في ردي على الموضوع السابق المطروح في المنتدى :
الاخوان وايد طاحوا في مدير هيئة الهوية و القرارات الصادره و نسوا شو فايدة البطاقة و شو المغزى منها, و على فكرة أمس تكلموا بخصوص الموضوع هذا في البث المباشر مافي اي تهديد بإنهاء خدمات المواطنين الريال قال غرامه 1000 درهم
انا وايد استفدت منها الصراحه … و كلمة الحق تنقال صح انه شوي كلامهم و طريقتهم رجعية لكن هذا ما يعني انه نطعن في جهة حكومية حطت نظرة مستقبليه امنية و اجتماعية للدولة علنا.
تنفعك في استخراج حسن السيره و السلوك .. وفي السفر لدول مجلس التعاون …
و حتى في الجوازات تقدر تستخدمها كدرهم الكتروني تعبيها رصيد و تستخدمه ما اعرف شو السقف المالي الي مخصص لها و لكن انا حاط فيها 1000 درهم من ايام جايتكس السنه الي طافت و اذا سرت الجوازات تنفعني وايد …
و بعدين اخواني مافي شي انذكر انه سوف يتكم انهاء خدمات اي مواطن لو ما تم استخراج الهوية و الهيئة صار لها 3 سنوات تخبر الناس عن الهوية و تعلمهم عنها لأنه الهوية راح تكون هي الوثيقه الرئيسية في الدوله بعد عام 2010.
اذا انتوا متضايقين من طريقه التهديد و الوعيد, تراها انا اشوفها عادية ما كانت تهديد ووعيد أنا اشوفها نفس قرارات أي دولة لما تبي تلغي التعامل مع اي وثائق قديمة و تبي تطبق نظام يديد و آمن و افضل لمصلحه الدولة و الناس نفسهم.
يعني هم ما بيحطون في المولات كوشكات و بيحطون موظفات يقولن ” لو سمحتوا ممكن تسجلون معانا”
هذي وثيقه وطينه الكل لازم يلتزم فيها. طبعا اول مرحله تم استبدال الهوية القديمه البيضاء بهذه الهوية و بعدين بدوا يحطون في الجرايد يخبرون الناس شو مزايا هذه البطاقه و شو فوايدها لكل مواطن.
القرارات ما طالعه من مدير هيئة الهوية القرارات أساسا صارده من المجلس التنفيذي بأن تكن الهوية هي الوثيقه الأهم في التعاملات كلها, و كطبيعه بشريه محد بيتحرك الا اذا كان في دوافع و محفزات.
و طبعا توقيف التعامل و المعاملات مع جميع فئات المجتمع مب بس المواطنين الا ببطاقه الهوية هي نوع من التحفيز الالزامي لأنه هذه قرارات عليا يجب تنفيذها
و بعدين نحن يالسين نضارب الدوله عشان التركيبه السكانيه المتهالكه عندنا, الهوية تعتبر حل من الحلول الجذرية لهذه المشكله الي ملاحظ انه سيتم تسجيل كافه المواطنين و كافة الوافدين يعني الي ما راح يحصل الهوية راح يكون وجوده في الدوله غير شرعي, و شغله ثانيه هي تسجيل البدون الحين و اصدار بطاقة هوية لهم خاصه قبل حلول عام 2009م.
بعد حلول عام 2010 من لايحمل بطاقه هوية من ” الوافدين” مب المواطين سيكون وجوده غير شرعي في الدولة او يمكن يعرض لغرامه مادية والزامي يطلع بطاقه هوية.
اخواني كنا مفروض ناخذ الموضوع السابق بطريقه نقاشية افضل و ندرس جوانب الموضوع الكل رد على الموضوع من غير ما يكمل قراية الموضوع كامل كان ردكم بس على عنوان الموضوع مستحيل يتم انهاء خدمة مواطن اذا ما عنده هويه الي راح يتأخر بتكون عليه دفع غرامه 1000 درهم كما ذكر مب انهاء خدماته مثل شاع في الموضوع.
و بعيد قبل كل حد ما يرد المفروض تفكرون شو الفرق من القرارات الي ممكن تفيد الوطن و الي تفيد المصلحه الشخصه, و مصلحة بلادي اشوفها فوق اي مصلحه شخصية و تطبيق القرار هذا يعتبر عمل وطني و تلبية لنداء وطني. انا البطاقه مظهرنها من عام 2007 .
صحيح اخوي البروفسور وايد بنوك تاخذ الهوية بنك ابوظبي التجاري و بوظبي الوطني و الاتحاد و غيره يمكن البنوك عندنا في امارة ابوظبي بس بنوك الامارات الاخرى الي لين الحين ما اخذو الموضوع بجدية
اخوي الفاضل x_uae_x صحيح كلامك لكن تخيل انه اغلبية الناس ما عندها بطاقه هوية … و جميع الهيئات الحكومية و الخاصه الزمت في ليله و ضحاها انه ما تتعامل مع اي وثيقه ثانيه غير بطاقة الهوية اكيد راح تستوي فوضي كبيرة … و مراكز تسجيل الهوية راح تزدحم و ما بيخلصون تسجيل و انته معاملاتك اذاكنت بتخلص باجر بتتريا شهرين لين ما تظهر بطاقة الهوية. لذلك الحكومه حطة خطة معينه و نظمت وقت استخراج الهوية للافراد و خلته على مراحل عشان كله الموااطنين و الوافدين يحصلون البطاقه و ما تتعطل مصالح الناس و تكون البطاقه زاهبه عندهم و بعدين يبدؤون التطبيق الفعلي و الالزامي للجهات الرسمية للبدء بالتعامل الهوية و اللازام ما يباله غير يومين و يكون معمم على كل الدوائر انها تستخدم البطاقة.
لكن طبية الناس عندنا الله يهديهم ماخذين بدون جدية و عشان جي الناس يوم شافوا الخبر خذوه على اساس انه تهديد و لا وعيد .. و لا هالكلام اصلا كان صادر اول ما طلعت البطاقه و سووها انه كل المعاملات راح تتمل عن طريقها في المستقبل.
و بعدين لو انه هيئة الهوية ما تنبه بالعواقب الي راح تصير للمواطنين و الوافدين بحلول عام 2010 انه كل معامالاتهم ما راح تتم ام تؤخذ بعين الاعتبار خبرني اي جهة لازم تنبههم …
لازم نحن المواطنين نحث نفسنا اول شي انه نستخرج البطاقه و نخلص دورنا و بعدين عشان نعطي الفرصه لهيئة الهوية عشان تنفذ نشاطها و مهمتها.
اخوي حركات انته شايف دائرة الاشغال أو البلدية حاطين كشكات في نص المولات عشان انجاز المعاملات طبعا لا…
و العكس لو تطبق هذه الفكرة بتكون حلوة بس ما اظن هالشي بيصير
لأنه استخراج الهوية لازم اجهزة تبصيم و ادخال بيانات و خاصه جهاز ادخال البصمه هذا بروحه وايد مكلف شكثر بيشترون الدوله.. و مافيها شي ياخوك ترا في نظام المواعيد ادخل الموقع و احجز لك موعد بيحولون لك على المركز الي تبيه و في الوقت المتاح لك وايد انظم.
تحيتي لكم
مادري الصراحه شو سبت العناد إلي مالها لزوم
الحكومه قالت طلعوا بطايق خلاص طلعوا شو المشكله يعني وبعدين إلي يقول زحمه ، لو كان الطابور حق العيش المدعوم من الحكومه ولا فلوس الزكاه بتشوف الطابور من بوظبي لين راس الخيمه
وشوو المااانع انهم مايسووون كوشكات فالمولات مب احسن ؟؟؟
للانتشار فجميع الاماكن وتقليل الزحمه وسرعة الانجااااز
فكره حلوه بصراحه
انا سمعت كلامه على البث المباشر..
قال المواطن الي ما بيسجل بعد 2009 بنسجله
بس اسئله المتصلين كانت ان نحنا ما استفدنا شي من البطاقه لين اليوم … لان عده جهات لا تقبل البطاقه .. اتذكر ان واحد اتصل وقال انا طلعت البطاقه لي ولزوجتي ولاولادي .. ودفعت مبلغ وقدره على البطاقه .. لاكن لحد اليوم البطاقه ما منها فايده
والمذيعه ردت عليه وقالت له يجب ان نرتقي بتفكيرنا من الاشياء الماديه .. لان البطاقه سعرها منخفض وفايدتها اكثر على المدى البعيد
رجع واحد ثاني واتصل وقال انا ارجع أأكد على كلام المتصل السابق واقول ان انا طلعت البطاقه لكل افراد العائله ودفعت مبلغ كبير والبطاقه الزاميه .. لاكن لحد اليوم ما استفدنا اي شي منها
كان المفروض على الهيئه انها تبتعد عن التهديد و الوعيد في حث المواطنين و المقيمين على اصدار البطاقه ….
اذا البطاقه فعلا مهمه في حياتنا وانها بتساعدنا وبتسهل علينا كثير امور الا ان حتى اليوم لم تتطلبها مني اي جهه سواء كانت حكوميه او خاصه في تخليص اي معامله..
البطاقه موجوده ولها رؤيه وفوائد وفيها ميزات عديده
لاكن تطبيقها العملي غير موجود وفوق هذا انا شخصيا لا اعرف اين مكان الهيئه في منطقتي وكل الي اسمعه ان معظم الي تحاول تسجل ما تقدر تسجل بسبب ان الهيئه بعيده وماعندها فروع تغطي كامل الاماره مثل ابوظبي او دبي
في النهايه اقول للهيئه القسم الاعلاني والتثقيفي وحث جميع الجهات الحكوميه و الخاصه على استعمال البطاقه في المعاملات راح يجبر الكل يسجل فيها بطريقه عفويه واجباريه..
اما اذا كانوا يبغون الاشخاص يصدرون الهويه بس لانها بطاقه هويه بدون تتطبيقات عمليه … فأنا اقولهم استريحوا … الليسن موجود
تحياتي
تسلم ياخوي على هالتوضيح وكلامك سليم 100% وانا مثلك مطلع الهويه من بداية 2006 والحمدلله سافرت بها عمان وبدون جواز وقدمتها فالبنك كاثبات واتمنى من الاعضاء اللي ماسوا يسوي الهويه لانه هوه الكسبان ان شاء الله تحياتي