السلام عليكم ورحمة الله وبركاته،،

مبارك عليكم الشهر وربي يكتبكم من عتقائه ان شاء الله ،،

صار لي في مجال التعليم ثمانية سنوات ،، وكل ما تمر عليه سنه اقول ان شاء الله هالسنة بتكون الأخيرة ،، لكثرة ما اراه واشوفه في مجال عملي من ظروووف منفرة ،، لكن الي صاير الحين والي بالنسبة لي القشة الي قصمت ظهر البعير هو تحويل نظام المدرسة الي انا فيها الى مدراس تبع نظام الشراكة ،،

قلت مش مشكله ترا كلها سنه او سنتين وكل مدراس بوظبي بتتحول الي نظام الشراكه ،، يعني ان ما ذقت هالهم هالسنة اكيد بذوقه السنة اليايه ،،
الحاصل حاليا والذي اغلب المدراس تعاني منه هو التخبط في القرارات غير المدروسة ،، فالمنهج يابينه من استراليا ،، والمشرفين من كندا،، ونحن المدرسات والطالبات من الامارات !!! يعني طاش ما طااااش ،،

انا بمجرد انا رفعت الكتاب لطالباتي وشافوووه شفت علامات التعجب والرهبه ارتسمت على ويوههم ،، وقالووو يا مس تراه صعب ونحن ما نعرف وحنا بالعربي يالله نمشي هالمره بالانجليزي ووو،، حاولت اهون عليهم واقول مش مشكله بنتساعد وفي مشرفين بيساعدونا ومن هالكلام الي انا خاطري حد يسمعني انا ياااه لاني انا احس اني توهقت ويا البناات!!

المشكله شو ،، المشكله انه المشرفين الاجانب الي عدنا كل يوم قالوا لنا شي ،، من يومين قالووو ابدو بالمناهج الانجليزية اليديدة ،، وامس قالوا لالا خلكم على المناهج العربية القديمة مع استخدام مصطلحات انجليزية ،، واليوم قالوا لا ابدو انجليزي ،، وبالباجر ما عرف شو بيقوووولووون،، ونحن مع طالباتنا ظايعييين في الطوشة،،

ترا المشكله والله مش من الاجانب الي ياييين ،، المشكله من مجلس بوظبي للتعليم ،، الي لين احين ما استقر على قرار واحد،، يا عمي اذا تبووون تبدوون بمناهج اجنبية ابدوا بالتدريج يعني من المرحلة التأسيسية ،، مش على طوول خذوه فغلوه ركض ركض للصف التاسع والسابع والثامن،،

قلت بطلع من التربية وبفك راسي من هالهم،، وصار لي تقريبا سنه وشويه واقدم في كذا مكااان،، لكن اوول ما يشوفوووون في السيرة الذاتية اني اشتغلت في مجااال التدريس على طوووول يرفضووون الاوراق ،، ليش لاني اشتغلت مدرسة ،، يعني هل اصبحت مهنة التدريس عاااار او شبهه ،، طيب انتو يوووم توظفووون الناس تعطونهم كورسات تدريبية وتحطونهم تحت مسمى متدرب ،، فليش ما نتعامل نحن نفس المعاملة ،،
مع العلم بان تخصصي لا يمت بصله الى التدريس ،، فانا خريجة كليه علوم وتخصصي يتبع احدى شركات البترول ،، ولكن من اول ما تخرجت وهو يقولون لنا يوم نقدم نبا شباب عسب انوديهم الحقووول ما نبا بنات،، مع اني تدربت في فترة التدريب الجامعي في احدى شركات البترووول ،،

اصبحت مهنة التدريس = اشغاااااااااال شاقة كلكم يوم ترجعون البيت ما تشلوووون هم اليوم الثاني ،، الا نحن ،، لازم احضر واصحح واحط الامتحانات وهالشي ياخذ من وقتي ووقت بيتي ،،

ابا احصل وظيفه تنتهي بمجرد خروجي من باب الدوام مش اشل همها وياي للبيت ،،
سمحووولي بس والله والله هذا غيض من فيض ،، ومحد بيحس في المدرسين الا الى عايشييين في الميدان التربوي ،،

ملاحظة (( انا استخدمت اسم اخويه الجنرال ،،لاني اشتركت وياكم بس بعدهم ما فعلوا اشتراكي))

5 thoughts on “التدريس= اشغال شاقة”

  1. [quote=متفائلة في زمن اليأس;

    شكرا لج .. والله ثم والله ثم والله .. لا نقول إلا الحمد لله على هذه المهنة الشريفة ..

    ونسأل الله تعالى .. أن نكون على قدر حمل هذه المسؤولية .. من حبنا لمصلحة طلابنا وعيالنا ..

    لا نريد لهم الا الخير .. أينما ذهبوا .. فالتوفيق .. من الله عز وجل ..

  2. مراااحب بج الغالية…كأخت لنا ..

    فديتج…المناهج بالأنجليزي..بس مبسطة كمصطلحات..وهم مش داقين وايد على االمنهج أنه يكون بالأنجليزي..أحسه مبسط…

    في نقطة ثانية..المعلمات العلوم والرياضيات كلهن خضعن للدورات عسب المناهج اليديدة…لأنها بالأنجليزي..فهل ألتحقتي وياهن؟؟؟

    وتبين الصراحة التربية بشراكة وإلا بدون شراكة…سقم ومرض..وشرات ما نوهتي أعمال شاقة..

    بس للأسف هب طايعين يتفهمون..وخاصة كثير من الأعضاء اللي تهجمو علينا..ويساوون شغلهم بشغل المعلم..

    فأتوقعي يحدر لج واحد ويخبرج…بالعكس أنتو أسهل مهنه…ومرتاحين ولا يعيبكم شي….!!!!

    ا شرات ما كتبو عن المعلمين أونه….الر ياييل ضرب سيجاير…والمعلمات حش وونميمة…بصريح العبارة توجهت لي….!!!!!

    ومحد بيحس بالمعلم..لأن اغلب الموظفين يتعاملون مع أوراق..وكمبيوتر وآآليات..ومعظمهم يعطون الأوامر وبس…!!!

    الغالية بالنسبة للتوظيف..ترا كلمة تربية عليها بالوزارات والحكومات الثانية…× وبالقو بعد…أسأليني أنا….

    اللي يقول خلاص ما نعرف نكتب ولا نتحاور ولا ندق الكمبيوتر ولا ننجز معاملات…هب جنا الميلسين على المكانب..والمديرين محد سواهم إلا المعلم…!!!!

    تبغين نصيحتيه…أهم شي بالعمل ..الرضا الوظيفي…بس للأسف مش متوفر لأعلب المعلمين..

    فيا معلم لا تشتكي …لأنه محد بيحس فيك…وعلى الله أجرك…

    والله ييسر لج أمورج..

    أختج،،،

  3. السلام عليكم ورحمة الله وبركاته ..

    أنا مدرس .. بمدرسة فيها نظام الشراكة ..

    والله لن أزيد عن كلام الأخت .. الذي سأزيده هو فقط … نحن عدنا في التربية والتعليم .. ثلاثة أمور رئيسية..

    ( المرسل / المستقبل / المنهاج )

    المرسل :- المدرس .

    المستقبل :- الطالب.

    المنهاج :- ؟؟؟؟؟

    لو ركزنا على جانب وتركنا الجانب الآخر.. هذا اكبر دليل على فشل التعليم ..

    مثلا :- التركيز كان على تطوير المناهج .. هذا شيء طيب وممتاز ..

    بس المقارنة .. هل المرسل (المدرس ) قادر على تدريس هذا المنهج ..

    وهل المستقبل ( الطالب ) قادر على استيعاب هذا المنهاج ..

    المدرس .. يمكن تكون عنده القدرة على تدريس المنهاج الجديد..

    الطالب :- هو الضحية .. أنا برأي انه اغلب طلابنا ما عندهم القدرة الاستيعابية .. للمنهاج الجديد..

    عموما .. ما نقول الا .. الله المستعان ..

  4. ملاحظة (( انا استخدمت اسم اخويه الجنرال ،،لاني اشتركت وياكم بس بعدهم ما فعلوا اشتراكي))

    ممبروك عليج التسجيل … وان شاء الله يفعلونه بأسرع وقت..

    بالنسبة لموضوعج عن مهنة التدريس… فعلا اهي المهنة الوحيده اللي الواحد يشل همها للبيت اما بخصوص تغييير المناهج بصراحه ما ألوم طالبتج والله اني من شفت كتب اخواني صار ويهي كله علامات استفها وتعجب وفاصله منقوطه بعد… انا مو ضد ان التدريس والتعلم لازم يطور بس مب بهالطريقه الواحد يبدأ من اول سلم مب فالنص ويقول كملوا احسها صعبه على الطالب انه يستوعب بعدين المنهج تغير الله يرحم زمان اول كان صج كتاب اما الحين تشوف الكتاب من الغلاف على بالك مجله بس تفتحه من داخل تشوفه طلاسم؟؟

    ما قول الا الله يعينج وان شاء الله تحصلين الوظيفة اللي تناسبج ..

Comments are closed.