استفسار مهم جداً

عساكم بخير وسهاله

ياجماعة الخير انا متوهق حالياً بسالفة فروق الأسعار الي طالبها المقاول ومع الإستشاري لأنه للأسف طلع متعاون مع المقاول موضوعي ياجماعة الخير انا عندي مشروع وتكلفته الإجماليه مايقارب الـ 7-8 مليون درهم المهم ياجماعة الخير ظهر لي مليون من لجنة القروض وقلت بسوي فيها اضافات ديكور واطقم صحيه بما يعود بفائده لي لنه هل شي يلعب دور برفع قيمة الإيجارات طبعاً المقاول والإستشاري سبقوني وقالولي يبون الزياده كلها وعلى كلام الإستشاري ان المقاول طالب زيادة فروق اسعار مليونين وتم يتناقش وياه لين مانزلها لين مليون المهم انا حسيت ان الموضوع فيه لعبه مابينهم وانا موقع العقود وبدوا في المشروع من شهر اثنين والريال بادي في المشروع وحط الكرفانات والسور قبل العقد بشهر تقريباً المهم الحينه ظهر لي ببند يديد والله يا انك تعطيني الزياده او اني انسحب من المشروع بكبره انزين ياولد الحلال بعطيك الي فيه النصيب بس مب الي انته طالبنه المقاول للحين استلم من قيمة المبلغ الإجمالي مايقارب المليون و400 الف ودافع ضمانات بنكيه مايقارب الـ 800-900 الف درهم والإستشاري بدل مايعطيني حلول بديله ويوقف معاي ضد المقاول يقوله قدم لي رسالة اعتذار ووقف المشروع الي اعرفه انه من بداية المشروع بيكون مجهز الحديد والأمور هذي كلها من شهر 2 خلنا نقول من شهر 3 او 4 ما بتكون الزياده بالطريقه الي هو طالبها علماً بأن نسبة الإنجاز تقريباً 50% يعني الي ناقص تشطيبات للفيلا وبس العقد الي مسونه مع المقاول مذكور فيه بند بالنسبة للأسعار (تحدد المبلغ المشار اليه في الفقرة اعلاه لهذا البند بصفه نهائيه ولايحق للطرف الثاني -المقاول-ان يطالب بأي زياده عليه بأي حال من الأحوال)

وبند ثاني بدايته..يكون للاستشاري ومن ثم للطرف الاول في حالة سحب العمل من الطرف الثاني مايأتي
ان يقوم بنفسه بتنفيذ الأعمال المتبقيه التي لم تتم وذلك على حساب الطرف الثاني او ان تطرح تلك الاعمال في مناقصه جديده او يعهد بتنفيذها الى احد المقاولين بطريق الممارسه مع تحميل الطرف الثاني بكافة تكاليف استكمال الأعمال الغير منفذه ولا يحق للطرف الثاني في هذه الأحول انا يستفيد من اي وفر يتحقق.
ويليه عدت فقرات ولكن الفقره هذي لفتت انتباهي اكثر..

بالنسبه لهل بند مافهمته عدل..ياليت لو حد منكم يخبرني يعني اذا انحسب يتحمل هو تكاليف البناء او كيف..

ما ادري ياجماعة الخير شو اقولكم بس الي حللته انه انسحابه خساره كبيره له بالنسبه لنسبة إنجازه والمبلغ الي مستلمه لأنه للأسف ماحد يعطيك فكره وافيه في بنك الخليج الأول

سؤالي للخبراء وللي واجهتهم نفس هل مشكله

1 هل يحق للمقاول الإنسحاب من المشروع واذا كانت الإجابه بنعم ماهي الإجراءات المتبعه الي تتلي إنسحابه علماً بأن موضوع إنسحاب المقاول ليست مذكوره في العقد

2 ماتشوفون ان الزياده الي طالبنها مبالغ فيها جداً

3 نصايحكم باللي اتبعه معاهم لأنه تدرون انا ماعندي خلفيه عن هل مواضيع

4 واخيراً وليس اخرأ ارائكم الطيبه وتعليقاتكم حول الموضوع الي كتبته وسالفة العقد الي بيني وبينه وانا ما ابى اظلمه الي طلبته بيوت درج للفلل وتكلفتهم الإجماليه تقارب الـ 200 الف درهم هل حلال عليه ياخذ مني هل مليون بكبرها ومحددين لي سعر السيراميك ب35 درهم للمتر والأطقم الصحيه بسعر زهيد ..يعني تدرون الواحد مابيركب شي يومين ويعقه ولا شو رايكم