وبشتغل على راحتي..قلتله اوكي.
الحين وين اروح؟..قلت يلا دام اني في ديرة خلني امر الممزر واشرب لي كرك ولو ان الجو ما يساعد..شربنا ولفلفنا…عقب نويت ارد البيت اغير وارد اطلع…وانا راد..ولع كم من ليت في داش بورد ( لوحة العداد) وانا واقف ع الاشارات….قلت خلني اطفي السيارة وارد اشغلها يمكن يختفن الليتات..طفيت وشغلت..ما اختفن..قلت بجرب بعد مره..طفيت وشغلت السيارة جان يطفن الليتات..والابتسامة ظهرت على ويهي 
..الاشارة اخضرت..دعست الريس السيارة اتحركت شوي وجان اتبند ( يا ويحتي!!! ) مب الحين.لاااااااااااأ….حرررررررر…..وادق سلف ..اشتغلت واول ما ادعس الريس اتبند السيارة..وانا احاول كل شوي.وعلى هذي الحالة احول اوصل السيارة برع الشارع.. كل خطوتين اتبند..وانا منهمك بتشغيل السيارة..اسمع انغام موسيقية حواليني..هرنات بكل انواعها.. هرن شاحنات..هرن باصات..هرن صالون..اشتغلوا علي الهنود والبتانية هرنات ونظرات احتقار وسب (الحين انا شو ذنبي اذا السيارة بندت علي..يعني لو دقيتوا هرن السيارة بتتروع وبتتحرك مثلا لووووول)..والشارع امبونه زحمة..وانا سويت لهم ازمة خانقة لوول..اصلا توقيت الشاحنات خخخخ…صراحة حسيت عمري اتهزأت ع الاخر خخخخخخخ..وبنفس الوقت ميت من الحر..(الحين شو مكلفنك اتسوق سيارة جديمة وانت عندك سيارة يديدة واقفة في البيت لوول)…مع المحاولات…يأست ان السيارة اترد تشتغل..اتصلت بالشرطة عشان يطرشون ونش (سحب سيارات)..ردوا علي ما نطرش ونش لكن بنطرش لك دورية.. احتياط عشان محد ايي مسرع وراك ويشكل خطر عليك (صراحة يستاهلون كل الشكر)..اتصلت البدالة وعطوني رقم ونش ووصفت له المكان..
تميت 10 دقايق بدون أي محاولة تشغيل 
..قلت خلني اجرب اخر مرة ..وجان تشتغل السيارة واتحركت بشكل طبيعي..طبعا انا فقدت الثقة في السيارة..خايف اتبند على ويي واحد من ورا ويدعمني 
عاد ترك مسافة بين سيارات في البلاد سامحني 
..خذت يمين الدوار وطلعت على شارع جانبي..وانا اتحرك اتصلوا الشرطة جان اقولهم مشكورين خلاص السيارة اتحركت..تميت اسوق السيارة شوي واوقف شوي..شو اسوي؟ الحين يا وقت اتخاذ القرار..اجتمعوا اعضاء مجلس ادارة المخ عشان يتخذون قرار العودة بالسيارة الى البيت او اتصال بالونش والعودة بالتاكسي..طبعا بعد مناقشات حادة واعتراض احد اعضاء المجلس بوجود ازمة تاكسي بدبي، قررت مركز ادارة المخ المجازفة والعودة بالسيارة….اتصلت براع الونش وقلتله خلاص لا تيي السيارة اشتغلت..وانا طول الدرب خاصة نفق الشندغة اسوق وايدي على قلبي..وادعي يارب السيارة ما تبند علي…عاد كله ولا في النفق خخخخ..اذا في شارع رئيسي وجي سو فيني..في النفق الله اعلم شو بيسون!…الحمدلله السيارة وصلتني البيت بعد تعذيب نفسي ولعب بالاعصاب..وقفتها وقلت ما بسوفها لين موعد التصليح في الوكالة.
صراحة موقف ما اتمنى حد يمر فيه..خاصة هرنات المهندة والبتان..اصلا هم من تخضر الاشارة وايدينهم ع الهرن..وبعد ما تتحرك يلعنون سلسبيلك بالهرنات خخخخخ…الحمدلله ماشي مايكرفون بالسيارة ولا جان سبّوك علني…يلا مواقف وتجارب الواحد يمر فيها ويتعلم…
واسمحوا لنا ع الاطالة..
لا لا لا موقف فظييييييييع
صدق فشيلة… الا كيف بتسيربها الوكاله للتصليح ماشيء غير الونج ايي ايشلها عسب ما تنحط في موقف لا تحسد عليه ^_^
حلوه هذي “اجتمعوا اعضاء مجلس ادارة المخ”
اكتمل النصاب و الا لا ..
لو ما اكتمل النصاب، مره ثانيه ازقر أعضاء مجلس ادارة المخيخ و النخاع الشوكي
و لا تنسون التوزيعات و المنح
و الحمد لله على السلامه
هههههههه
صراحة سالـفتك سـالفه
تستاهلون ولا حد يشتري سياره مستعمله ،، أونك حنيـت
خل الحنيه تنفعك
خبرنا عقب باجر كيف بتكون التصليحات ــ و كم بتدفع عليها
لو دافع جيمتها وجيمه التصليح بتتيب لك وحده يديده بلا عوار راس
فانتظار باقي الاكشاناااات
اعرف وحده ويانا في المنتدى دوم سوالفها شراتك
و تدق لي تعاااااااااالي انقذيني السياره بندت عليه
الله يستر عليها بس واهاهاهااااااااي
صراحة حبيتها من اول نظرة
دوم تصير لي.. ويا كثر السيارات اللي حبيتهن
بس انته لو ما تقول لوول وايد جان امورك بتظبط
بيني وبينك شو نوع السبورت اللي عندك؟